Alkitab Mobile SABDA
[VER] : [GULLAH]     [PL]  [PB] 
 <<  Markus 1 >> 

John wa Bactize People Mek de Way

1Dis yah de Good Nyews bout Jedus Christ, God Son.

2De Good Nyews staat like how God prophet Isaiah done write, weh e say, “God say, ‘A gwine sen me messenja head ob ya fa open op de way fa ya.’

3Somebody da call out ta people een de desat say, ‘Oona mus mek de road ready weh de Lawd gwine pass. Mek de pat scraight fa um fa waak!’”

4John, wa beena bactize people, come ta de wildaness. E beena preach say, “Ef oona change oona sinful way an dohn do um no mo, A gwine bactize oona an God gwine paadon oona fa de ebil oona done.”

5A heapa people fom dey een Judea lan an fom Jerusalem city gone fa yeh John. Dem people fess op bout dey ebil ting de da do fo ebrybody wa been dey. Den John bactize um een de Jerden Riba.

6John cloes been mek wid camel hair, an de belt roun e wais been mek wid animal hide. E beena nyam locust an wild honey.

7Wen e da taak ta de people, e keep pon a say, “Atta A done me wok, one man wa hab heap motority den me gwine come. A ain fittin eben fa stoop down an loose e shoe like saabant do.

8A mesef da bactize oona wid wata, bot e gwine bactize oona wid de Holy Sperit.”

John Bactize Jedus an Satan Temp Um

9Jurin dat time Jedus come fom Nazareth town wa dey een Galilee. An John bactize um een de Jerden Riba.

10Wen John done bactize um, Jedus da come op outta de wata. Jedus see de cloud open op an e see God Sperit da come down like a dob til e come pon um.

11Den one boice taak fom outta heaben say ta Jedus, “Ya me own son. A da lob ya an ya pledja me tommuch!”

12Dat same time God Sperit mek Jedus go eenta de desat lan.

13Jedus beena dey een de desat foty day an foty night. An Satan keep pon a try fa mek um do ebil. Jedus been dey an de desat wid dem wild animal. Bot angel dem wa be God messenja fom heaben come ta Jedus an beena hep um.

Jedus Staat fa Call E Ciple Dem

14Atta John, wa beena bactize, done been pit eenta de jailhouse, Jedus gone ta Galilee, da tell de people all roun dey de Good Nyews wa God sen.

15Jedus da say, “De time done come. Soon people gwine see God da rule oba de people an de wol! Oona mus change oona sinful way an dohn do um no mo. An oona mus bleebe de Good Nyews fa true.”

16Wen Jedus beena waak long de sho ob Lake Galilee, e see two fishaman, Simon an e broda Andrew. Dey da cyas dey fishin net eenta de wata.

17Jedus tell dem say, “Come trabel long side me. Oona done beena wok, da ketch fish. A gwine laan oona how fa wok fa ketch people fa me.”

18Simon an Andrew lef dey fishin net an dey gone da trabel long side Jedus.

19Wen dey gone long de lake sho leetle bit mo, Jedus see two oda broda, James an John. Dey Zebedee son dem. Dey beena eenside dey boat, da mend dey fishin net.

20Wen Jedus shim, e call um fa come trabel long side um, laan fom um. Dey lef dey fada Zebedee an de wokman dem een de boat. Dey gone, da trabel long side Jedus.

Jedus Dribe Out de Ebil Sperit

21Jedus an e ciple dem gone ta de town name Capernaum. Wen de nex Jew Woshup Day come, Jedus gone eenside de Jew meetin house an laan de people God wod.

22De people beena stonish how Jedus da laan um. Cause e beena laan um wid tority like e know bery well wa e da teach. E ain teach like how dem Jew Law teacha beena do.

23Jes den, one man wa hab ebil sperit wa beena lib eenside um come eenta de Jew meetin house. E holla loud.

24E tell Jedus say, “Jedus fom Nazareth, wa bidness ya hab wid we? Ya come yah fa git rid ob we, ainty? A know who dat ya da. Ya de one wa blongst ta God fa true!”

25Jedus buke dat ebil sperit say, “Mus dohn say no mo. Mus come outta de man.”

26De ebil sperit shake de man haad. E holla loud loud an den e come outta de man.

27All de people een de Jew meetin house beena stonish tommuch. Dey da taak ta one noda say, “Wa dis? Dis a nyew ting e da laan we! Dis Man hab tority fa tell eben de ebil sperit dem wa fa do an dey do um!”

28Dat same time dey, people staat fa taak all oba Galilee lan bout de ting wa Jedus da do.

Jedus Heal Plenty People

29Jedus wid James an John an e oda ciple dem come outta de Jew meetin house an gone scraight ta Simon an Andrew dem house.

30Simon moda-een-law been sick een bed. A feba hab um. No soona den Jedus git dey, dey tell um bout um.

31Jedus gone ta de ooman an tek e han, hep um fa git op. Same time, de feba gone. An de ooman fix sompin fa dem fa nyam an gim.

32Dat same day, atta de sun done set fa red, people come bring ta Jedus all da sick people an all dem wa hab ebil sperit eenside um.

33All de people een dat town come geda togeda een de yaad, fo de door ob Simon an Andrew dem house.

34Jedus heal a heapa people wa done beena hab all kind ob sick. An e dribe a heapa ebil sperit outta people. E ain leh dem ebil sperit say eben one wod, cause dey beena know who dat Jedus be.

Jedus Tell People God Wod All Oba Galilee

35Aaly moanin, fo day clean, Jedus git op an lef de house. E gone ta a place weh no people beena lib, weh e da pray ta God.

36Simon dem gone saach fa Jedus.

37Wen dey find um, dey tell um say, “All de people da look fa ya.”

38Jedus ansa um say, “We haffa go ta dem oda willage roun yah, so dat A kin tell dem people God wod dey too. Cause dat wa A come ta dis wol fa.”

39Jedus gone all oba Galilee lan. E gone ta de Jew meetin house dem da tell de people God wod. An e da shrow de ebil sperit dem outta de people.

Jedus Heal de Man wid Leposy

40One man wa been tek bad sick een e skin wid leposy come ta Jedus. E kneel down fo Jedus an beg um say, “Ef ya wahn fa do um, A know ya able fa mek me clean.”

41Jedus been too saary fa de man. E reach out e han an tetch um say, “A wahn fa do um! A mek ya clean.”

42Dat same time de man been clean an e ain hab leposy no mo.

43Jedus sen de man pon e way. Fo e gone, Jedus waan um an chaage um.

44E tell um say, “See yah, mus dohn tell nobody nottin bout wa happen. Mus go ta de Jew priest an leh um look pon ya so e gwine know ya ain sick no mo. Ya mus gim de sacrifice fa bun fo God, same like Moses done chaage de people fa do. Dat gwine mek all de people know fa true dat ya ain sick no mo.”

45Bot de man ain do wa Jedus tell um. E lef Jedus an keep pon a taak ta plenty people. E tote de nyews ebryweh, say Jedus done mek um well. Sho nuff, e taak so much dat Jedus ain able fa come eenta no town no mo, cause all de people dey woulda crowd roun um. E da stay outta town weh nobody lib. Stillyet, de people beena come fom all oba Galilee fa shim dey.


  Share Facebook  |  Share Twitter

 <<  Markus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel