Alkitab Mobile SABDA
[VER] : [GULLAH]     [PL]  [PB] 
 <<  Kisah Para Rasul 7 >> 

Stephen Taak ta de Council

1De head man ob de Jew priest dem aks Stephen say, “All dat wa dem people yah done say ginst ya, dat de trute?”

2Stephen ansa say, “Oona, me fada an me bredren, listen ta me! God wa hab glory an powa mo den all oda, e appeah ta we fada Abraham. Dat been wen Abraham da lib een Mesopotamia, fo e gone fa lib ta Haran town.

3God tell Abraham say, ‘Ya mus lef ya kin folk an come outta ya country. Haffa go ta a country dat A gwine show ya.’

4So Abraham come outta Chaldea an gone fa lib ta Haran. Atta Abraham fada been dead, God moob Abraham outta Haran an sen um ta dis lan weh oona da lib now.

5Stillyet, God ain gii Abraham no place dey fa be e own een dat time. E ain gii eben one foot ob groun fa esef. Bot e mek a cobnant wid um, promise um say, e gwine gim dat groun. An God promise um dat groun dey gwine be Abraham own propaty an de propaty ob Abraham chullun chullun atta Abraham done pass oba. Now Abraham ain hab no chullun yet wen God tell um dat.

6God tell Abraham like dis, ‘Abraham, ya chullun chullun gwine lib een noda lan wa blongst ta oda people. An dem people een dat oda lan gwine mek ya chullun chullun slabe. Dey gwine do um bad an mek um suffa fa fo hundud yeah.

7Bot A gwine jedge de nation wa mek um slabe. Den ya chullun chullun gwine come outta dat slabe life an dat oda lan. Dey gwine come yah ta dis place an woshup me.’

8God tell Abraham fa circumcise e son dem pon de eight day atta dey bon. God say dat wen Abraham circumcise um, dat show dat God done been mek dat cobnant fa true wid Abraham. So wen Abraham hab a son, wa e name Isaac, Abraham circumcise um pon de eight day atta e bon. An atta wile, wen Isaac hab a son, wa e name Jacob, e circumcise um pon de eight day atta e bon. An wen Jacob hab e tweb son, e circumcise um. Dem we own ole people leada wa staat de tweb tribe een we Jew nation.

9“Now den Joseph broda been jealous ob um. Cause ob dat, dey done sell um fa slabe een Egypt lan. Bot God been dey wid Joseph.

10God beena hep Joseph all de time wen trouble hab um. E sabe um outta e fliction. Wen dey tek Joseph an gone fo Pharaoh, de king ob Egypt, God bless Joseph an gim sense an fabor een Pharaoh eye. So Pharaoh mek Joseph gobna fa rule oba Egypt. An e mek um de rula oba Pharaoh own house.

11Den famine come eenta all ob Egypt lan an Canaan lan. Plenty people suffa fa true. An we ole people ain been able fa find nottin fa nyam.

12Wen Jacob yeh say dat grain stillyet dey een Egypt, e sen e chullun dem wa come fa be we ole fada. Jacob sen um dey fa buy food. Dat been de fus time e chullun gone dey.

13De secon time wen dey gone ta Egypt lan, Joseph tell e broda dem who dat e been, an King Pharaoh come fa know bout Joseph fambly.

14Den Joseph sen wod ta e fada Jacob fa aks um fa come ta Egypt lan wid all de fambly. Dey been sebenty-fibe people een de fambly.

15Jacob gone down ta Egypt. Dey een Egypt, e an all e chullun, we ole people, dey beena lib dey til all done dead.

16Dey cyaa dey dead body an gone bury um back een Shechem een de tomb dat Abraham done buy fom Hamor son dem.

17“Wen de time done beena come close fa God fa do wa e done promise Abraham, de mount ob we ole people een Egypt lan beena grow an multiply mo an mo.

18An oda king dat ain been know Joseph staat fa rule oba Egypt.

19Dis nyew king yah tek wantage ob we people an e mek we people suffa bad. E mek we people chunk dey baby chullun outdoor, so dat dem chullun gwine dead.

20Dat same time dey, Moses bon. E been a real fine chile. E modda an e fada tek cyah ob um an hide um een dey house fa shree mont.

21Den wen dey done pit Moses outdoor, Pharaoh daughta tek Moses an dopt um an mind um like e own son.

22Dey laan Moses all wa de Egypt people know, all dey sense. An e been a great man wa beena know fa true how fa taak an cyaa esef.

23“Wen Moses been foty yeah ole, e mek op e mind fa go see e bredren, de Israel people.

24Wen e dey, e see a Egypt man da do bad ta a Israel man. So Moses gone an fight fa de Israel man, an e kill de Egypt man.

25Moses been tink dat e bredren gwine ondastan dat God sen um fa hep um an set um free fom slabery. Bot dey ain ondastan bout dat.

26De nex day, Moses see two Israel man da fight. E gone fa paat um an git um fa mek peace wid one noda. E tell um say, ‘Listen yah, oona two broda, hoccome oona da fight, an do bad ta one noda?’

27Bot de man wa beena do bad ginst e Israel broda tell Moses say, ‘Who mek ya a rula an a jedge oba we?

28Ya wahn fa kill me same like how ya done kill dat Egypt man yestiddy, ainty?’

29Wen Moses yeh wa dat man say, e ron way, an gone outta Egypt lan. E gone fa lib een a lan name Midian. E been a come-yah poson dey, an e hab two son.

30“Now den, wen foty yeah done pass, one angel come ta Moses een de desat close ta de high hill name Mount Sinai. De angel been dey eenside de fire dat beena come outta a bush.

31Wen Moses see dat, e da wonda tommuch. E gone close fa look good at um, an e yeh de boice ob God de Lawd da taak ta um say,

32‘A de God dat ya ole people beena woshup. A de God dat Abraham, Isaac an Jacob beena woshup.’ Wen Moses yeh dat, e tremble, cause e real scaid so dat e ain eben shrow e eye op fa look.

33De Lawd tell um say, ‘Tek ya shush offa ya foot, cause de place dey weh ya da stan, dat holy groun.

34Fa true A see de bad fliction ob me people dey een Egypt lan. A yeh um da groan an A done come down fa sabe dem fom suffa. Come on yah! A gwine sen ya back ta Egypt.’

35“Now den, dat de same Moses dat de Israel people ain beena wahn, wen dey aks um say, ‘Who mek ya a rula an a jedge oba we?’ God esef sen dat Moses fa rule oba dem people an e gwine sabe um. An God nyuse de angel dat come ta Moses fom eenside de fire dat beena come out fom de bush, fa tell Moses.

36Den Moses lead de people outta Egypt lan. An God do plenty miracle an wondaful wok een Egypt lan an at de Red Sea an een de desat lan weh dey beena lib fa foty yeah.

37Dat de same Moses dat tell de Israel people say, ‘God gwine tek one ob oona own people an mek um a prophet, same like e done ta me.’

38Dat de Moses dat been dey wid de Israel people wen dey beena geda een de desat. E been dey wid we ole people an wid de angel wa taak ta um pontop Mount Sinai. God gim e message wa gwine lib fa eba, fa gii we.

39“Bot we ole people ain do wa Moses tell um fa do. Dey ton dey back pon um, an een dey haat dey beena wahn fa go back ta Egypt lan.

40Dey tell Aaron say, ‘Mek we some god dem fa lead de way fa we. Dat man Moses dat done bring we outta Egypt lan, we ain know wa happen ta um.’

41Dat de time wen dey mek ting wa look like a calf fa woshup an dey offa sacrifice ta dat idol. Dey hab feas an mek merry fa sake ob dat ting wa dey deysef done mek.

42Bot den God ton e back pon de Israel people. E lef um fa woshup dem ting wa dey een de sky, like de staa an de moon. Dat stan same like dey say een de book dat prophet dem done write. Dey say: ‘Oona Israel people yah, e ain been fa me dat oona beena kill dem animal an sacrifice um jurin de foty yeah wen oona been dey een de desat, ainty?

43Oona beena tote de tent dat keep dat god name Molech, an de ting dat oona mek dat look like de staa ob oona god Rephan. Oona mek dem idol fa woshup um. So den, A gwine git people fa tek oona faaway, way pass Babylon.’

44“Wen we ole people been dey een de desat, dey hab de tent wa show dat God dey long wid um. God done been tell Moses how fa mek dat tent dey, an dat how e mek um. Moses folla de pattan dat God done been show um.

45We ole fada dat been dey fus, dey done dead an lef dey tent ta we fada. An dey tote um wen dey gone wid Joshua an tek oba de lan fom dem oda nation dat God done dribe outta dey fo Joshua an de people dem. De tent been dey een dat lan til de time wen David beena rule.

46God been heppy wid David, an David aks God fa leh um build a house fa um, de God dat Jacob woshup.

47Bot King Solomon de one dat done build dat house fa God.

48“Stillyet, God wa dey oba all de wol an wa hab powa mo den all oda, e ain lib eenside dem house wa people mek. Jes like de prophet done write, wen e say,

49De Lawd say, ‘Heaben de place weh A seddown an rule, An pon de wol weh de people lib, A pit me foot. So wa kind ob house ya wahn fa build fa me? Weh de place weh A gwine res?

50Ain me han mek all dem ting yah?’

51“Oona got haad haat fa true! God ain dey een oona haat, an oona ain da pay no mind ta wa God say! Oona jes like oona ole people. Oonasef ain neba gree fa do nottin dat de Holy Sperit tell oona fa do!

52Dey ain neba been no prophet dat oona ole people ain mek suffa, ainty? Dey eben kill dem prophet dat God sen fa tell bout de One wa Do wa Right All de Time. Dey done tell we fada, say e gwine come. Now, oona done han dat One wa Do wa Right All de Time oba ta we enemy dem, an oona kill um.

53God done gii oona e law wa angel bring oona. Stillyet, oona ain do wa de law tell oona fa do!”

Dey Kill Stephen

54Wen de leada dem een de Jew Council yeh wa Stephen say, dey mad down an dey suck dey teet at um.

55Bot Stephen been full op wid de Holy Sperit. E look op eenta heaben an e see God glory da shine an Jedus da stan pon God right han side.

56Stephen tell de people say, “Look! A see heaben open op an A see de Man wa Come fom God da stan op pon God right han side!”

57Wen dey yeh Stephen say dat, de people kiba dey yea wid dey han. Dey holla real loud. An dey all rush togeda pon Stephen.

58Dey drag um outta de city an den dey chunk stone pontop um. An dem wa beena stone um, dey pull off dey coat an pit um down ta de foot ob one nyoung man name Saul fa keep fa um.

59Wiles dey beena stone um, Stephen da pray say, “Lawd Jedus, tek me sperit!”

60Den e kneel down pon de groun an pray een a loud boice say, “Lawd, paadon dem people fa dis sin yah wa dey done!” Wen e done pray dat, e done dead.


  Share Facebook  |  Share Twitter

 <<  Kisah Para Rasul 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran