Alkitab Mobile SABDA
[VER] : [GULLAH]     [PL]  [PB] 
 <<  Roma 2 >> 

God Gwine Jedge All People

1So den, waeba one ob oona da jedge oda people, ya ain got no scuse tall fa de bad ting dem ya da do. Dohn mek no neba mind who ya da. Cause weneba ya jedge oda people, bot ya keep on da do de same bad ting dey da do, ya da condemn yasef.

2We know God da do de right ting wen e condemn de people wa da do dem bad ting yah.

3Bot ya wa jedge oda people, ya da do dem same bad ting dat ya jedge oda people fa! Fa sho, ya ain gwine be able fa git way. God gwine jedge ya too, ainty?

4Ya tink dat God blessin pon oona ain mean nottin? Fa a long time, e da pit op wid ya, an e ain punish ya. Fa true, ya know dat God do ya so much good, cause e da try fa git ya fa change ya bad way an do wa e wahn ya fa do, ainty?

5Bot ya haat mo haada den a rock an ya ain wahn fa change ya way. So den, God gwine mek ya suffa eben mo, wen e punish ya on dat day, wen e gwine show how e bex wid people cause dey da do bad. Dat wen e gwine jedge um scraight, fa true.

6Cause God gwine gii ebry poson de payback fa waeba e done.

7Some people da do good ting all de time. Dey da wahn fa hab God gii praise an hona an life wa go on faeba. An God gwine gim dat life wa ain neba end.

8Oda people jes da lib fa deysef. Dey ain wahn fa waak een de true way an do wa dey oughta do. Dey da waak een de ebil way, jes da do wa dey ain oughta do. God gwine show e bex fa true wid dem an punish um too bad.

9E gwine be too bad fa all people wa keep on da do ebil. Fus de Jew people an den de people wa ain Jew, dey all gwine suffa too bad, ef dey keep on da do ebil.

10Bot all de people wa da do good ting, God gwine praise um an gim hona an peace, fus de Jew people an den de people wa ain Jew.

11Cause God da jedge all people de same way.

12All de people wa ain hab de Law wa God gii Moses, dey da sin an dey gwine be loss dout de Law. An all dem wa hab de Law wa God gii Moses, dey da sin, an God gwine jedge um coddin ta de Law.

13Jes cause dey done yeh wa de Law say, dat ain mek people stan right wid God. Dem wa da do wa de Law say, dey da stan right een God eye.

14De people wa ain Jew ain know de Law wa God gii Moses. Bot weneba dey do sompin wa dey haat tell um fa do an dat a ting wa de Law say, dey show dey know wa dey oughta do an wa dey ain oughta do, eben dough dey ain know dat Law.

15Wa dey do, dat da show dat wa de Law say dey oughta do, wa dey een dey haat. Same way, wa dey da tink show dat de Law dey een dey haat, cause sometime dey kin tink say dey done do bad, an sometime dey kin tink say dey done do good.

16So coddin ta wa de Good Nyews wa A da tell people say, all dem ting yah gwine happen pon dat day wen God gwine sen Jedus Christ fa jedge de secret ting wa all people da tink een dey haat.

De Jew People an de Law

17Now den, wa bout oona wa say, “A a Jew”? Ya da trus een de Law, an ya da brag dat ya people de people dat God done pick.

18Oona know wa God wahn ya fa do, an ya know de good way, cause de Law laan ya wa right an wa ain right fa do.

19Oona tink dat fa sho ya kin lead de bline people an dat ya like a light fa dem wa dey een de daak.

20Ya tink dat fa sho ya kin laan de people wa ain got no sense an dem wa ain staat fa laan yet. Cause ya Law wa God gii Moses mek ya know all wa ya need fa know an all wa true.

21Oona da laan oda people. Hoccome ya ain laan yasef? Ya da tell oda people say, “Mus dohn tief,” stillyet ya da tief?

22Ya da tell oda people say, “Mus dohn sleep wid noda poson wife o husban,” stillyet ya da do dat? Ya da taak say, ya hate dem idol wa people mek fa woshup. Stillyet ya da tief fom de place dem weh people woshup?

23Ya da brag say, ya know de Law wa God gii Moses. Stillyet, ya ain do wa dat Law tell ya fa do. An cause ob dat, people ain hab no spec fa God tall, ainty?

24So den, jes like dey write een God Book say, “Ya Jew people da mek de people wa ain Jew hole God name cheap.”

25Ef ya da do wa de Law say, ya circumcision mean sompin fa true. Bot ef ya ain do wa de Law say, e stan jes like ya ain neba been circumcise tall.

26Ef somebody wa ain neba been circumcise do wa de Law say fa true, God gwine look pon um jes like somebody wa done been circumcise, ainty?

27So den, de people wa ain been circumcise een dey body an stillyet da do wa de Law say, dey gwine condemn ya. Cause oona wa done been circumcise an wa got de Law wa Moses done write, ya ain do wa de Law say.

28So den, who de true Jew? A man ain no true Jew jes cause e body been circumcise.

29No, de true Jew, e de one wa God done pit e maak pon eenside de man haat. Dat mean dat poson done gii God e haat. God sperit do dat. Ain de Law wa Moses write wa do dat. God da praise dat one, an dat praise ain come fom no man.


  Share Facebook  |  Share Twitter

 <<  Roma 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran