Alkitab Mobile SABDA
[VER] : [GULLAH]     [PL]  [PB] 
 <<  Lukas 24 >> 

Jedus da Lib Gin

1Real aaly een de maanin de fus day ob de week, fo day clean, de ooman dem tek de spice wa dey done beena mix op an gone ta Jedus tomb.

2Wen dey git ta de tomb, dey see dat de stone wa done beena kiba de door ta de tomb done been roll back.

3So dey gone eenside, bot dey ain find de Lawd Jedus body.

4Dey da wonda bout wa done happen, wen all ob a sudden, dey see two man come stan op by um. Dem man hab on bright cloes wa da shine.

5De ooman been real scaid, an dey bow dey head down ta de groun. Bot de man dem tell um say, “Oona ain oughta look yah mongst de dead people fa a man wa da lib, ainty?

6Jedus ain yah. E done git op fom mongst de dead, an e da lib gin! Oona memba wa e done tell oona wen e been dey wid oona een Galilee.

7E say, ‘Dey gwine grab hole ta de Man wa Come fom God an han um oba ta wicked people wa gwine kill um on a cross. Atta shree day e gwine git op fom mongst de dead an lib gin.’”

8Den de ooman dem memba all dat wa Jedus done tell um.

9Dey lef de tomb an gone back ta town an tell de leben postle an all de oda people wa done beena waak wid Jedus fo. Dey tell um all wa done happen.

10Dem ooman been Mary Magdalene, Joanna, an Mary, James modda. Dem an de oda ooman dem wa been dey wid um tell de postle dem wa done happen.

11Bot de postle dem ain bleebe dem ooman, cause wa dey say ain mek no sense ta um.

12Bot Peter git op an ron ta de tomb. Wen e git dey, e bend down an look eenside. E jes see de linen grabe cloes wa dey done beena nyuse fa wrop op Jedus body dey, nottin mo. Den Peter gone back home, da wondrin wa done been happen.

Jedus Waak ta Emmaus wid Two ob Dem wa Done Folla Um Fo

13Dat same day, two man wa done folla Jedus fo, dey beena gwine ta a settlement name Emmaus. Fom Jerusalem ta dat settlement been bout seben mile.

14De two man beena taak bout all dem ting wa jes happen een Jerusalem.

15Wiles dey da taak togeda, Jedus esef come nigh ta um an waak long side um.

16Dey shim, bot fa some reason dey ain recognize who e been.

17Jedus aks dem say, “Wa oona da taak bout togeda wiles oona da waak long?” De two man stop an stan still, an dey look too sad.

18One dem wa name Cleopas ansa Jedus say, “Ya mus be de onliest man wa da lib een Jerusalem an ain know wa done happen dey een dem day wa jes gone, ainty?”

19Jedus aks dem say, “Wa ting?” Dey say, “Dem ting wa happen ta Jedus fom Nazareth. E been a great prophet wa taak fa God. E hab powa fa do miracle an fa taak great ting. Dat show dat e hab fabor wid God. An e hab fabor wid all de people too.

20De leada dem ob de Jew priest an we rula dem done tek Jedus an han um oba ta de Roman Gobna Pilate, mek um condemn um fa dead. An de sodja dem done nail um ta de cross an kill um.

21We done beena hope dat Jedus woulda been de one dat God done sen fa come free Israel! On top ob dat, taday mek shree day since all dat done happen.

22An on top ob all dat, some we ooman dem stonish we tommuch. Dey gone ta de tomb aaly dis maanin.

23Bot dey ain find Jedus body dey een de tomb. Wen dey come back, de ooman dem tell we dat dey done see a bision ob angel dem fom God dey. De angel dem tell um dat Jedus da lib.

24Den some we people dat been wid we gone ta de tomb. An dey find um jes like de ooman dem done beena tell we. Bot dey ain see Jedus.”

25Jedus tell um say, “Oona ain got no sense. Een oona haat oona ain wahn fa bleebe all dat de prophet dem wa taak fa God done say!

26De Messiah haffa suffa dem ting yah an den go ta heaben an hab e paat een God glory, ainty?”

27An Jedus splain ta de two man. E staat wid Moses an all de prophet dem, tell um wa dey done beena say bout Jedus wen dey write een God Book. Jedus laan um fom all God Book bout esef.

28Wen de two man done git close ta de settlement weh dey beena gwine, Jedus mek like e been gwine on.

29So de man dem beg um fa stay obanight wid um. Dey tell um say, “Stay yah wid we. Cause de day mos gone an de night da come soon.” So Jedus gone fa stay wid um.

30Wen e git ta de table fa nyam wid um, Jedus tek de loaf ob bread an tank God fa um. Den e broke op de bread an gim dey piece.

31Same time Jedus do dat, e been like de man dem eye been open op, an dey recognize dat Jedus esef dey wid um. Bot den Jedus jes disappeah an dey ain shim.

32De two man say ta one noda, “Wiles e beena taak ta we, wen we da waak long de road, dat been like a fire wa da bun een we haat, ainty? We been too glad wen e beena splain God Book ta we.”

33Same time, dey git op an gone back ta Jerusalem. Dey find de leben ciple dem an some de oda people geda togeda.

34Dem people tell de two man say, “De Lawd done git op fom mongst de dead an e da lib gin fa true! E done appeah ta Simon!”

35Den de two man tell de people wa done happen ta dem wiles dey da waak long de road ta Emmaus. An dey tell um how dat dey done recognize dat e been de Lawd Jedus dey wid um wen e broke op de bread fa um.

Jedus Appeah ta E Ciple Dem

36Dat same time dey, wen dey beena taak bout dat, Jedus esef da stan op mongst um dey. E tell um say, “Leh oona hab peace een oona haat!”

37Dey been scaid mos ta det. Dey tink dey da see a ghost.

38Jedus tell um say, “Oona ain oughta be scaid. Oona ain oughta wonda wa oona da see.

39Look at me han an me foot. See, A mesef fa true! Oona mus tetch me an look at me good fashion. Den oona gwine know dat A ain no ghost. Cause A hab body an bone. A ghost ain hab no body needa no bone like oona see dat A hab.”

40Wen Jedus done say dat, e show um e han an e foot.

41Dey beena wonda an dey still ain bleebe, cause wa dey see mek um so full op wid joy. Jedus aks um say, “Oona hab sompin fa nyam yah?”

42Dey gim some roas fish an some honeycomb.

43E tek de fish an honey an nyam um dey fo dey eye.

44Jedus tell um say, “Wen A been dey wid oona, A done tell oona bout dis. A tell oona dat all ting wa Moses done write down een de Law bout me an wa dem prophet write down an all dey write down een de Psalms bout me, dey all mus happen fa true.”

45Jedus mek um able fa ondastan wa been write dey een God Book.

46E tell um say, “Een God Book dey write dis down: Dey tell we dat de Messiah haffa suffa an dead. An atta shree day, e gwine git op fom mongst de dead an lib gin.

47God Book tell we too dat een Christ name, e ciple dem mus tell all people say, ‘Mus change oona way an do wa God wahn oona fa do. Den God gwine paadon oona.’ De ciple dem mus tell dat een Jerusalem fus ob all an den tell all people all oba de wol.

48Oona done see all dem ting yah, an oona mus tell people bout dem.

49An A gwine sen oona wa me Fada done promise. Bot fo oona go, oona mus wait een de city ob Jerusalem til oona git dat Holy Sperit powa. Dat powa gwine come outta heaben an come down on oona.”

Jedus Go Op eenta Heaben

50An Jedus waak wid um outta Jerusalem ta Bethany. Wen dey git dey, e raise e han op an bless um.

51Wiles e da bless um, Jedus lef um. God tek um op eenta heaben.

52De people wa bleebe een Jedus da woshup um op. Den dey gone back ta Jerusalem. Dey been full op wid joy.

53An dey been een God house all de time, da praise God.


  Share Facebook  |  Share Twitter

 <<  Lukas 24 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran