Dual PanelDe Riba Weh de Wata Wa da Gii Life Beena Ron
1Den de angel show me de riba weh de wata wa da gii life beena ron. E beena shine bright an cleah jes like glass. An e da leh outta de trone ob God an ob de Lamb.
2De riba beena ron down de middle ob de main screet ob de city. De tree wa da gii life beena grow close ta de riba, one pon each side ob um. Tweb time a yeah dat tree dey da beah, one time ebry mont. An de leaf dem da heal de people ob de nation dem ob de wol.
3An nottin o nobody wa God say ain right gwine be dey dat city no mo. De trone ob God an ob de Lamb gwine be dey, an e saabant dem gwine woshup um dey.
4Dey gwine see God face, an e name gwine be dey pon dey forehead.
5Dey ain gwine neba be no night dey no mo. People ain gwine need no lamp dey. Dey ain gwine need no light fom de sun no mo. Cause de Lawd God gwine be dey light. An de people dem gwine rule like king faeba an eba.
Jedus Gwine Come Back Soon
6Den de angel tell me say, “Dem wod yah, dey true an people fa bleebe um. De Lawd God wa gii de prophet dem powa fa tell e message, e sen e angel fa come show e saabant dem de ting dem wa got fa happen soon.”
7Jedus say, “Listen op! A da come soon! Dey bless fa true, dey wa do dem ting yah wa been write een dis book bout wa gwine happen.”
8A John, an A done yeh dem ting yah. A done shim wid me own eye. An wen A yeh um an shim, A git down een front ob de angel wa been show me dem ting yah, fa woshup um.
9Bot de angel tell me soy, “Mus dohn do dat! A God saabant jes like ya an ya broda dem prophet da do, an like all dem wa da do dem ting wa been write down een dis book. Mus woshup God!”
10Den de angel tell me say, “Mus dohn keep dem wod yah wa been write down een dis book wa God tell ya, ta yasef! Mus leh people know um, cause de time wen dem ting yah gwine happen ain faaway.
11Leh de poson wa da do bad keep on da do bad. Leh de poson wa da do dem dorty ting keep on da do um. An leh de poson wa da do right keep on da do right, an leh de poson wa da waak all de time wid God keep on da waak wid God.”
12Jedus say, “Listen op! A da come soon! A da come fa gii ebry poson de payback wa e wok fa.
13A de Alpha an de Omega, de fus an de las, A de one wa staat all ting an A de one wa gwine end all ting.
14Dey bless fa true, dem people wa da wash dey cloes een de blood ob de Lamb fa mek um clean. Cause dey gwine git de right fa go shru de gyate dem eenta dat city dey. Dey gwine git de right fa nyam fom de tree wa da gii life.
15Bot de dog dem outside de city. Dem people wa da do black magic, dem wa da lib free life, dem wa da kill, dem wa da woshup dem ting wa dey mek fa deysef, an all dem wa da lob fa tell lie an keep on liein, all dem people yah ain gwine set foot eenside dat city dey.
16A Jedus an A done sen me angel fa go an tell oona dem ting yah so dat oona gwine tell um ta de Christian dem een dem choch. An de one wa ob King David chullun chullun dem. A de maanin staa wa da shine bright.”
17De Holy Sperit, an de Bride say, “Come!” Leh all dem wa yeh dem wod ya say, “Come!” Leh all dem wa tosty come. All dem wa wahn fa drink dat wata wa da gii life, leh um come an drink free.
De Last Wod Dem een Dis Book
18Fa true, A da waan all oona wa yeh dem wod yah wa God hab people write een dis book. De poson wa add sompin mo ta dem wod yah, God gwine mek dem real bad ting wa dey write bout een dis book, happen ta dat poson fa punish um mo an mo.
19An de poson wa tek sompin way fom dem wod yah wa God hab people write een dis book, God ain gwine leh dat poson git e paat ob wa de tree wa da gii life beah, an God ain gwine leh dat poson come eenside God City, wa dey write bout een dis book.
20De one wa da show dat dem ting yah true, e da say, “Fa true, A da come soon.” Amen. Lawd Jedus, Come!
21Leh de Lawd Jedus show God people how e good fa true.