Alkitab Mobile SABDA
[VER] : [GULLAH]     [PL]  [PB] 
 <<  Yohanes 10 >> 

De Paable Bout de Shephud

1Jedus say, “A tell oona fa true, de poson wa ain go shru de gyateway fa go eenside de sheep pen, bot climb een some oda side eenta weh de sheep dey, e a tief an a robba.

2De poson wa go shru de gyateway fa go eenside, dat de shephud, de one wa da mind de sheep fa true.

3De gyateman kin open op de gyate fa de shephud, an de sheep pay mind ta de shephud boice. De shephud call e own sheep name, one by one, an dey come ta um. E da waak head ob um, da lead um shru de gyateway outta de sheep pen.

4An wen de shephud done lead all ob e own sheep out shru de gyateway, e da waak head ob um. An dey da folla um, cause dey know e boice.

5De sheep ain neba gwine folla noda poson wa dey ain know. Fa true, dey gwine ron way fom noda poson, cause dey ain know dat poson boice.”

6Jedus tell dis paable yah ta de people, bot dey ain ondastan wa e mean fa say.

Jedus de Good Shephud

7So Jedus tell um gin say, “A tell oona fa true, A de gyate fa de sheep fa go shru.

8All dem people wa come fo me, dey tief an robba. An de sheep ain pay um no mind.

9A de gyate. Ebrybody wa go shru me fa go eenside, dey gwine be sabe. Dey gwine be free fa go een an come out fa go find green grass fa nyam.

10De tief jes come fa tief, fa kill an stroy. Bot A come so dat dey kin hab true life, so dat dey kin lib a life ob joy wa heap op an run oba.

11A de good shephud. De good shephud, e ready fa gii e life fa de sheep.

12De poson wa git pay fa mind oda people sheep, e ain no true shephud, an de sheep ain blongst ta um. So den, de poson wa de sheep ain blongst ta, wen e see de wolf da come, e gwine ron way an lef de sheep. Den de wolf gwine come een on dem sheep an grab hole ta one. An de res ob de sheep gwine ron all oba de place.

13De poson wa de sheep ain blongst ta, e gwine ron way cause e dey fa git pay fa e wok. So e ain cyah fa true bout no sheep.

14A de good shephud. Jes like de Fada know me an A know de Fada, same way so A know me own sheep an me own sheep know me. An A ready fa gii me life fa de sheep.

15(10:14)

16A hab oda sheep wa blongst ta me, bot dey ain een dis flock yah. A haffa bring dem too. An wen A taak ta um, dey gwine pay mind ta me too. So den, all de sheep gwine come togeda an dey gwine be one flock an hab one shephud fa mind um.

17Me Fada lob me cause A ready fa gii me life, so dat wen A shru wid dat, A gwine tek me life back op gin.

18Nobody ain gwine kill me ef A ain gree ta um. A de one wa gree fa leh um kill me. A got de powa fa gii me life, an A got de powa fa tek me life back op gin. Dat wa me Fada done chaage me fa do.”

19Wen de Jew people yeh dem wod wa Jedus say, dey ain been able fa gree mongst deysef gin.

20Heapa dem say, “A ebil sperit dey eenside dat man! E mad! Hoccome oona da listen ta um?”

21Bot oda dem say, “Ef a man got a ebil sperit eenside um, e ain gwine taak like dat! Ain no way a ebil sperit able fa mek de bline see, ainty?”

De People Ton Ginst Jedus

22Winta time done come, an de people gone ta Jerusalem fa de holiday dey call de Feas ob de Dedication.

23An Jedus been dey. E beena waak een God House, een de side dey call Solomon Porch.

24De Jew people geda roun um an aks um say, “How long ya gwine mek we wait? Ya mus tell we de plain trute so we kin ondastan ef ya de Messiah dat God done promise.”

25Jedus ansa um say, “A done tell oona, bot oona ain bleebe me. Dem miracle wa A da do een me Fada name, dey da show oona dat A de Messiah Christ.

26Oona ain bleebe me cause oona ain me own sheep.

27Me sheep pay mind ta wa A tell um. A know um, an dey da folla me.

28A gim life wa las faeba. Dey ain gwine neba dead. Ain nobody able fa tek um outta me han.

29Me Fada wa done gii me dem sheep, e hab powa mo bigga den all. Ain nobody able fa tek um outta me Fada han.

30Me an me Fada, we one.”

31Wen Jedus say dat, de Jew people pick op stone gin fa stone um.

32Jedus tell um say, “A done do plenty miracle wa oona see. An me Fada gii me powa fa do um. Whish one ob dem miracle mek oona wahn fa stone me?”

33De Jew people ansa um say, “We ain wahn fa stone ya fa none ob dem miracle wa ya done. We wahn fa stone ya cause ya da hole God cheap. Ya jes a man, bot ya da tek yasef fa be God!”

34Jedus ansa um say, “Een oona own Law, God say, ‘Oona god dem,’ ainty?

35We know dat wa dey done write een God Book true all de time. An God done say ta de people wa e gii e wod ta, dat dey god dem.

36Fa me own paat, me Fada done pick me fa do e wok an sen me fa come eenta de wol. So wa mek oona say A da hole God cheap wen A say A de Son ob God?

37Oona mus dohn bleebe me ef A ain da do wa me Fada da do.

38Bot ef A da do wa me Fada da do, eben dough oona ain bleebe me now, oona oughta bleebe cause oona see dem miracle wa A beena do. Cause ob dat, oona kin know fa sho an ondastan dat me Fada dey eenside me, an A mesef dey eenside me Fada.”

39Den de people try fa grab hole ta Jedus gin, bot e git pass um.

40Den Jedus cross back oba de Jerden Riba an gone ta de place weh John fus nyuse fa bactize people. An Jedus stay dey.

41Heapa people gone fa meet um dey. An dey da tell one noda say, “John neba done no miracle, bot all de ting wa e say bout dis man yah, all dem ting been true.”

42An a heapa people een dat place bleebe pon Jedus.


  Share Facebook  |  Share Twitter

 <<  Yohanes 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran