Dual PanelEen Malta
1Atta we reach de sho an nottin ain haam none ob we, dey tell we dat de islant name Malta.
2De people wa lib dey been real good ta we. E beena staat fa rain an de place been cole. So dey mek a fire fa we an gii we all a haaty welcome.
3Paul done geda a bundle ob stick. Wen e beena pit um pon de fire, a poison snake come outta de bundle cause ob de heat ob de fire. Dat snake bite Paul han an fasten dey.
4De people dat lib een de islant see de snake hangin fom Paul han, an dey tell one noda say, “Dis man yah done kill somebody fa sho. Cause eben dough e been sabe fom de wata, de god dey call Justice ain gwine leh um lib!”
5Bot Paul shake e han oba de fire an de snake faddown eenside. An Paul ain been haam eben one leetle bit.
6De people beena waitin fa see Paul swell op o jes faddown an dead all ob a sudden, cause ob de snake. Wen dey done wait a long time, dey see dat nottin ain happen ta Paul. So den, dey change dey mind an beena say, “Paul a god!”
7Publius been de head man een dat islant, an e hab a big faam close ta dey. E been heppy fa see we an tek we ta e house. We stop dey shree day an e tek good cyah ob we.
8Now Publius fada been sick een bed. E hab feba an diahrrhea. Paul gone eenta e room fa shim. Den Paul pray ta God fa de man an lay e han pon um, an God mek um well.
9Wen dat happen, de oda sick people een de islant come ta Paul. An dey been heal.
10Dey gii we lotsa ting fa sho dat dey spec we. Den wen we been ready fa sail, dey pit ting eenside de big boat. Dey gii we all wa we need fa git ta de oda side ob de wata.
Paul Dem Trabel fom Malta ta Rome
11Wen we been shree mont een Malta, we sail way een a big boat dat done been dey een Malta all de winta. Dey call de boat “de Twin God dem,” an e done come outta Alexandria.
12We git ta a city name Syracuse an stay dey shree day.
13Den we sail way fom dey an gone ta a city name Rhegium. De nex day de sout wind staat fa blow. An de day atta dat, we git ta Puteoli.
14We meet some Christian bredren dey. An dey aks we fa stay wid um one week fo we gone on. An dat de way we git ta Rome.
15De Christian bredren een Rome yeh dat we beena come ta Rome. So dey come faa as de Maakut ob Appius an a place name de Shree Bodin House dem fa meet we. Wen Paul see dem bredren dey, e tell God tankya an e tek courage.
Een Rome
16Wen we git ta Rome, dey ain pit Paul een de jailhouse. Dey leh um lib een a house by esef bot dey hab a sodja gyaad um.
17Atta shree day, Paul call de Jew leada dem een Rome fa come meet wid um. Wen dey done geda, Paul tell um say, “Bredren, A ain done nottin ginst we people. A ain done nottin ginst de way we Jew people lib, de way dat we ole people gii we. Bot jes de same, de Jew dem grab hole ta me een Jerusalem an mek me prisona. Den dey han me oba ta de Roman dem.
18Wen de Roman dem done jedge me case, dey beena wahn fa leh me loose. Cause dey see dat A ain done nottin fa mek um kill me.
19Bot de Jew dem fight ginst me, da say de Roman dem ain oughta leh me loose. So den A done haffa say dat A wahn de Roman rula Caesar fa jedge me. Bot A ain been hab no complaint fa mek ginst me own people, de Jew dem.
20Cause ob dat, A call oona fa see oona an taak wid oona. Fa true, dey chain me fa sake ob de one dat de Israel people da hope fa.”
21Dey ansa Paul say, “We ain git no letta fom Judea bout ya. An none ob we Jew bredren dat come fom dey ain tell we no nyews bout ya. Dey ain say nottin bad bout ya needa.
22Bot we wahn fa yeh wa ya bleebe, cause we know dat people all oba da taak bad ginst dis group dat ya done jine.”
23So dey cide pon a time fa come meet gin wid Paul. Wen de day come, lotsa people, eben mo den come fo, geda togeda fa meet wid um een de place weh e da stay. Paul taak fom maanin ta night, splain ta um an da tell um all bout how God rule. E read de Law dat God done gii Moses an dem ting dat de prophet dem done write, da try fa sho de people de trute bout Jedus.
24Some people bleebe dat Paul taak true, bot oda dem ain bleebe um.
25So dey ain gree mongst deysef an dey lef Paul place an gone pon dey way. Dat been atta Paul done say, “De Holy Sperit say de trute wen e tell de prophet Isaiah fa tell oona ole people.
26E Say, ‘Go tell dis people say: Oona gwine keep on da yeh, bot oona ain neba gwine ondastan. Oona gwine keep on da see, bot oona ain neba gwine know wa oona see.
27Cause dis people yah hab haad haat. Dey done lock op dey yea so dey ain yeh. An dey done shet dey eye so dey ain see. Cause dey ain wahn fa ondastan. Ef dey ain done like dat, dey might coulda see wid dey eye, an yeh wid dey yea an ondastan wid dey haat. Den dey would come ta me, God say, an A would heal um.’”
28An Paul tell de people say, “So den, A wahn fa mek oona know, God beena sen people fa tell dem dat ain Jew bout how e da sabe people. An dem dat ain Jew gwine listen!”
29Atta Paul say dis, de Jew dem lef, sputin plenty wid one noda.
30Fa all ob two yeah, Paul lib dey een a house dat e da rent. E gii haaty welcome ta all dem dat come fa shim.
31E beena tell um bout how God rule an laan um bout de Lawd Jedus Christ. E ain been scaid fa tell um out een de open, an nobody ain stop um.