Alkitab Mobile SABDA
[VER] : [GULLAH]     [PL]  [PB] 
 <<  Kisah Para Rasul 1 >> 

1Deah Theophilus: Een de fus book dat A done write ya, A taak bout all wa Jedus beena do an all e beena laan people fom de time wen e staat e wok,

2til de day wen God tek um op ta heaben. Fo Jedus gone ta heaben, de Holy Sperit gii Jedus wod fa chaage dem postle dat e done pick an laan um wa fa do.

3Atta Jedus done suffa an come back fom mongst de dead, jurin foty day e appeah a heapa time ta e postle dem. Fom de way e appeah ta um, e postle dem ain doubt none tall dat e da lib gin. An weneba Jedus been wid um, e beena tell um bout how God rule.

4One time wen Jedus been nyam wid um, e chaage um say, “Mus dohn gone way fom Jerusalem. Wait yah til oona git wa me Fada promise oona, wa A beena tell oona bout.

5John done bactize people wid wata, bot een a leetle wile, God gwine bactize oona wid de Holy Sperit.”

Jedus Gone Op Eenta Heaben

6Wen de postle dem meet togeda wid Jedus, dey aks um say, “Lawd, dis yah de time wen ya gwine leh de people ob Israel rule gin?”

7Jedus tell um say, “Me Fada de onliest one dat hab tority fa say pazactly wa day o time all dem ting gwine happen. Oona ain spose fa know wen dem ting gwine be.

8Wen de Holy Sperit come pon oona, e gwine gii oona powa an oona gwine tell all bout me een Jerusalem, an all oba Judea an Samaria, an eben ta de fudares place een de wol.”

9Atta Jedus say dat, wiles de postle dem beena look at um, God tek um op eenta heaben. An de postle dem keep on da look op at Jedus til a cloud hide um.

10De postle dem still beena look op at de sky, wiles e da gwine, wen all ob a sudden dey see two man wa weah white cloes. Dey come stan op close ta um.

11De two man tell um say, “Oona wa come fom Galilee, hoccome oona da stan op dey, da look op at de sky? Dis Jedus yah dat God done tek way op eenta heaben, e gwine come back ta de wol jes like oona done shim wen e gone op eenta heaben.”

Dey Pick Matthias fa Tek Judas Place

12Den de postle dem come fom de hill wa name Mount ob Olib, an gone back ta Jerusalem. E bout haf mile fom de Mount ob Olib ta Jerusalem. De Jew Law say mus dohn waak mo den haf mile pon de Woshup Day.

13Wen dey git ta Jerusalem, dey gone op ta de opstair een de house, ta de room weh dey beena stay. De people wa been dey been Peter, John, James an Andrew, Philip an Thomas, Bartholomew an Matthew, James wa been Alphaeus chile, an Simon wa dey call De Patrot, an Judas wa been James chile.

14Dem postle yah, de ooman dem, an Mary, Jedus modda, an e broda dem, dey beena meet dey togeda all de time. An dey beena pray wid one haat.

15One day wen dem wa bleebe pon Jedus been geda togeda, bout one hundud an twenty people been dey. Peter stan op een de middle ob de people an staat fa taak ta um.

16E say, “Bredren, de Holy Sperit done taak ta David way back dey, an hab um write een God Book bout Judas, wa done come fa bring de people fa arres Jedus. An all dem ting wa David done tell, dey haffa come true.

17Judas done been one ob we an we all beena wok togeda fa God.”

18(Now den, wen dat man Judas sell Jedus, e done tek de money an gone an buy a fiel. Een dat fiel dey, Judas gone an faddown head fus. E belly buss open an e guts fall out an e done dead.

19All de people een Jerusalem yeh bout wa done happen ta Judas. So dey call dat place weh Judas dead, Akeldama, wa een dey language mean “Fiel weh Blood Drain Out.”)

20An Peter gone on fa tell de people say, “Dey done write bout Judas een de book ob Psalms say, ‘Dohn leh nottin be lef dey een e house. Dohn leh nobody lib dey.’ An dey write gin say, ‘Leh noda poson tek e place fa be a postle an do de wok wa e beena do.’

21“Cause ob dat, we haffa pick one man fa be wid we fa jine we da tell oda people dat Jedus done git op fom mongst de dead people an lib gin. We haffa pick one ob dem wa been dey wid we all de time wen de Lawd Jedus done trabel wid we, fom de time wen John beena bactize people til de time wen God tek Jedus op ta heaben.”

22(1:21)

23So den, dey pick two man. Dey pick Joseph, wa dey call Barsabbas (dey call um Justus too), an dey pick Matthias.

24Dey pray say, “Lawd, ya know all people haat. We aks ya fa sho we outta de two man yah wish one ya done pick

25fa be a postle an do dis wok wa Judas done lef wen e gone ta de place weh e blongst.”

26Den dey draw lots fa pick de one, so dey kin know wish one God wahn. Matthias name come out, so dey add um ta de leben postle.


  Share Facebook  |  Share Twitter

 <<  Kisah Para Rasul 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel