Dual Panel1A, Paul, wa God pick fa be a postle ob Christ Jedus, an Timothy, we Christian broda.
2We da write ta God people een Colosse, we bredren wa true ta God cause dey come fa be one wid Christ. We aks God we Fada fa bless oona an gii oona peace een oona haat.
We Tell God “Tankya” Wen We Pray fa Oona
3All de time wen we pray fa oona, we tell God de Fada ob we Lawd Jedus Christ “Tankya.”
4We tank um cause we how oona trus een Christ Jedus an how oona lob all God people.
5Cause fo, wen dey tell oona de true wod, de Good Nyews, oona yeh dat God da keep safe fa oona een heaben wa oona da wait fa. An wen oona know fa sho dat oona gwine git wa oona da wait fa, dat mek oona trus een Jedus Christ fa true an lob God people.
6De Good Nyews da spread all oba de wol an e da keep on da wok an da grow, da git mo an mo people fa bleebe an do good, jes like a fruit tree keep on da beah good crop. Same way so, fom de day wen dat Good Nyews reach oona, oona yeh an ondastan fa true how God show e blessin pon oona.
7Oona laan dis fom Epaphras, wa we lob an wa da do Christ wok long side we. E faitful bout de wok wa e da do fa Christ fa hep oona.
8E done splain ta we how God Sperit da gii oona lob fa oona Christian bredren.
9Cause ob dat, fom de day wen we yeh bout oona, we ain neba stop fa pray fa oona an da aks God fa oona. We aks um fa mek e Sperit gii oona sense an mek oona ondastan all bout um, so dat oona gwine know all wa God wahn oona fa do.
10We da aks God fa dat cause den oona gwine be able fa lib like God people oughta lib an all de time oona gwine do wa mek God heppy. Oona gwine lib da do all kind ob good wok an know God mo an mo.
11We da pray dat God, wid all e powa, mek oona git scrong mind an haat so dat oona gwine be able fa beah all ting, da mek no complaint, no matta wa happen, an wid a heppy haat.
12Oona mus tell we Fada God “Tankya,” cause e mek we fa be people wa fit fa git we paat ob wa e promise fa gii e people, wen e da rule een de light.
13Cause God done pull we outta we sinful way wa beena git powa oba we an mek we lib een de daak. An God done bring we fa come safe fa lib onda e Son powa, e Son wa e lob fa true.
14God Son, e de one wa set we free fom sin powa oba we, wen e shed e blood pon de cross. E done paadon we.
Christ an de Wok E Do
15Ain nobody kin see God. Bot wen we see wa Christ like, we see xactly wa God like. God ain mek nottin fo Christ been dey. Christ fus been dey an Christ oba all dat God mek.
16Shru Christ, God mek all e mek, all wa dey een heaben an een dis wol, wa people kin see an wa people ain able fa see. E mek dem sperit, dem wa got powa an hab trone, dem wa da rule an wa hab tority. Shru Christ, God mek all. An e mek um all fa gii hona ta Christ.
17Christ been dey fus. God ain mek nottin fo Christ dey. An Christ da keep on da mek um all stay een dey place weh dey spose fa stay.
18Christ de head ob de body, de choch. E da gii de body life. E fus been dey, de fus wa God mek git op fom mongst de dead an lib gin, so dat jes e an nobody else would hab fus place oba all.
19Cause e Fada God been heppy fa lib een Christ, da mek um all dat God da.
20An shru e Son Christ, God heppy fa bring all wa een dis wol an all wa een heaben, leh um all come back ta esef. God mek peace wid all, shru Christ, wen Christ shed e blood an dead pon e cross.
21Fo oona bleebe pon Christ, oona done ton way fom God. Oona been e enemy cause ob de sinful ting oona beena tink an do.
22Bot now Christ done come as a man an done dead pon de cross. Cause ob dat, God bring oona ta esef an mek oona e fren, so dat wen oona stanop fo um, oona gwine be holy. Oona ain gwine hab no no sin tall, an oona ain gwine hab no blame fa nottin.
23Bot oona mus keep on da bleebe de Good Nyews fa sho. Mus dohn doubt God eben a leetle bit. Oona mus dohn leh nobody ton oona way fom da hope fa de ting dem wa de Good Nyews mek oona hope fa. Dis de Good Nyews dat oona yeh, an dat all people een de wol beena yeh. An, A, Paul, da keep on da wok fa tell people dat Good Nyews.
Paul Wok fa de Choch
24Now A da suffa fa oona an A heppy fa dat. Cause by de pain wa A da suffa een me body, A da hep finish op wa still lef ob Christ suffrin fa de sake ob e body, de choch.
25God pik me fa saab de choch so dat A could tell oona all de wod dat God gii me.
26Fo now, all de time, God ain leh nobody een de wol know dis wod yah. Bot now e da tell um ta e own people.
27God wahn fa mek e own people know e wod dat nobody ain neba know fo, dis too special wod dat e wahn all people fa yeh. Dis great wod yah da dat Christ da lib dey eenside oona haat an oona gwine hab a paat een God glory.
28So den, we da tell all people bout Christ. Wid all de sense God gii we, we da waan um wa dey ain oughta do an laan um wa dey oughta do, so dat all ob um kin know all dat God wahn um fa do, an dey gwine wahn fa do um wid all dey haat. Een dat way, de kin be one wid Christ fa true.
29Dis de ting A da wok haad as A kin fa do. An A da nyuse all de great powa wa dey eenside me, wa Christ gii me. Dat mek me able fa do wa A da do.