Alkitab Mobile SABDA
[VER] : [GULLAH]     [PL]  [PB] 
 <<  Kisah Para Rasul 13 >> 

Dey Sen Barnabas an Saul fa go do God Wok

1Een de Antioch choch dey been some prophet an some teacha dem. Dey been Barnabas, Simeon wa dey call Niger, Lucius fom Cyrene, Manaen wa done grow op wid de rula, Herod, an Saul.

2One day wen dey beena fast an woshup de Lawd, de Holy Sperit tell um say, “Oona mus set Barnabas an Saul apaat fa me, cause A done pick dem fa do a wok.”

3De Antioch choch people fast an pray. An atta dey done lay dey han pon Barnabas an Saul head fa bless um, dey sen um off fa do God wok.

Barnabas an Saul Go ta Cyprus

4De Holy Sperit done sen Barnabas an Saul ta a place dey call Seleucia. Den dey git a boat an sail ta de islant dey call Cyprus.

5Wen dey git ta Salamis, dey gone eenta de Jew meetin house an tell de people God wod. An John Mark been dey wid um fa hep um.

6Dey gone all de way cross de islant til dey come ta Paphos. An dey meet one root man dey wa name Bar-Jedus. E been a Jew dat call esef a prophet, bot e ain been real.

7Bar-Jedus beena stay longside de islant gobna. Dat gobna name Sergius Paulus, an e been a man wa hab sense. Now de gobna sen fa Barnabas an Saul, cause e wahn fa yeh God wod.

8Bot de root man Elymas (dat de Greek name fa Bar-Jedus) e gone ginst Barnabas an Saul. E try fa mek Gobna Sergius Paulus stop bleebe pon Jedus.

9Now Saul, wa dey call Paul too, e been full op wid de Holy Sperit. Saul gone an look haad at Elymas.

10E say, “Ya de debil chile! Ya fight ginst ebry good ting! Ya haat full op wid bad trick an ceitful ting. Ya ain neba gwine stop try fa change de Lawd true way eenta a lie, ainty?

11Now den, de Lawd done pit e han ginst ya. Ya gwine be bline. Ya ain gwine see de sunlight fa some time.” Same time Elymas eye kiba wid black mist. E staat fa wanda roun, da look fa somebody fa hole e han an lead um, cause e bline.

12Wen de gobna see wa happen, e bleebe pon Jedus. E been too stonish wen e laan fa true bout de Lawd.

Paul Dem Gone ta Antioch een Pisidia

13Paul dem lef Paphos. Dey git a boat an sail ta Perga een Pamphylia. Dey een Perga, John Mark lef Paul dem an gone back ta Jerusalem.

14Den Paul dem lef Perga an gone ta Antioch een Pisidia. Wen de Jew Woshup Day come, dey gone eenta de Jew meetin house an seddown.

15De people read fom de Law dat God gii Moses an fom wa de prophet dem done write. Den de rula dem ob de Jew meetin house sen wod ta Paul dem, tell um say, “Bredren, ef oona hab some wod fa courage de people, we wahn oona fa taak ta um.”

16Paul stan op. E mek sign ta de people wid e han fa mek um stop fa taak, an e tell um say, “Oona, me people ob Israel, an all oona wa ain no Jew bot oona woshup God, all ob oona mus listen ta wa A tell oona!

17De God ob dis Israel people done pick we ole people. Wen dey been down dey een Egypt lan, God bless um a whole heap. Den by e great powa, God bring de Israel people outta Egypt lan.

18An God pit op wid um fa bout foty yeah wen dey been dey een de desat.

19E stroy de people ob seben nation een Canaan lan. Den e gii e Israel people dat lan fa dem an dey chullun chullun fa dey own.

20All dat tek bout fo hundud an fifty yeah fo e all done happen. “Atta dat, God gii e Israel people jedge dem fa rule oba um, til de time wen de prophet Samuel come.

21Den de people aks God fa pick a king fa rule oba um. God gim Saul, Kish chile. E come fom Benjamin tribe. King Saul rule oba Israel foty yeah.

22Den atta God tek de powa way fom Saul, e pick David fa be king een Israel. God tell bout David say, ‘A done find David, Jesse chile, one man dat A heppy wid fa true. E gwine do all dat A wahn um fa do.’

23Jedus one ob David chullun chullun. An God pick um fa sabe e Israel people. Dat happen same like God done promise.

24Fo Jedus staat e wok, John beena preach, say ta de Israel people dey haffa change dey sinful way an dohn do um no mo, an come fa git bactize.

25Jes fo John finish op de wok dat God sen um fa do, e tell de people say, ‘Who oona tink A da? A ain de one dat oona beena look fa. Bot look yah! Dat one dey gwine come wen A done done de wok God sen me fa do. A ain wot nuff eben fa loose de sandal dat e weah pon e foot!’

26“Bredren, oona dat be Abraham chullun chullun an oona mongst we wa ain no Jew bot woshup God, listen op! Fa we God sen um, fa tell we bout dis sabation!

27De people dat lib een Jerusalem an dey leada dem ain been know who dat Jedus da. Dey ain know e come fa sabe um. Dey ain ondastan bout de wod dey beena read ebry Woshup Day, dem wod dat de prophet dem done write. Stillyet, wen de people done condemn Jedus, dey mek wa dem prophet done been write bout Jedus come true.

28De people ain find nottin bad dat Jedus done do fa mek um kill um. Stillyet, dey aks Pilate fa hab um kill Jedus.

29Wen dey done do all dat dem prophet done been write bout Jedus, dey tek um down fom de cross an pit um een a tomb.

30Bot God mek um lib gin an git op fom mongst de dead people.

31Jedus appeah plenty time ta de people dat done gone long wid um fom Galilee ta Jerusalem. Now, dem people yah beena tell oda Israel people all bout um.

32We come yah fa tell oona de Good Nyews, wa God done promise we ole people dat e gwine do,

33We dey chullun chullun, an God done do um fa we wen e mek Jedus git op fom mongst de dead people an lib gin. Like dey done write een de secon Psalm, God say, ‘Ya me Son. Taday A done come fa be ya Fada.’

34Dey done write een God Book bout how God been gwine fa mek Jedus lib gin an git op fom mongst de dead people, an dat God ain neba gwine leh Jedus body rot. Een e Book, God say, ‘A gwine gii oona dem holy blessin fa true, jes like A promise David.’

35An so God tell we too, een noda place een de Psalms say, ‘Ya ain gwine leh de body ob ya own Holy One rot.’

36Wen David done do wa God wahn um fa do, e done dead. Dey bury um close ta e ole people, an e body done rot.

37Bot de one dat God mek lib gin an git op fom mongst de dead people, e body ain rot tall.

38So den, bredren, A wahn fa mek oona know fa true dat we da tell oona say, dat cause ob Jedus, God paadon oona sin.

39A wahn fa mek oona know dat ebrybody wa bleebe pon Jedus, God da free um fom all dey sin dat Moses Law ain been able fa free oona fom.

40Oona mus tek cyah den, so dat wa de prophet dem done say ain gwine happen ta oona. Dem prophet say,

41‘Look yah, oona wa da laff bout wa God say: Oona gwine wonda, an oona gwine dead! Cause A gwine do a big wok een oona day. An eben wen dey tell oona wa dat big wok mean, oona ain neba gwine bleebe um!’”

42Now wen Paul an Barnabas beena come outta de meetin house, de people aks um fa come back de nex Woshup Day fa tell um mo bout wa dey jes beena taak bout.

43Wen dey all lef de meetin house, plenty Jew people gone long da waak wid Paul an Barnabas. An plenty people dat ain been Jew bot wa ton Jew an woshup God, dey gone long wid um too. Paul an Barnabas taak wid um an courage um fa keep on da trus een God mussy.

44De nex Woshup Day mos all de people een de city geda togeda fa yeh Paul an Barnabas tell um de wod ob God.

45Bot wen de Jew dem see all de crowd ob people, dey real jealous ob Paul an Barnabas. Dey say Paul da lie an dey hole um cheap.

46Paul an Barnabas ain been scaid tall fa tell God wod mo den eba. Dey ansa um say, “We been haffa tell oona Jew people de wod ob God fus, fo we tell de people dat ain Jew. Bot now dat oona ain wahn fa bleebe, oona done show dat oona ain fit fa hab life dat neba end. Cause ob dat, we gwine lef oona an now we gwine tell God wod ta de people dat ain Jew.

47De Lawd done gii we orda fa do dat. E tell we say, ‘A done pit oona like a light fa de people dat ain Jew, so dat oona gwine tell um de way ob God sabation all oba de wol, eben ta de place dat faa way, faa mo den all de odas res.’”

48Wen de people dat ain Jew yeh dat, dey been heppy fa true, an dey praise God wod. All de people dat God done pick fa hab life dat neba end, dey bleebe pon Jedus.

49De Lawd beena spread all oba dat arie.

50Bot de Jew dem stir op de big leada man dem een de city an de rich ooman dem wa woshup God. Dem Jew git um fa mek Paul an Barnabas suffa bad an dribe um outta dey arie.

51So den, Paul an Barnabas shake de dort off ob dey foot ginst um, fa sho dey ain gwine hab nottin fa do wid dem people een dat arie gin. Den dey gone ta Iconium.

52De bleeba dem wa waak een Jedus way een Antioch been fill op wid joy an wid de Holy Sperit.


  Share Facebook  |  Share Twitter

 <<  Kisah Para Rasul 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran