Alkitab Mobile SABDA
[VER] : [GULLAH]     [PL]  [PB] 
 <<  Roma 10 >> 

1Me Christian bredren, wid all me haat A wahn God fa sabe me people, de Jew dem. A da pray ta God fa dat.

2Fa true, A kin taak fa dem say dat dey wahn fa please God too bad, bot dey ain ondastan de right way.

3Cause dey ain pay no mind ta how God da mek all ting right. Dey beena try fa find dey own way. So dey ain gree fa folla God way fa mek all ting right twix esef an dem.

4Cause ob Christ, God da mek all ting right wid dem wa bleebe pon Christ, an so dey ain got no need no mo fa keep on da try fa git right wid God shru de Law.

God Wahn fa Sabe All People

5Moses been write bout de people wa tink dat God mek all ting right twix esef an dem ef dey kin do all wa God Law say. Moses write say: “De people wa kin do all de Law say, dey gwine find life.”

6Bot de ting wa dey write een God Book bout de way God mek all ting right twix esef an de people wa bleebe pon um, dis wa e say: “Mus dohn say een ya haat, who dat gwine go op eenta heaben?” (so dat e kin bring Christ down fa hep we).

7“An mus dohn say needa, who dat gwine go down ta de place ob de dead?” (so dat e kin bring Christ op fom outta dey ta we).

8Dey write een God Book say: “God wod right yah, close ta ya. Ya kin taak bout um an ya kin study pon um.” Dat de wod we da taak bout ta all people say, oona mus bleebe pon Christ.

9Cause ef ya tell de people say “Jedus, e Lawd” an ya bleebe fa true een ya haat dat God mek Jedus rise op fom mongst de dead people an lib gin, den God gwine sabe ya.

10Wen we bleebe pon Jedus een we haat, God mek all ting right twix we an esef. Wen we tell people say we bleebe pon Jedus, God sabe we.

11Dey write een God Book say, “All people wa bleebe pon um ain gwine hab no cause fa be saary bout um.”

12Cause dey jes one God fa all people. An e da sabe de Jew people an de people wa ain Jew, all een de same way. Dey all blongst ta de same Lawd, an e da bless all dem wa da pray ta um tommuch.

13Jes like dey write een God Book say, “Ef somebody pray ta de Lawd fa be sabe, de Lawd gwine sabe um.”

14Bot how people gwine pray ta de Lawd ef dey ain bleebe pon um? An how dey gwine bleebe pon um ef dey ain neba yeh bout um? An how dey gwine yeh bout um ef nobody ain neba gone an tell um bout um?

15An how people gwine tell um ef nobody ain sen um? Like dey write een God Book say, “Fa true, how purty the foot dem ob de people wa da bring de Good Nyews.”

16Bot some ob de people ain pay no mind ta de Good Nyews. De prophet Isaiah say, “Lawd, who been bleebe de message we da tell um?”

17So den, cause people yeh de message bout Christ, dey come fa bleebe pon Christ. An somebody haffa go tell people bout Christ fa mek um yeh.

18Bot leh me aks oona sompin. E true dat de Jew people ain yeh de message? Fa sho, dey done yeh dat message. Dey write een God Book say, “All de people all oba de wol been yeh de wod dem wa de messenja dem tell. Dey wod gone out all oba de wol.”

19Leh me aks oona noda ting. Ain de Jew people ondastan de message? Yeah, de Jew people been ondastan. Fus, dey leada Moses speak way back dey fa God, e tell de people, say, “A gwine mek oona jealous cause ob a people wa ain no nation fa true. A gwine mek oona bex wid a nation ob people wa ain ondastan nottin tall.”

20Den wen de prophet Isaiah beena taak ta de people, God message been mo cleah an scrong. E tell um God say, “De people dem wa ain beena try fa find me, dey done find me. A done appeah ta dem people wa ain beena look fa me.”

21An Isaiah tell we say, God taak bout de Jew people say, “All de time A beena look fa dem wa ain do wa A tell um an wa fight ginst me. A beena look fa um fa come ta me.”


  Share Facebook  |  Share Twitter

 <<  Roma 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran