Alkitab Mobile SABDA
[VER] : [GULLAH]     [PL]  [PB] 
 <<  Markus 5 >> 

Jedus Heal One Man Wa Hab Ebil Sperit Eenside Um

1Wen Jedus an e ciple dem done cross oba de lake, dey gone ta de Gadarene people country.

2No soona den Jedus git outta de boat, one man wa come out fom de buryin cabe come meet um. An de man hab ebil sperit eenside um.

3Dis man beena lib mongst de tomb, an e beena scrong til nobody ain been able fa keep um tie op, eben wid chain.

4Plenty time de people done tie op e han an e foot. Bot ebrytime e done broke de chain an e smash op de iron chain pon e foot. Nobody ain been able fa trol um.

5An jurin de day an de night de man been dey mongst de tomb an pon dem hill. E da holla loud an e da tek stone fa cut esef.

6E been a good way fom Jedus wen e spot um so e ron go meet um. E done kneel down fo Jedus fa show e spec um.

7E holla loud loud mo den fo, say, “Jedus, ya de Son ob God, de God wa great mo den all oda god. Wa dat ya wahn fa do ta me? A beg ya een God name, mus dohn mek me suffa!”

8De man taak dat way cause Jedus beena tell um, say, “Ya ebil sperit, come out fom eenside dis man.”

9Jedus aks de man say, “Wa ya name?” De ebil sperit eenside de man ansa Jedus say, “A name ‘Plenty, Plenty,’ cause dey be heapa we.”

10An e beg Jedus oba an oba fa no dribe de ebil sperit dem outta dat countryside.

11Same time a heapa hog beena nyam pon de hillside close by weh Jedus been.

12All de ebil sperit beg Jedus say, “Sen we ta dem hog. Leh we gone fa lib eenside um.”

13Jedus gree fa leh um gone eenta de hog. So de ebil sperit dem come out fom eenside de man an gone eenside de hog. All de hog rush down de steep hill eenta de lake. An dey been bout two tousan dem. Dey all done faddown eenside de wata an been drown.

14De people wa beena mind de hog ron gone tell de nyews een de town an oba de countryside. So de people come look.

15Dey meet Jedus, an close by um dey see de man wa been hab plenty ebil sperit eenside um. E beena seddown, da listen ta Jedus. Dat man been soba an e beena weah cloes. Wen de people see dat, dem stonish.

16Den de people wa done see wa happen, tell de oda people wa come fa look, all wa been done ta de man wa beena hab ebil sperit. An dey tell um bout de hog too.

17So den, dat mek de people staat fa beg Jedus fa git outta dey country.

18Wen Jedus beena git eenta de boat, de man wa been hab de ebil sperit dem eenside um beg Jedus say, “Leh me go wid ya.”

19Bot Jedus ain leh um. Stead, e tell um say, “Go back ta ya house ta ya people. Tell um all wa de Lawd done done fa ya, an how e done hab mussy pon ya fa true.”

20So dat man lef an gone all shru de arie wa dey call de Ten Town, da tell wa Jedus done done fa um. An all de people been stonish.

Jedus Show E Powa Oba Det

21Jedus done tek de boat, gone back cross de oda side ob de lake. Dey ta de lake sho a bunch a people come op roun um.

22An one man name Jairus come dey. E been a leada een de Jew meetin house. Wen e see Jedus, e come kneel down fo um.

23E beg um much say, “Me leetle gyal real sick. E da dead. Wohn ya please come pit ya han pon e head an pray fa um, mek e git well so e wohn dead?”

24So den, Jedus gone wid Jairus. Now so much a people beena gwine long wid Jedus dat dey beena crowd um fom ebry way.

25One ooman been dey wa done beena suffa real bad. E beena bleed fa tweb yea.

26Plenty docta done treat um, da try fa heal um. An e done spen all e money. Bot e ain no betta. Stead, e beena git wos mo an mo.

27De ooman done been yeh bout Jedus, so e come op eenta de bunch ob people fa reach Jedus. An e tetch Jedus cloes.

28Cause dis ooman done beena say ta esef, “Ef A kin jes tetch Jedus cloes, A gwine be well.”

29So e tetch Jedus cloes an same time de bleed done stop, bam! An e feel een e body e done git well ob e misery.

30Dat same time, Jedus know powa done gone outta um fa heal somebody, so e ton roun ta de bunch ob people, aks um say, “Whodat tetch me cloes?”

31E ciple dem ansa um say, “Ya see all dis bunch ob people da crowd ya? Hoccome ya aks who dat tetch ya cloes?”

32Bot Jedus keep a look roun fa see who done tetch e cloes.

33Now de ooman ondastan e done git well, so e come ta Jedus. E so scaid e da shiba. E come kneel down fo um an tell all wa done ta um.

34Jedus tell um say, “Me daughta, cause ya bleebe, ya done git well. Go een peace wid quiet haat. Dat kind ob misery ain gwine come pon ya no mo.”

35Same time Jedus beena say dis ta de ooman, some people come bring nyews fom Jairus house. Dey tell Jairus say, “Ya daughta done dead, so ya ain oughta warry de teacha no mo, ainty?”

36Wen Jedus yeh wa dem da say, e tell Jairus, “Mus dohn scaid. Ya jes bleebe.”

37Den Jedus gone ta Jairus house. Bot e ain leh nobody go wid um, cepin Peter, James an James broda, John.

38Wen dey reach Jairus house, Jedus see de people mixin op. Dey beena mek loud noise, da cry an wail.

39Jedus gone eenside an tell de people say, “Wa fa all dis mix op? Wa mek oona da cry so? De chile ain dead. E da sleep.”

40De people done mek fun ob Jedus. Bot e pit um all outta de house, cepin de chile fada an modda, an de shree ciple dem. Dey all gone eenta de room weh de chile beena lay.

41Jedus hole de chile han an tell um say, “Talitha koum!” Een dey way ob taak, dat mean “Me chile, A tell ya, git op.”

42Same time de chile done open e eye an git op. E waak roun een de room. (E been tweb yea ole.) Dem wa been dey wid Jedus been bery stonish.

43Jedus waan um say mus dohn tell nobody wa done happen. Den e tell um fa gii de chile sompin fa nyam.


  Share Facebook  |  Share Twitter

 <<  Markus 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel