Dual Panel1Ebry head man ob de Jew priest dem, e been pick fom mongst de man dem fa go fo God fa sake ob de people, so dat e kin offa gif ta God an sacrifice fa de people sin.
2Cause de head man too, e da man an e kin do ting wa ain right. So den, e kin feel saary een e haat an treat good dem wa ain da do right an ain know no betta.
3An cause e da man too, an kin do ting wa ain right, e mus offa sacrifice ta God fa e own sin, jes like e offa sacrifice fa de oda people sin.
4Ain nobody gwine pit esef op fa hab de hona fa be head man. God de one wa call a man fa be head man ob de priest dem, jes like God call Aaron way back yonda.
5Same way so, Christ ain pit esef op fa hab de hona fa be head man ob de priest dem. God de one wa pick Christ, an tell um say, “Ya me Son. Taday A come fa be ya Fada.”
6An een noda paat ob God Book, e say too, “Ya gwine be a priest faeba an eba, een de same way Melchizedek been a priest.”
7Wen Jedus beena lib een dis wol, e pray ta God, de one wa able fa sabe um fom det, da cry out loud an da weep. E aks God fa de ansa wid all e haat. An God yeh de pray wa Jedus pray, cause all de time Jedus been ready fa do all wa God say.
8Bot eben dough Jedus be God Son, de suffrin wa e suffa den mek um laan fa true fa do wa God say.
9An so wen Jedus come fa be all wa e suppose fa be, e come fa be de one wa da sabe faeba an eba all de people wa da do wa e tell um fa do.
10An God pick um fa be head man ob de priest dem, een de same way Melchizedek been.
Grow Op een Oona Laanin ob God Trute
11Dey still a heapa ting wa we wahn fa tell oona bout wa we jes taak bout. Bot dem ting yah haad fa splain ta oona, cause now oona ain ondastan tall.
12De time done come wen oona oughta staat fa laan oda people, bot oona got fa hab somebody laan oona gin de fus true ting dem dat God tell we, ting dat we wa bleebe oughta laan fus ob all. Oona still got fa laan dem fus trute, jes like leetle chullun wa haffa drink jes milk. Cause oona ain ready yet fa mo laanin pon top ob dem trute. Mo laanin, dat like de solid food dat big people got fa nyam.
13All dem wa still da laan dem fus trute, dey ain know yet how fa tell wa ting good an wa ting bad een God eye. Dey jes like leetle chullun wa haffa drink jes milk.
14Bot solid food, dat fa big people. Same way so, mo laanin fom God pon top ob dem fus trute, dat fa dem bleeba wa know wa ting good an wa ting bad, cause dey keep on da laan how fa tell um by dem ting wa dey da do wa right een God eye.