Dual PanelJohn Preach ta de People
1Now den, Caesar Tiberius been de rula ob de Roman people. Wen e rule fifteen yeah, Pontius Pilate been gobna ob Judea. Herod beena rule een Galilee, an e broda, Philip, beena rule een Iturea an Trachonitis. An Lysanias beena rule een Abilene.
2Annas an Caiaphas been head ob de Jew priest. Same time, God gii John, Zechariah son, e wod fa tell people. An John been dey een de desat.
3So John gone waak bout all de arie close ta de Jerden Riba. E beena preach say, “Ef oona change oona sinful way an dohn do um no mo, A gwine bactize oona an God gwine paadon oona fa de ebil oona done.”
4John beena do jes like de prophet Isaiah, wa tell God wod, done write down een e Book. E say, “Somebody da holla een de desat, ‘Oona mus cleah de road weh de Lawd gwine come. Mek de pat scraight fa um fa waak!
5All de walley mus be full op, an ebry mountain an hill mus ton ta flat groun. De crooked road mus scraighten, an de oneben pat mus be smoot.
6An ebrybody een de wol gwine see how God da sabe e people!’”
7A whole heapa people come fa hab John bactize um. John tell um say, “Oona wicked, jes like snake! Who dat tell oona dat ef oona git bactize, oona kin git way fom de jedgiment wa God gwine sen fa punish oona?
8Oona mus do dem ting wa show oona done change oona way. Mus dohn staat fa tink say, ‘We de chullun ob Abraham, we ole people leada.’ Dat ain gwine sabe oona. A da tell oona, God able fa tek dem stone yah an ton um eenta Abraham chullun!
9De ax done ready fa cut de tree now. Ebry tree wa ain beah good crop, God gwine cut um down an shrow um een de fire.”
10De crowd aks John say, “Wa we haffa do now fa git way fom God jedgiment?”
11E ansa um say, “Anybody wa got two coat mus gii one ta de poson wa ain got none. Same fashion, ebrybody mus share wa e got fa nyam.”
12Some tax man too come fa hab John bactize um. An dey aks um say, “Teacha, wa we mus do fa sho we done change we way?”
13John ansa um say, “Mus dohn tek no mo money fom de people den de Roman gobment tell oona fa tek.”
14Some sodja dem aks um too, say, “An we, wa we haffa do?” E tell um say, “Mus dohn fight fa tek people money. Needa, mus dohn lie on people fa git money. Mus be sattify wid de pay oona git.”
15All de people beena hab dey hope real high, da look fa sompin fa happen. An dey beena study dey head, da wonda ef John been de Messiah.
16John ansa um all say, “Fa true, A da bactize oona wid wata. Bot de one wa hab tority a heap mo den me da come. A ain fit fa eben ontie e shoe. E gwine bactize oona wid de Holy Sperit an wid fire.
17E gwine jedge all de people an separate um op like a faama wa hab a long fork dey call winnowin fork een e han fa separate out de chaff fom de wheat. E gwine geda de good wheat an pit um een e baan. Bot de chaff e gwine bun een de ebalastin fire.”
18John preach ta de people, laan um plenty ting bout de good nyews an coax um fa change dey way.
19Bot John beena buke Gobna Herod cause e done marry Herodias, e broda wife, an cause Herod done plenty oda ebil ting.
20Den on top ob all dem oda ebil ting Herod beena do, e sen e man dem fa git John, lock um op een de jailhouse.
John Bactize Jedus
21Wen John beena bactize all de people, dat same time e bactize Jedus. An wiles Jedus da pray dey, de sky open op.
22An de Holy Sperit tek shape like a dob an come light on Jedus. Den a boice fom heaben say, “Ya me Son wa A lob. A sho please wid ya.”
Jedus Kin People
23Jedus been bout tirty yeah ole wen e staat fa do e wok wa God sen um fa do mongst de people. An de people beena tink say, Joseph been Jedus fada. Joseph fada been name Heli.
24Heli fada been name Matthat. Matthat fada been name Levi. Levi fada been name Melchi. Melchi fada been name Jannai. Jannai fada been name Joseph.
25Joseph fada been name Mattathias. Mattathias fada been name Amos. Amos fada been name Nahum. Nahum fada been name Esli. Esli fada been name Naggai.
26Naggai fada been name Maath. Maath fada been name Mattathias. Mattathias fada been name Semein. Semein fada been name Josech. Josech fada been name Joda.
27Joda fada been name Joanan. Joanan fada been name Rhesa. Rhesa fada been name Zerubbabel. Zerubbabel fada been name Shealtiel. Shealtiel fada been name Neri.
28Neri fada been name Melchi. Melchi fada been name Addi. Addi fada been name Cosam. Cosam fada been name Elmadam. Elmadam fada been name Er.
29Er fada been name Joshua. Joshua fada been name Eliezer. Eliezer fada been name Jorim. Jorim fada been name Matthat. Matthat fada been name Levi.
30Levi fada been name Simeon. Simeon fada been name Judah. Judah fada been name Joseph. Joseph fada been name Jonam. Jonam fada been name Eliakim.
31Eliakim fada been name Melea. Melea fada been name Menna. Menna fada been name Mattatha. Mattatha fada been name Nathan. Nathan fada been name David.
32David fada been name Jesse. Jesse fada been name Obed. Obed fada been name Boaz. Boaz fada been name Salmon. Salmon fada been name Nahshon.
33Naasson fada been name Amminadab. Amminadab fada been name Aram. Aram fada been name Hezron. Hezron fada been name Perez. Perez fada been name Judah.
34Judah fada been name Jacob. Jacob fada been name Isaac. Isaac fada been name Abraham. Abraham fada been name Terah. Terah fada been name Nahor.
35Nahor fada been name Serug. Serug fada been name Reu. Reu fada been name Peleg. Peleg fada been name Eber. Eber fada been name Shelah.
36Shelah fada been name Cainan. Cainan fada been name Arphaxad. Arphaxad fada been name Shem. Shem fada been name Noah. Noah fada been name Lamech.
37Lamech fada been name Methuselah. Methuselah fada been name Enoch. Enoch fada been name Jared. Jared fada been name Mahalaleel. Mahalaleel fada been name Cainan.
38Cainan fada been name Enos. Enos fada been name Seth. Seth fada been name Adam. Adam fada been name God.