Alkitab Mobile SABDA
[VER] : [GULLAH]     [PL]  [PB] 
 <<  Kolose 4 >> 

1Oona bossman, oona oughta do wa right an good fa oona slabe dem cause oona memba dat oona, too, sponsible ta a Lawd een heaben.

Paul Tell We Mo Ting fa Do

2Oona mus keep on da pray all de time. Pit oona haat pon dem ting wa oona da tell God an tell um tankya.

3An weneba oona da pray, pray fa we too, so dat God gwine gii we chance fa tell people de wod bout Christ, dat de people ain neba yeh fo. A dey een de jailhouse now een chain cause A tell people dis wod yah.

4Pray fa me, so dat A gwine be able fa tell dis wod jes like A oughta do an mek um plain so dat people gwine ondastan um.

5Wen oona wid people wa ain trus een Christ, oona oughta do all ting wid sense. Ebry chance oona git, oona mus show um dat oona da lib Christ way.

6Wen oona da taak wid um, oona oughta taak een a way wa gwine mek um glad fa yeh oona wod an wa gwine mek um wahn fa yeh mo. An oona gwine come fa know how fa ansa ebry one ob um.

De Bredren Sen Dey Greetin

7Tychicus, we deah Christian broda, gwine tell oona all wa da happen ta me. E a helpa wa we trus, an e da saab de Lawd long side we.

8A da sen um ta oona so dat e kin tell oona wa da happen yah ta all ob we an so dat e kin courage oona.

9E gwine come ta oona long wid we deah broda Onesimus, wa we trus an wa blongst ta oona group. E an Tychicus dey gwine tell oona all wa da happen yah.

10Aristarchus, wa dey yah een de jailhouse wid me, an Mark, de cousin ob Barnabas, dey tell oona hey. A done tell oona fo bout Mark, dat ef e come ta oona, oona oughta gim hearty welcome.

11Jedus, wa people call Justus, da tell oona hey too. Ob all dem wa da wok wid me yah, jes dem shree an no mo, dey Jew wa trus een Christ an wa da wok long side me fa bring bout de time wen God gwine rule oba all. Dem shree beena courage me plenty.

12Epaphras, wa blongst ta oona group too, an wa da saab Christ Jedus, e da tell oona hey. All de time e da pray fa oona wid all e haat. E da pray dat oona ain neba gwine stop fa trus een God. Oona gwine stand scrong fa um een all ting an know fa sho bout all e wahn.

13A know dat Epaphras beena wok plenty fa hep oona an dem people een Laodicea an Hierapolis.

14We deah fren Luke, de docta, an Demas, dey tell oona hey.

15Say hey ta we Christian bredren een Laodicea, long wid Nympha an de choch people wa meet een e house.

16Wen oona done read dis letta, oona mus mek sho dat de choch people een Laodicea read um too. An oona mus read de letta dat A done write an sen ta dem een Laodicea.

17Tell Archippus say, “Ya mus mek sho dat ya do all de wok wa de Lawd gii oona fa do.”

18Wid me own han, A da write dis paat: A, Paul, da tell oona hey. Oona mus dohn fagit dat A dey yah een de jailhouse een chain! A pray dat God bless oona.


  Share Facebook  |  Share Twitter

 <<  Kolose 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel