Dual PanelWe Oughta Lib da Do wa de Holy Sperit Tell We fa Do
1So den, now dey ain no way dat God gwine condemn de people wa come fa be one wid Christ Jedus.
2Cause de Holy Sperit, wa da gii we life een a nyew way by wa Christ Jedus done fa we, e bring a law ob life wa set me free fom de powa ob de law ob sin an det wa beena rule oba me.
3God done wa de Law ain able fa do, cause we, wid we sinful haat, ain able fa hep wesef fa do wa de Law say. God sen e own Son eenta de wol fa be a man like we, fa pay fa we sin. God punish e Son Christ Jedus steada we, wen e mek Christ de sacrifice fa all we sin.
4God done dat so dat now we kin do all wa de Law say e right fa do. We ain da lib de way we sinful haat tell we fa lib, bot we da lib fa do wa God Sperit tell we fa do.
5De people wa da lib de way dey sinful haat tell um fa lib, dey jes da tink all de time bout wa dey sinful haat wahn fa do. Bot de people dem wa da lib fa do wa God Sperit tell um fa do, dey jes da tink all de time bout wa de Sperit wahn um fa do.
6Dem people wa jes da tink all de time bout wa dey sinful haat wahn, dey gwine dead dout God. Bot dem wa jes da tink all de time bout wa God Sperit wahn, dey gwine hab life faeba an hab peace een dey haat.
7So wen somebody jes da tink all de time bout wa e sinful haat wahn, dat mek um God enemy. E ain gwine do wa God Law say. Fa true, e ain able fa do um.
8Dem people wa jes da do all de time wa dey sinful haat tell um fa do, dey ain able fa please God.
9Bot oona ain da do all de time wa ya sinful haat tell ya fa do. Ya da do wa God Sperit tell ya, ef God Sperit da lib dey eenside ya. An ef Christ Sperit ain da lib eenside somebody, dat one dey ain blongst ta Christ.
10Bot ef Christ da lib dey eenside ya, by e Sperit, den eben dough ya body dead cause ob sin, stillyet, God Sperit da mek ya hab life, cause Christ done mek all ting right tween oona an God.
11De Sperit ob God wa mek Jedus git op fom mongst de dead an lib gin, e da lib dey eenside ya. So den, God wa mek Christ Jedus git op an lib gin, e gwine mek ya body, wa gwine dead, git op an lib gin too. God Sperit wa da lib dey eenside ya, e gwine do dat.
12So den, me Christian bredren, we mus do wa God Sperit tell we fa do, an not wa we sinful haat tell we fa do.
13Cause ef ya jes da lib de way ya sinful haat tell ya fa lib, ya gwine dead. Bot ef ya leh God Sperit gii ya powa so dat ya stop do dem sinful ting een ya body dat ya body wahn ya fa do, ya gwine lib.
14Den all de people wa da leh God Sperit lead um, dey God chullun.
15Cause de Sperit wa God gii ya ain one wa mek ya scaid, like slabe scaid ob dey massa. Steada dat, God gii oona de Sperit wa mek ya God chullun. An de Sperit gii we powa fa call God say, “Fada! Me Fada!”
16God Sperit da jine wid we own sperit, fa say dat we God chullun.
17An cause we God chullun, we gwine git de blessin dem wa God beena keep fa e people. An long wid Christ, we gwine git wa God beena keep fa Christ. We know dat de trute, since we got we paat een Christ suffrin so dat we kin git we paat too, een de life ob glory wa Christ got.
De Glory wa Gwine Come Bye an Bye
18A reckon dat wa we da suffa now een dis time ain nottin tall wen we tink bout de life ob glory wa God gwine show we bye an bye.
19All de ting dem wa God done mek da wait, da look fowaad fa true fa God show um e chullun.
20Dem ting wa God mek, e mek um so dat dey ain wot nottin. Ain cause dey ain wahn fa do wa dey spose fa do, bot God mek um like dat cause e wahn um fa keep on da look fowaad een hope.
21Cause God gwine free dem ting e been mek, so dat dey ain gwine haffa rot no mo. God gwine free um so dat e kin gim dat same glory wa blongst ta e chullun.
22We know dat right op ta dis time, all ting wa God mek, dey beena like dey da groan togeda an da look fowaad fa true, jes like a ooman da groan wid pain an look fowaad ta wen e baby bon.
23An ain jes dem ting yah wa da groan. Bot we wa got God Sperit, de fus paat ob dat glory wa da come, we too da groan een we haat wiles we da wait, da look fowaad ta de time wen God gwine gii we all we oughta git as chullun wa God done mek e own. An God gwine set we body free fom dis wol, wen e gii we we nyew body.
24Fom de time God sabe we, we beena look fowaad ta dat glory wa da come. Bot ef we done got wa we da look fowaad ta, we ain haffa look fowaad ta um no mo. Cause ef we done got um, fa sho, we ain gwine keep on da look fowaad fa git um no mo, ainty?
25Bot cause we da look fowaad ta wa we ain got yet, we ain mind fa wait fa um.
26Same way so, God Sperit, too, da hep we wen we ain da stan scrong een we fait een God. We ain know how we oughta pray. Bot de Sperit, e da pray ta God fa we, da groan een a way dat we ain able fa say een wod.
27An God, wa look at wa we wahn een we haat, e da ondastan wa de Sperit mean. Cause de Sperit da pray ta God fa e people an e da pray jes wa God wahn um fa pray.
28We know dat een all ting wa come ta we wa lob God, God da mek um be fa we own good. God da do dat fa we wa e done pick fa do wa e been plan.
29Dem people God done know bout, e done pick um fa mek um come fa be like e Son so dat e Son gwine be de fus bon, an de plenty people wa come fa be God chullun, dey gwine be Jedus nyounga broda dem.
30Dem wa God done pick fa be like e Son, dem e call. An dem wa God call, e mek all ting scraight twix dem an esef. An fa dem wa e mek all ting scraight wid, fa sho, e gwine gim de glory wa da come.
Ain Nottin Kin Mek God Stop Lob E Chullun
31So den, wen we look at all dem ting yah wa God do fa we, wa we kin say? God dey fa we, so ain mek no nebamind who go ginst we, ainty?
32God ain keep eben e own Son fom suffa. E sacrifice um, leh um kill um fa all ob we! So den, wen God sacrifice Christ fa we all, we kin know fa true dat e ain gwine hole back nottin e kin gii we.
33Wid God, ain mek no nebamind who cuse we people wa e done pick. Cause God de one wa say e mek all ting scraight twix we an esef.
34Ain nobody kin condemn we fa we sin, cause Christ Jedus de one wa done dead fa we, an den too, e de one wa God mek git op fom mongst de dead people an lib gin. An Christ Jedus de one wa da seddown ta God right han side. E da taak ta God fa we!
35So den fa true, dey ain nobody, dey ain nottin kin mek Christ stop fa lob we, ainty? Wen we git een trouble, dat ain gwine stop um. Wen haad time come pon we, o people da mek we suffa, dat ain gwine stop um. Wen we hongry, o wen we ain got nuff cloes fa weah, wen we een danja, o eben wen dey kill we wid dey sode, ain none ob dat kin mek Christ stop fa lob we.
36Like David say, “Cause we blongst ta ya, people keep on da try fa kill we all de time. Dey da treat we jes like sheep wa dey haffa kill.”
37Bot eben wen all dem ting yah happen ta we, Christ wa lob we da mek we able fa win out oba all dem ting all de time.
38Cause A know, fa sho, dat dey ain nottin able tall fa mek God stop fa lob we. Ef we done dead o ef we da lib, e da lob we. Angel dem ain able fa stop um, needa dem ebil sperit, needa ting wa come een dis time yah o een de time fa come,
39needa de powa dem op oba de cloud, o dem down onda de cloud. Ain nottin wa God mek kin mek God stop fa lob we. E show we dat by wa Christ Jedus we Lawd done fa we.