Alkitab Mobile SABDA
[VER] : [GULLAH]     [PL]  [PB] 
 <<  Markus 12 >> 

De Paable Ob De Grapewine

1Jedus staat fa tell dem paable. E say, “One man plant plenty grapewine een e gyaaden. E mek stone wall roun de gyaaden. E mek de stone wall roun de gyaaden an dig hole fa mash op de grape fa git de grape juice. An e build a place pontop de stone wall fa people fa keep gyaad oba de gyaaden. Den e hire some faama dem fa tek cyah ob de gyaaden. E gree wid dem fa e paat ob de grape haabis. An e gone way, trabel ta oda country.

2Wen haabis time come, de man wa own de grapewine sen e wokman. E go fa aks de faama wa tek cyah ob de grapewine fa gim de owna paat ob de haabis.

3Bot dem faama wa tek cyah ob de grapewine grab hole ta de wokman an beat op pon um, an dribe um outta de gyaaden. Dey ain gim nottin.

4De man wa own de gyaaden sen oda wokman, bot de faama dem wa tek cyah a de gyaaden beat um een de head an disgrace um.

5De owna sen noda wokman. Dey done kill dat one. De owna sen plenty oda. Dey beat op pon some ob dem an kill some ob dem.

6So den, de owna hab one poson lef fa sen. Dat e own son, an e lob um bery much. E sen um ta de gyaaden, tink say, ‘Wen dem faama see me son, dey gwine hona um fa true.’

7Bot wen de faama wa tek cyah ob de gyaaden see de owna son, dey tell one noda say, ‘Dat de son dis propaty gwine be lef ta. Leh we kill um so dat de propaty gwine come ta we.’

8Dey grab hole ob um an kill um, an chunk e body outta de gyaaden.”

9Den Jedus tell um say, “Oona know wa dat man wa own de gyaaden gwine do, ainty? E gwine come kill dem faama wa tek cyah a de gyaaden. An e gwine hire oda faama fa tek cyah ob de gyaaden.

10Fa sho, oona done read wa dey write een God Book say, ‘De stone wa de people wa da build say ain wot, dat stone de one wa portant mo den all de oda res, fa true.

11De Lawd done mek dat be so. An we tink dis ting too too wondaful!’”

12De Jew leada dem try fa grab hole ta Jedus an arres um, cause dey know dat paable wa e done tell been ginst dem. Bot dey scaid ob de crowd ob people, so dey done lef Jedus an gone way.

Wa We Oughta Gii ta de Gobment an ta God

13Dey sen some Pharisee an some ob King Herod people ta Jedus fa ketch um, mek um say sompin so dey could cuse um.

14Dey come ta Jedus say, “Teacha, we know ya da taak true an ya ain gwine change wa ya say jes cause people wahn ya fa change. Cause ya ain pay tention ta poson fa study bout ef e rich o ef e ain hab nottin. Ya da laan we de way God wahn people fa go fa true. Bot leh we aks ya one queshon. E right, coddin ta we Law, fa pay tax ta de Roman rula Caesar? Tell we ef we oughta pay um o ef we ain oughta pay um.”

15Bot Jedus know dem hypicrit people done say dat fa set trap fa ketch um. So e ansa um say, “Hoccome oona da try fa tek wa A say fa trap me? Bring me a Roman money coin so we kin look pon um.”

16Dey bring um de Roman coin. Jedus aks dem say, “Who dat pictcha an name dey dey pon de coin?” Dey ansa um say, “Dat Caesar own pictcha an name dey dey.”

17Jedus say, “Oona mus pay Caesar wa blongst ta Caesar, an mus pay God wa blongst ta God.” Wen dey yeh wa Jedus say, de people wa done come fa try fa trap um been stonish.

Jedus Teach Bout People Wa Gwine Lib Gin

18Some Sadducee people come ta Jedus. De Sadducee dem been bleebe say people wa done dead ain gwine lib gin, rise op fom dey grabe.

19Dey aks Jedus say, “Teacha, Moses done write we law say, ‘Ef a man broda dead an lef a wife bot ain hab no chullun, de broda wa lef haffa marry de wida ooman. E haffa marry um fa hab chullun fa e broda wa done dead.’

20Now den, dey been seben broda. De fus broda marry. Den e dead an e ain hab no chullun.

21So den, de nex broda marry de wida ooman. E done dead too an ain hab no chullun. Same fashion, de tird broda.

22All de seben broda marry de one ooman, bot dey done dead an dey ain hab no chullun. Den de ooman las dead.

23Now den, all seben broda dem done marry dat one ooman. Tell we, de day wen God gwine mek all de people wa done dead rise op fom dem grabe an lib gin, which one dem seben broda yah gwine git dat ooman fa e wife den?”

24Jedus ansa um say, “Oona wrong fa true! Oona know hoccome? Cause oona ain know wa Moses done write een God Book, an oona ain ondastan bout God powa.

25Cause wen de people wa done dead rise op fom dem grabe an lib gin, dey ain gwine be marry no mo. Dey gwine be like de angel dem God messenja een heaben.

26Now den, leh we taak bout God da mek de people wa done dead, lib gin, rise op fom dey grabe. Ain oona done read wa God mek Moses write een e Book wen e tell bout de small bush wa da bun bot ain neba bun op? God tell Moses say, ‘A de God wa Abraham, Isaac an Jacob da woshup.’

27Oona Sadducee wrong fa true! Cause e people wa da lib wa da woshup God. Dead people ain woshup God.”

De Law Wa Great Mo Den All de Res

28One Jew Law teacha been dey an e yeh dem da aagy. E know Jedus done ansa dem Sadducee good. So e come ta Jedus aks um say, “Which one ob de law dem be great mo den all de oda law?”

29Jedus ansa um say, “De law wa great mo den all de oda law say, ‘Pay tention oona, Israel people! De Lawd we God, e de onliest Lawd.

30Oona mus lob de Lawd oona God wid all oona haat, all oona soul, all oona mind, an all oona scrent.’

31De nex law wa great mo den de oda res say, ‘Oona mus lob oda people same like how oona lob oonasef!’ Dey ain no oda law mo great den dem two yah.”

32De Jew Law teacha tell Jedus, “Teacha, ya done ansa scraight! Ya done tell de trute wen ya say de Lawd de onliest God. Dey ain no oda God.

33Ya done tell de trute wen ya say we mus lob God wid all we haat, all we mind, an all we scrent. An we mus lob oda people roun we same like how we lob wesef. E mo betta fa do wa dem two law yah tell we fa do den fa gii God all we offrin, an de sacrifice dem wa we da mek, an all de animal dem wa we da bun fa God.”

34Jedus know de Jew Law teacha ansa um sensible, so e tell um say, “Ya done come close ta leh God rule oba ya.” Atta dat, ebrybody scaid fa aks Jedus queshon.

Who Christ de Messiah?

35Wen Jedus been een God House da laan de people, e aks um say, “Hoccome de Jew Law teacha dem say dat Christ, de Messiah, David son?

36Cause de Holy Sperit, done mek David esef say, ‘De Lawd God done tell me Lawd say, Seddown yah pon me right han side til A done mash op ya enemy dem, pit um onda ya foot.’

37David esef done call de Messiah ‘Lawd,’ so how de Messiah gwine be David son?”

Jedus Waan Bout de Law Teacha Dem

Dey been a big crowd ob people dey wa glad fa yeh wa Jedus da say.

38Wen e beena laan de people mo, e tell um say, “Mus watch out fa de Jew Law teacha dem. Dey like fa weah long robe an waak all roun een de maakut place so dat de people wa geda dey show um hona.

39Dem teacha like fa seddown een de mos portant seat een de Jew meetin house. An wen people call um fa come fa feas, dey wahn de bes place weh de big leada dem sit.

40Dem Law teacha like fa git hole ob de wida ooman dem propaty. An dey da pray long pray fa mek people say dey good Law teacha fa true. God gwine punish um mo den e gwine punish oda people!”

De Wida Offrin

41Jedus been ta God House, an e da seddown facin de box weh de people da pit offrin money. E da look pon de people as dey da come pit dey money eenta de box. Plenty rich people pit heapa money een dey.

42Den one po wida ooman come pit een two leetle coppa coin wa ain wot bout a penny.

43Now den, Jedus call e ciple togeda an tell um say, “A da tell oona de trute. Dis po wida ooman done pit mo eenta de offrin box den all de oda people.

44Dey all hab plenty ting an da gii jes a paat ob de money wa dey hab. Bot dis ooman done pit een all e money. E done gii all wa e been hab fa lib.”


  Share Facebook  |  Share Twitter

 <<  Markus 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel