Dual PanelHow Christian Mus Lib
1Ya mus memba de Christian dem dat dey mus pay mind ta dem wa da lead een de gobment an hab tority oba um. Dey mus do wa dey tell um fa do, an be ready fa do all dat good.
2Tell um dey mus dohn taak bad bout nobody. Dey mus be peaceable an treat people good. An all de time dey mus mind dey manna wid all people.
3Cause we too ain nyuse fa hab no ondastandin bout God. Een dat time we ain beena pay no mind ta God. We ain listen ta nobody. An we ain beena waak een de right way. We ain been able fa trol wesef, an wa we haat tell we fa do, jes dat we beena folla. We jes been wahn fa do all kind ob bad ting fa gii we pledja. An we beena lib jes da study pon how fa do bad ta people an be jealous ob um. People beena hate we, an we beena hate one noda.
4Bot den God we Sabior sabe we, wen e show we e blessin an how e da lob ebrybody.
5Ain been cause ob no good ting dat we beena do dat e sabe we. Bot cause e hab mussy pon we, e sabe we, shru de washin wa mek we bon gin an git nyew life by de Holy Sperit.
6God pour out de Holy Sperit pon we wid all e powa shru Jedus Christ we Sabior.
7God done dis so dat by Christ blessin, all ting done been mek right twix we an God, an so dat we kin git we paat ob dat life wa ain neba end dat we da look fowaad ta.
8Dis a true teachin dat A da write ya. A wahn ya fa mek sho dat ya teach dem ting yah real good, so dat dem wa trus een God gwine consaan deysef wid do good deed all de time. Cause dat ting good fa true an dey gwine hep people.
9Bot ya mus dohn git mix op een taak an aagyment wa ain mek no sense. Wen people da aagy nonsense an aagy bout dem long list ob name ob we ole people, wen dey da quarrel an fight bout dem ting dat de Jew Law say we oughta do, ya mus dohn hab nottin fa do wid dat. Cause all dat aagyment ain wot nottin. E ain hep nobody nohow.
10Ef somebody spute wa ya teach, da tell wa ain true ta people een de choch an da mek um wide op an tek side ginst one noda, waan dat one fa stop fa do dat. Ef e ain stop, ya mus waan um one time mo. Bot den, ef e ain pay ya no mind, ya mus dohn hab nottin fa do wid um.
11Ya know dat a poson like dat, e done ton way, fa sho, fom de true teachin, an e da sin. E know dat de sin e da do show dat e wrong an so e da condemn esef.
De Las Ting wa Paul Tell Titus fa Do
12Soon as A sen Artemas o Tychicus ta ya, try ya bes fa come soon fa meet me ta Nicopolis. Cause A done mek op me mind fa stay dey wen winta come.
13Do all ya kin fa hep de lawya Zenas an Apollos go pon dey way. An mek sho dat dey git ebryting dey need.
14Dem wa trus Christ, dey haffa laan, too, how fa nyuse dey time fa do good deed, so dat dey kin hep oda people git wa dey need. Een dat way, dem wa trus een Christ gwine lib life wa count fa sompin.
15All people yah, dey say hey ta ya. An tell all we Christian fren dem hey. God bless all ob oona.