Alkitab Mobile SABDA
[VER] : [GULLAH]     [PL]  [PB] 
 <<  Lukas 12 >> 

Mus Dohn Be Hypicrit

1Same time, a great big crowd ob many tousan people come fa yeh Jedus. Dey beena crowd op togeda so, til dey beena step on top one noda. Fus Jedus laan e ciple dem. E tell um say, “Mus dohn be no hypicrit like dem Pharisee. Mus dohn fool op wid dem hypicrit. Wa de hypicrit do stan like yeast mix op een flour. E all kiba op an e da spread all oba eenside de flour.

2Waeba kiba op gwine be onkiba. Waeba people do een secret, ebrybody gwine know bout um.

3Waeba oona beena taak bout een de daak ob de night, people gwine yeh ebryting oona done say. Dey gwine yeh um een de broad day light. Waeba oona beena taak bout ondaneet oona bret eenside a room een de house, oona gwine yeh ebrybody da holla um, da tote de nyews outside een de screet.”

Mus Feah God

4“Me fren, A tell oona, mus dohn be scaid ob people wa able fa stroy oona body. Cause dey ain able fa do no mo den dat. Dey cyahn do nottin tall bout oona soul. So mus dohn be scaid ob dem people.

5A gwine leh oona know head ob time who dat oona mus be scaid ob. Mus feah God. Cause wen e done mek somebody dead, e hab powa fa punish um atta dat, fa shrow dat poson soul eenta hell. Yeh, fa true, oona mus feah God!

6“De sparra wot leetle ob nottin. Fibe ob dem cost bout two cent, ainty? Eben so, God dohn neba fagit bout none dem sparra, none tall.

7Oona way mo walyable den a whole heapa sparra. De Lawd God done count ebry scran ob hair on oona head, an e know eben hommuch hair oona got. So den, mus dohn be scaid ob people. God da tek cyah ob oona!”

Mus Tell People Oona Blongst ta Jedus

8Jedus tell um say, “Fa true, anybody wa tell people dat e blongst ta me, de Man wa Come fom God gwine tell God angel dem say, ‘Dat poson dey blongst ta me.’

9Bot anybody wa tell people say, e ain blongst ta me, A gwine tell God angel dem say, ‘Dat one dey ain blongst ta me!’

10“Anybody wa taak ginst de Man wa Come fom God, God kin fagib um, bot anybody wa say ebil ting ginst de Holy Sperit, God neba ain gwine fagib um.

11“Wen dey ketch oona fa cyaa oona fa jedge oona een de Jew meetin house fa cleah oona name, an dey cyaa oona een front ob de leada dem an tority dem, mus dohn fret bout how oona gwine ansa dem o wa ting oona gwine say.

12Cause dat same time, de Holy Sperit gwine tell oona wa ting oona spose fa say.”

We True Life Ain Medja by de Ting We Hab

13One man dey een de crowd tell Jedus say, “Teacha, me fada done dead. A wahn ya fa tell me broda fa wide wid me de propaty wa fada lef fa we.”

14Jedus ansa de man say, “Look yah, man, ain nobody sen me fa be no jedge, needa fa be de one fa wide op propaty tween oona.”

15Den Jedus tell all de people say, “A da tell oona head ob time, mus dohn hab de big eye bout nottin. Cause, we true life ain medja by de ting we got, eben ef we got a whole heapa ting.”

16Den Jedus tell um a paable, say, “One time, one man hab a heapa ting. E hab faam wa mek good crop.

17E study e head, e tink say, ‘Wa A gwine do? A hab sommuch a crop, A ain hab no place fa pit all ob um.’

18E tink say, ‘A know wa fa do. A gwine teah down me ole baan an build um mo bigga. A gwine pit all me grain an ting een dey.

19Wen A done do dat, A gwine tell mesef say, ya got plenty ting pit back, all de good ting ya gwine need fa plenty yeah fa come. Now den, ya ain need fa warry bout nottin. Mus jes nyam an drink an pledja yasef!’

20God tell de man say, ‘Ya fool! Dis night yah, A gwine tek ya life. Den who gwine git all dem ting yah dat ya beena pit back, keep fa yasef?’

21“Dat how e stan fa de people wa jes da pile op plenty ting fa deysef. Dey sho ain rich een de ting dat count fa true wid God.”

Mus Dohn Fret Bout How Oona Gwine Lib

22Jedus tell e ciple dem say, “So den, A tell oona say, mus dohn warry bout how ya gwine lib, wa ya gwine nyam, needa wa cloes ya gwine weah pon ya body.

23Cause ya life bery walyable way mo den sompin fa nyam. An ya body walyable way mo den cloes.

24Now den, leh we study bout dem crow. Dey ain plant no seed, needa geda crop. Dey ain hab no conehouse, needa no baan fa keep wa dey geda. Stillyet, God da feed um! Oona way mo walyable den de bod!

25An fa true, ain nary one ob oona kin grow a bit talla cause e da warry bout um, ainty?

26Ef ya ain able fa do leetle ting like dat, hoccome ya da warry bout de oda res?

27An leh we study bout de lily wa da grow wile. Dey ain wok, needa mek cloes fa deysef. Now, A da tell oona, King Solomon been real rich, an e hab fine fine cloes. Stillyet, eben Solomon ain neba hab cloes fa dress purty an fine like dem lily wa da grow wile.

28God de one dat gii cloes ta de wile grass, mek um purty an fine. An dat grass dey taday an e gone demarra. People cut um down an nyuse um fa mek fire een dey oben. Ef God dress op de wile grass like dat, fa true e gwine do way mo den dat fa mek sho oona hab cloes fa weah. Sho nuff oona ain bleebe God wid all oona haat!

29Mus dohn fret yasef bout wa ya gwine nyam an wa ya gwine drink. Mus dohn warry bout um tall.

30De people dat ain bleebe pon God, dey da warry all de time bout dem ting. Bot God oona Fada, an e know oona haffa hab sompin fa nyam an drink an cloes fa weah.

31Stead ob warry bout dem ting, ya mus study bout de ting wa mean sompin ta God, an leh God rule een ya life. Den God gwine gii ya all dem oda ting yah, too.”

Tredja Een Heaben

32“A de shephud, an oona me leetle flock. Oona ain many, bot mus dohn fret. Cause God oona Fada, e glad fa mek oona rule wid esef.

33Oona mus sell ebryting wa oona hab an mus share de money, gii ta de people wa ain got nottin. Dat how ya gwine git God good ting fa oonasef. Like money wa dohn neba ron out, ya gwine hab ya tredja een heaben, weh e gwine stan faeba. Cause tief ain able fa tief um dey, an no moth kin stroy um.

34Mus hab ya tredja een heaben. Cause wehsoneba ya keep dem ting wa ya tredja, dat weh ya haat gwine be.”

Be Ready All de Time

35“Ya mus be ready fa waeba da come. Mus fix ya cloes so ya ready fa wok. Mus light ya lamp, an mus dohn leh um go out.

36Oona mus stan like a wokman wa da wait fa de man e wok fa fa come back fom a marryin feas. E da wait so dat weneba e massa come home an knock, e ready an kin open de door fa um.

37Dem wokman gwine be bless fa true dat ready an ain sleep wen de man dey wok fa come home! A da tell oona fa true, de man dey wok fa gwine fix e cloes so e ready fa wok, an e gwine call e wokman dem, mek um come seddown ta de table. E gwine saab um, gim sompin fa nyam.

38Dem wokman gwine be bless fa true. Dey gwine be bless eben ef de man dey wok fa come een de middle ob de night, o ef e come jes fo de roosta crow. Dey gwine be bless ef e find um ready!

39Oona mus know dat ef de man wa own a house beena know wen de tief gwine come ta um, dat man ain gwine sleep. E ain gwine lef e house. E gwine stay dey, an de tief ain gwine broke een an go eenside.

40Same fashion, oona too mus be ready all de time. Cause de Man wa Come fom God gwine come back ta dis wol wen oona da tink say, ‘E ain da come now.’”

De Wokman Wa Do Wa E Spose fa Do

41Peter aks Jedus say, “Lawd, dis paable dat ya jes tell, ya tell dat fa we ciple o fa all de people?”

42De Lawd ansa say, “Who dat wokman wa got plenty sense an wa true ta de man e wok fa? E de one dat de bossman gwine gii chaage oba all dem een e house wen de bossman gwine off. De bossman chaage dat wokman fa sho de oda wokman dem all de ting dey fa do. An dat wokman een chaage gwine wide op de food fa dem fa nyam wen e spose.

43Dat wokman gwine be bless fa true, wen de bossman come home, ef e find um da do dem ting wa e done tell um fa do.

44A da tell oona fa true, de bossman gwine gim chaage oba all e propaty an ting.

45Bot wa gwine happen ef dat wokman een chaage tink say, ‘Fa long time now, me bossman ain come back.’ Den e staat fa beat op on all dem man an de ooman dem all two. An de wokman een chaage jes a nyam an drink an git dronk.

46Ef dat wokman een chaage ain do wa e spose fa do an e mistreat de oda wokman dem, one day e bossman gwine come back home wen dat wokman leas spect um. De bossman gwine whip dat wokman real bad. E gwine mek um suffa jes like de people dat ain bleebe God.

47“Any wokman dat know wa e bossman wahn um fa do, bot e ain git esef ready an e ain do um, e gwine git whip good fashion.

48Bot de wokman dat ain know wa e bossman wahn um fa do an stillyet do ting wa mek de bossman whip um, e bossman ain gwine whip um bad. God spect plenty fom de poson wa e done gii plenty ta. E spect de mores fom de poson wa e done gii de mores ta.”

Cause ob Jedus People Ain Gwine Gree

49Jedus say, “A come fa bring fire dat gwine bun on de eart. An A wish wid ebryting een me dat e done staat fa bun now.

50A haffa go shru a bactism ob suffrin. An A got a burden fa dis ting til A done oba dat suffrin.

51Oona tink say, A come fa bring peace ta de people een de wol, ainty? No, A da tell oona, dat ain hoccome A come yah. Cause A come, people ain gwine gree wid one noda. Dey gwine tek side ginst one noda an wide op.

52Fom now on, a fambly wa got fibe people een um gwine fight ginst one noda an wide op. Shree people wid me gwine fight ginst de oda two een de fambly. An two people wid me gwine fight ginst de oda shree.

53Dey gwine wide op. De fada gwine fight ginst e son, an de son gwine fight ginst e fada. De modda gwine fight ginst e daughta, an de daughta gwine fight ginst e modda. De moda-een-law gwine fight ginst e daughta-een-law, an de daughta-een-law gwine fight ginst e moda-een-law.”

Oona Oughta Know wa Dese Time Mean

54Jedus tell de crowd say, “Wen oona see de cloud da rise op oba yonda een de west, tareckly oona know say, ‘E gwine be bad weda,’ an e be bad weda fa true.

55An wen oona feel de sout wind da blow, oona know say, ‘E gwine git hot,’ an e git hot fa true.

56Oona hypicrit! Oona know how fa look ta de eart an ta de eliment an tapetate bout de weda. Den hoccome oona ain know wa dem ting mean bout me wa be yah een dis wol now? Fa true, oona ain wahn fa know, ainty?”

Settle Quick wid de One Wa Ginst Ya

57“Hoccome oona ain jedge fa oonasef wa ting right fa do?

58Ef anybody aagy wid one ob oona an e da tek ya ta court, ya mus try fa settle wid um fo ya git dey. Cause ef ya ain able fa settle wid um, e gwine drag ya ta de jedge. An de jedge gwine gii ya ta de police, an e gwine tek ya ta de jailhouse.

59Ef dat so e stan, A tell ya, ya gwine stay een de jailhouse til ya pay de las cent ob de fine wa ya owe.”


  Share Facebook  |  Share Twitter

 <<  Lukas 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran