Dual PanelGod Punish dem People wa E Bex Wid
1Atta dat, A yeh boice eenside God House da taak loud ta de seben angel say, “Oona mus go tek dem seben bowl wa full op wid de bex wa God bex, an empty dem bowl out pon de wol!”
2De fus angel empty out e bowl pon de groun. Plenty real bad sore buss out pon de people dem wa got de maak ob de beast an wa woshup e statue.
3De secon angel empty out e bowl pon de sea. An de sea ton ta blood jes like blood wa dey eenside dead body. Ebry libin ting dey een de sea dead.
4Den de angel wa mek shree empty out e bowl pon dem riba an dem wata wa buss outta de groun, an dey ton ta blood.
5A yeh de angel een chaage ob dem wata tell God say, “Ya de one true God, ya wa dey now an wa been dey fo dis wol been made. Ya do right fa true een de way ya jedge dem ting yah!
6Dem people yah done been kill ya people an de prophet dem wa beena tell ya wod. Dey been mek dey blood ron so now ya done gim blood fa drink. Dey da got jes wa dey oughta git!”
7Den A yeh de alta da taak say, “Fa true, Lawd God wa got powa mo den all! Ya da jedge right, an ya da taak true all de time!”
8Den de angel wa mek fo, empty out e bowl pon de sun. An e leh um hab powa fa bun people wid e sunhot.
9De people wa de sun beena bun, dey cuss de name ob God, wa got tority fa stop dem real bad ting yah wa mek people suffa so. Bot de people ain wahn fa change dey ebil way an dey ain wahn fa praise God.
10Den de angel wa mek fibe empty out e bowl pon de trone ob de beast. All oba de place weh de beast beena rule, de daak kiba ebryting. People da suffa real bad pain, wa mek um bite dey tongue.
11Dey cuss God een heaben fa de pain wa dey beena suffa an dem sore wa buss out pon um. Bot stillyet, dey ain wahn fa change de ebil way.
12Den de angel wa mek six empty out e bowl pon de big riba dey call Euphrates. Dat riba dry op, dat mek a way fa de king dem wa come outta dey country wa dey een de east.
13Den A see shree ebil sperit wa look like frog. Dey come out fom de dragon mout, de beast mout an de mout ob dat man wa say e God prophet da taak God wod. Bot e ain.
14Dem sperit yah come fom Satan. Dey da do lyin miracle. An dey go out ebryweh fa meet wid de king dem wa da rule oba all de wol. Dey go fa call um all togeda fa fight de waa ginst God wa gwine happen on dat big day wen God, wa got powa mo den all, gwine show e powa.
15De Lawd say, “Listen ta me! A da come all ob a sudden, jes like wen tief da come! E bless fa true wa ain sleep an wa keep e cloes wid um, ready fa weah, so dat e ain gwine haffa waak roun nekid an be too shame een front ob people.”
16Den de shree ebil sperit dem geda de king dem togeda een de place dey call “Armageddon” een Hebrew.
17Den de angel wa mek seben empty out e bowl eenta de air. A loud boice taak loud fom de trone een God House een heaben say “All ting done done!”
18Lightnin cut an loud noise staat op, tunda crack an de groun tremble real bad. soy wen God mek people, de groun ain neba tremble so bad. Dis de time wen e tremble bad mo den all!
19Wen de groun tremble so, de big city broke op eenta shree paat, an dem city ob all de nation been stroy. God ain fagit de big city wa dey call Babylon. E mek de people ob dat city drink de bitta wine wa e mek fa um. Dat wine, e de punishment wa e da punish dem wid cause e bex fa true cause ob all de bad ting dey do.
20All dem islant gone way an all dem high hill ain no mo.
21Big hailstone rain down fom heaben pon de people. Dem hailstone real big. Ebry one ob dem been weigh like one hundud pound. An de people cuss God cause dem hailstone rain down pon um an mek um suffa real bad.