Dual PanelDe Message ta de Choch een Ephesus
1“Write dis message yah an sen um ta de angel ob de choch een Ephesus: “Dis de message yah wa de poson wa hole de seben staa een e right han an wa da waak mongst de seben gole lampholda, sen.
2A know all de ting dem wa oona da do. A know oona wok haad, an A know how oona kin beah op wen trouble come. A know oona ain willin fa leh bad people stay dey wid oona. Oona quizzit dem people wa say dey be postle bot ain tall. Oona been see dat dey da lie.
3Oona da suffa trouble an da beah plenty fa sake ob me name cause oona da folla me. An oona ain got weary. Oona ain stop da folla me.
4Stillyet, one ting dey wa A blame oona fa. Oona lef off da lob me like oona beena lob me at fus.
5So den, oona mus memba de way oona beena lob me fo, how faa down oona done fall! Oona mus be saary fa oona sin an change oona way. Mus do jes like oona done at fus. Ef oona ain change oona way, A gwine come ta oona an a gwine pull oona lampholda outta weh e dey.
6Bot one ting A praise oona fa. Oona hate dem bad ting wa dem people wa da folla Nicolas, da do. Oona hate um jes like A mesef hate um.
7“Oona got yea fa yeh, ainty? Den oona oughta yeh wa God Sperit da tell de choch dem. Dem wa still stan scrong atta Satan done try um, A gwine leh dem nyam fom de tree wa da gii life, dat tree wa da grow een de gyaaden God mek.”
De Message ta de Choch een Smyrna
8“Write dis message yah an sen um ta de angel ob de choch een Smyrna:” “Dis de message yah wa de one wa de Fus an de Las, de one wa done dead an e da lib gin, e de one wa sen fa tell oona.
9E say, ‘A know oona da suffa plenty trouble. A know oona ain got much, bot fa true oona rich een Christ! A know too bout dem wa say dey Jew people, bot dey ain no Jew tall. Dey da lie, taak bad ginst oona. Bot dey blongst ta dem wa da folla Satan.
10Oona mus dohn fraid ob nottin wa oona gwine suffa. A da tell oona, de debil gwine try oona fa see ef oona bleebe God fa true. E gwine pit some ob oona een de jailhouse. Ten day oona gwine suffa plenty. Bot oona mus dohn neba stop fa bleebe pon me, eben ef dat mean oona gwine dead fa me sake. Cause A gwine gii oona de crown ob life, life wa neba end.
11“Oona got yea fa yeh, ainty? Den oona oughta yeh wa God Sperit da tell de choch dem. “Dem wa still stan scrong atta Satan done try um, de secon dyin ain gwine tetch um.
De Message ta de Choch een Pergamum
12“Write dis message yah an sen um ta de angel ob da choch een Pergamum: “Dis de message yah wa de one wa got de swod wa shaap on two side, e sen tell oona.
13E say, ‘A know weh oona lib. Oona dey weh Satan got e trone. Bot A know oona keep on da folla me fa true. Oona ain neba stop fa bleebe pon me. Jurin de time wen Antipas dey, wen e beena show people fa true dat e da folla me, dey kill um dey weh oona dey an weh Satan dey too. Dat ain neba mek oona stop fa bleebe pon me.
14Bot some ting dem dey wa A blame oona fa: Some ob de people dey mongst oona da do de ting dem wa Balaam beena tell people fa do. E beena laan Balak how fa trap de Israel people an mek um sin. E been git um fa nyam meat wa people done been offa fa sacrifice fa woshup idol ting wa people mek fa be dey god. An e been git dem fa lib free life.
15Oda people mongst oona da do dem same ting wa dem wa da folla Nicolas da do.
16Now den, oona mus be saary fa oona sin an change oona way. Ef oona ain change oona way, A gwine come ta oona soon. A gwine tek dis swod wa dey een me mout an fight ginst de people dem wa da do dem bad ting yah.
17“Oona got yea fa yeh, ainty? Den oona oughta yeh wa God Sperit da tell de choch dem! “De people wa still stan scrong atta Satan done try um, A gwine gii ebry one ob um some ob dat food dey call manna wa people ain see now. Den too, A gwine gim one white stone wid nyew name wa write pon um. Nobody ain gwine know de name wa write pon de stone cep de poson wa A gii dat name ta.”
De Message ta de Choch een Thyatira
18“Write dis message yah an sen um ta de angel ob de choch een Thyatira: “Dis de message yah wa God Son sen. E eye dem shine like fire, an e foot shine jes like brass wa dey been bun een furnace an den shine um op.
19A know de ting dem wa oona da do. A know oona lob people an oona ain neba stop fa bleebe pon me. A know de way oona da wok an oona da beah o onda all oona suffrin. An A know oona da do mo now den oona done fo.
20Stillyet, one ting oona da do wa A da blame oona fa. Oona leh dat ooman Jezebel, wa say e a prophet fom God, stay dey mongst oona. E da say dat by God powa e da laan dem wa da saab me. Bot e da lie ta me people, an dat lie mek um lib free life an mek um nyam meat wa people done been offa fa sacrifice fa woshup idol.
21A been lef dat ooman hab a leetle time so e got chance fa ton fom e ebil way. Bot e ain wahn fa change e way.
22So den look yah! A gwine mek um tek sick an leddown pon e bed weh e gwine suffa. An A gwine mek dem wa lib free life wid Jezebel suffa plenty fa true, ef dey ain stop fa do dem ebil ting wa dey da do wid um.
23A gwine scrike e chullun dead. Dat gwine mek all de choch dem know dat A de one wa know wa all people da tink an A da see eenside dey haat. A gwine gii all people dey payback fa wasoneba dey do.
24“Bot oona de odares dey een Thyatira, oona ain do dem ebil ting wa Jezebel laan people fa do. Oona ain laan dem ebil ting wa some people call Satan deep secret. A da tell oona say, A ain gwine lay no oda burden pon oona.
25Bot til A come back, oona mus keep on da bleebe fa true all dem ting wa oona done laan.
26De people wa stan scrong atta Satan try um an still da do dem ting wa A wahn um fa do til de end come, A gwine gii dem tority oba dem nation.
27A gwine gim tority jes like wa me Fada done gii me. Dey gwine tek iron club an rule oba dem nation yah, an dey gwine broke um all op jes like clay pot wa poson heabe down.
28An A gwine gii dem de maanin staa.
29“Oona got yea fa yeh, ainty? Den oona oughta yeh wa God Sperit da tell de choch dem!”