Alkitab Mobile SABDA
[VER] : [GULLAH]     [PL]  [PB] 
 <<  Markus 14 >> 

Dey Mek Plan fa Kill Jedus

1E been two day fo de Jew holiday wa dey call Passoba an de Feas ob Unleaven Bread, wen dey nyam bread wa ain hab no yeast. De leada dem ob de Jew priest dem an de Jew Law teacha dem beena try fa find way fa grab hole ta Jedus so dey could hab dey man kill um. Bot dey ain wahn de people fa know wa dey da do.

2Dey say ta one noda, “We ain oughta grab hole ob Jedus now jurin dis holiday wen plenty people dey yah. Cause ef we do, de people gwine fight fa Jedus.”

One Ooman Naint Jedus Head een Bethany

3Jedus been een Bethany een Simon house. Simon de man wa been hab leposy. Wen Jedus da nyam, one ooman come een wid sweet ointment oll eenside a jar wa dey mek fom alabasta stone. De ointment been bery spensiz, an dey mek um fom de nard plant. Dey ain mix um wid no oda plant. De ooman broke de jar mout an pour de sweet ointment pon Jedus head.

4Some ob de people dey git bex. Dey say ta one noda, “Hoccome dis ooman done waste de spensiz ointment like dat?

5Dey shoulda sell dat ointment, cause dey coulda git heapa money fa um, mo den wa a man kin mek een a whole yea. Den dey could gii de money ta de people wa ain hab nottin.” An dem people da buke de ooman bad.

6Bot Jedus tell um say, “Oona mus dohn buke dis ooman no mo. Mus dohn bodda um. Dat one fine ting wa e done fa me!

7People wa ain hab nottin be dey wid oona all de time, an oona kin hep um weneba oona wahn fa hep um. Bot A ain gwine dey dey wid oona all time.

8De ooman done done all wa e able fa do fa me. E done naint me wid sweet ointment fa mek me body ready heada time fa wen dey bury me.

9A da tell oona fa true, all oba de wol wehsoneba dey da tell people de Good Nyews, dey gwine memba dis ooman an taak bout dis ting wa e done yah.”

Judas Gree Fa Han Jedus Oba ta E Enemy Dem

10Den Judas Iscariot, one ob de tweb ciple, gone off ta de head man ob de Jew priest dem. Judas gone fa tell um say e gwine han Jedus oba ta dem.

11Dey been too glad fa yeh wa e say, an dey gree fa gim money. So den Judas staat da look fa chance fa han Jedus oba ta dem.

Jedus Nyam de Passoba Meal wid E Ciple Dem

12E been de fus day ob de Jew holiday ob Unleaven Bread, wen de Jew dem da nyam bread wa ain hab no yeast. Dey always kill lamb dat day fa memba de Passoba, how dey ole people done come outta Egypt. Jedus ciple dem aks Jedus say, “Weh ya wahn we fa go fa git de Passoba meal ready fa ya?”

13Jedus sen two ob um, tell um say, “Mus go eenta de city, weh oona gwine meet op wid a man wa da tote a wata jug. Oona mus go wid um.

14Wen oona reach de house weh e gone een, oona mus tell de poson wa own de house say, ‘De Teacha wahn fa know weh de room weh me ciple an me gwine nyam de Passoba meal?’

15Den de man gwine show oona one big opstair room. E done ready de room fa we, an ebryting wa we need dey eenside dey. An dey een dat room, oona gwine git ebryting ready fa we fa nyam de meal fa memba de Passoba.”

16De ciple gone ta de city. Dey find all ting jes like Jedus done tell um. So dey git ebryting ready fa nyam de meal fa memba de Passoba.

17Wen sun done set fa red, Jedus an de tweb ciple come ta dat house.

18Wen dey da nyam, Jedus say, “A da tell oona, one a oona gwine han me oba ta me enemy dem. One a oona wa da nyam yah wid me now gwine do um.”

19De ciple been bery saaful. One by one dey aks Jedus say, “Fa sho, ya ain mean me, ainty?”

20Jedus ansa say, “One ob oona tweb gwine do um, one ob oona wa da dip e bread een de same dish yah, da nyam wid me.

21De Man wa Come fom God gwine dead, jes like dey done write bout um een God Book. Bot e gwine be too bad fa dat man wa gwine sell de Man wa Come fom God! E been faa betta fa dat man dey ef e ain neba been bon!”

De Meal wa We Nyam fa Memba de Lawd

22Wiles dey da nyam, Jedus tek bread, e pray, tell God say, “Tankya fa de bread.” E broke de bread an gim ta e ciple dem. E tell um say, “Oona tek dis bread yah, nyam um. Dis yah me body.”

23Den e tek one cup wid wine een um. E pray, tell God tankya fa de wine. Den e gii de cup ta e ciple dem, an dey all drink fom de cup.

24Jedus tell um say, “Dis yah me blood. A gwine dead, da sacrifice me blood fa sabe a whole heapa people. Me blood gwine show ebrybody dat God gwine do same like e done say e fa do, wen e mek de nyew greement wid e people.

25A da tell oona fa true, A ain gwine drink wine gin til de time wen A drink de nyew wine een de place weh God da rule.”

26Den dey sing one hymn an gone out ta de Mount ob Olib.

Jedus Taak Bout Peter

27Jedus tell e ciple say, “Oona all gwine bandon me, leabe me lone. Cause dey done write een God Book say, ‘God gwine shrike de shephud an de sheep gwine scatta.’

28Bot wen A lib gin, rise op fom mongst de dead people, A gwine go ta Galilee head ob oona. Oona gwine go meet me dey.”

29Peter ansa um scrong mout say, “Eben ef all de oda ciple bandon ya, A ain gwine bandon ya neba!”

30Jedus tell Peter say, “A da tell ya fa true, dis bery night, fo de cock crow two time, ya yasef gwine say shree time dat ya ain know me.”

31Peter ansa mo scrong mout say, “Eben ef A haffa dead wid ya, A ain gwine neba say A ain know ya!” An all de oda ciple dem say de same ting.

Jedus Pray Een Gethsemane

32Jedus an e ciple reach one place wa name Gethsemane. Jedus tell um say, “Oona seddown yah. A gwine go fa pray.”

33Jedus tek Peter, James an John wid um. An Jedus git bery saaful an hebby hebby haat.

34E tell um say, “Me haat so hebby dat A feel like A gwine dead. Oona stay yah an pray. Mus dohn sleep.” E git down flat pon de groun da pray ta God. E aks um say, “Fada, ef ya say e kin be, A aks ya fa sabe me. Tek way dis time wa da come wen A haffa suffa an dead so.”

35Jedus lef um, gone a leetle way foda. E git down flat pon de groun fa pray ta God.

36An e say, “Fada, me Fada, ya able fa do all ting. Please sah, tek way dis cup wa A fa suffa, dohn leh me suffa an dead so. Stillyet, mus dohn do wa A wahn. Mus do wa ya wahn.”

37Den Jedus come back ta de shree ciple dem. E find um sleep. E tell Peter say, “Simon, ya da sleep, ainty? Ya ain able fa stay wake eben a leetle wiles?”

38Jedus tell um say, “Oona mus dohn sleep. Mus pray so dat oona ain gwine do ebil wen Satan try fa mek oona do um. Oona wahn fa do de right ting bot oona ain hab scrent fa do um.”

39Jedus lef um gin, gone on a leetle way. E pray wid de same wod e beena pray de fus time.

40Den e come back gin an find Peter, James an John sleep. Dey ain been able fa keep dey eye open, an dey ain know wa fa say ta Jedus.

41Jedus gone way gin an pray. Wen e come back fa de shree time, e tell um say, “Oona stillyet da sleep an res? Dat nuff fa now. De time done come. Look yah! Sinna man gwine han de Man wa Come fom God oba ta de enemy.

42Git op. Leh we go meet um. Oona look yah. See de man wa da han me oba ta me enemy. E da come yah now!”

Dey Grab Hole ta Jedus

43Wiles Jedus beena say dat, Judas, one ob de tweb ciple dem, git dey. A bunch ob people been wid um, da tote knife an big stick fa fight wid. De Jew priest leada dem, de Jew Law teacha dem an de oda Jew big leada dem done sen dem people wid Judas.

44Judas, wa da han Jedus oba, done been tell dem people heada time how dey gwine know Jedus. E been say, “De Man wa A gwine kiss, dat de Man oona wahn. Mus grab hole ob um, tek um way wid gyaad roun um.”

45Wen Judas git dey, e gone op ta Jedus, say, “Teacha!” Den e kiss um.

46De people grab hole ta Jedus an hole um tight.

47One ob dem wa beena stanop dey dey by Jedus pull out e knife. E scrike de slabe ob de head man ob de Jew priest leada dem. Dat man cut off de slabe yea.

48Jedus tell de crowd say, “Oona haffa come wid knife an big stick fa grab hole ta me, ainty? A ain no tief.

49Ebry day A been dey wid oona een God House, da teach bout God. Bot oona ain neba grab hole ta me. Bot all wa dey done write een God Book haffa come true.”

50Den all de ciple lef Jedus an ron way.

51One nyoung man beena folla long hine Jedus. Dat man ain hab no cloes on cepin a piece ob linen closs. An de people try fa grab hole ob um.

52Bot de man lef de closs een dey han an ron way nekit.

Dey Tek Jedus ta de Jew High Court

53Dey tek Jedus ta de head man ob de Jew priest leada dem, eenta e house. All de leada dem ob de Jew priest, de oda Jew leada dem an de Jew Law teacha dem beena geda dey.

54Peter beena folla long hine Jedus fom a way off. E folla long eenta de head man yaad. Wen e reach dey, Peter gone seddown close ta de gyaad dem, da waam esef by de fire.

55De leada dem ob dem Jew priest an all de oda Jew leada dem wa jedge een de Jew High Court beena look fa find some poson fa taak ginst Jedus, say e done ebil ting, so dat dem leada kin kill um. Bot dey ain been able fa find nobody.

56A heapa people tell lie ginst Jedus, bot dey ain mek dey story gree.

57Den some people stanop an tell dis lie ginst Jedus.

58Dey say, “We done yeh Jedus say, ‘A gwine stroy God House yah wa people done mek. An A gwine tek shree day fa mek oda God House, wa no poson gwine hep mek.’”

59Bot dem people yah wa say dat ginst Jedus ain neba mek dey story gree needa.

60De head man ob de Jew priest leada dem stanop een front ob dem all. E aks Jedus say, “Wa mek dem people yah say ya done dem ebil ting? Wa ya say bout dat?”

61Bot Jedus neba say a mumblin wod. De head man ob de priest dem keep on da quizzit um. E aks um say, “Ya de Messiah, de Son ob de God we praise? Tell we.”

62Jedus ansa um say, “Yeah, A de Messiah. Oona gwine see de Man wa Come fom God, da seddown close by God, pon e right han. E da God wa hab all powa. An oona gwine see me da come ta dis wol da ride pon heaben cloud!”

63De head man ob de priest dem bex fa true til e teah e cloes an say, “We ain need no mo people fa taak ginst um, ainty?

64Oonasef done yeh de ebil ting e say ginst God. Wa oona say?” All dem leada wa beena jedge dey een de Jew High Court condemn Jedus, say e oughta dead.

65Some dem staat fa spit pon Jedus. Dey tie a closs oba e eye. Den dey slap um an say, “Guess who dat slap ya? Tell we!” De gyaad deysef tek um an beat um op.

Peter Say E Ain Know Jedus

66Peter been dey, down een de yaad, wen one de gyal dem wa wok fa de head man ob de priest dem come by.

67Wen e see Peter da waam esef by de fire dey dey, dat gyal look um dead een de face an say, “Yasef beena gone long side ob Jedus wa come fom Nazareth.”

68Bot Peter say e ain know Jedus. E ansa de gyal say, “A ain know wa ya da taak bout.” An Peter gone out close ta de gate. Same time a cock crow.

69Wen de gyal see Peter dey, e tell de people wa da stan roun, say gin, “Dis man yah be one ob dem wa beena gone long side ob Jedus!”

70Bot Peter say gin, “A ain know um.” Atta a leetle bit, de people wa beena stan roun dey tell Peter say, “Fa true, ya cyahn say ya ain one ob dem wa beena wid Jedus, cause yasef come fom Galilee.”

71Peter say, “A da tell oona fa true! Leh God mek me suffa ef A ain taak scraight. A ain know dat man oona da taak bout!”

72Same time e say dat, a cock crow noda time. Peter memba wa Jedus done been tell um. Jedus done been say, “Fo de cock crow two time, ya gwine say shree time dat ya ain know me.” Peter buss out da cry.


  Share Facebook  |  Share Twitter

 <<  Markus 14 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran