Alkitab Mobile SABDA
[VER] : [GULLAH]     [PL]  [PB] 
 <<  Yohanes 7 >> 

Jedus Broda dem Ain Bleebe pon Um

1Atta dat, Jedus gone all roun Galilee. E ain wahn fa go eenta Judea, cause de Jew leada dem wa lib oba dey beena look fa kill um.

2De Jew Feas ob Tabernacle been close.

3So Jedus broda dem tell um say, “Mus go way fom yah an go ta Judea, so dat de people wa da folla ya kin see dem miracle wa ya da do.

4Nobody ain gwine hide wa e da do wen e wahn people fa know um good. Ya da do dem miracle yah, so den, leh ebrybody een de wol know bout ya!”

5(Cause eben Jedus own broda dem ain bleebe pon um.)

6Jedus tell um say, “Fa oona, e ain matta wa time, bot de time ain right fa me yet.

7De people ob de wol, dey boun fa like oona. Bot dey hate me cause A keep on da tell um dat dey da do bad.

8Bot oona go head on ta Jerusalem fa de Feas. A ain gwine dey cause de time fa me ain right.”

9Atta Jedus say dat, e stay on een Galilee.

Jedus Go ta Jerusalem fa de Feas ob Tabernacle

10Atta Jedus broda dem done gone ta Jerusalem fa de Feas, Jedus gone dey too. E gone by esef so de people ain shim.

11De Jew leada dem beena look fa Jedus dey. Dey beena aks de people fa um say, “Weh dat man dey?”

12Plenty people een de crowd beena whispa bout Jedus. Some dem say, “Jedus one good man.” Oda dem say, “No, Jedus ain no good man. E da fool de people.”

13Bot nobody ain taak loud bout Jedus fa mek de crowd yeh cause dey been scaid ob de Jew leada dem.

14De holiday feas done beena gone bout haf way wen Jedus gone ta God House an staat fa laan de people dey.

15De Jew leada dem stonish, an dey aks say, “Hoccome dis man know so much wen e ain been ta school eben one day?”

16Jedus ansa um say, “E ain me own laanin. A da laan oona bout de one wa sen me. E tell me wa fa laan oona.

17Ebrybody wa wahn fa do wa God wahn, dey gwine know ef God da tell me wa A da laan people o ef wa A da taak da come jes fom me.

18De poson wa da tell jes wa da come fom esef, e da try fa mek people praise um. Bot de poson wa wahn fa mek people praise de one wa sen um, dat poson trute mout. E ain got no lie noweh bout um.

19Moses done gii oona de Law, ainty? Bot ain none ob oona da do wa de Law say. Wa mek oona da try fa kill me?”

20De crowd ob people ansa say, “Ya got a debil dey eenside ya! Who dat da try fa kill ya?”

21Jedus ansa um say, “Oona all been stonish wen A done one miracle.

22Stillyet, Moses done tell oona fa circumcise oona boy chullun (bot fa true Moses ain de one wa fus staat fa circumcise, de ole people fus staat fa do dat). So oona da circumcise boy chullun pon de Woshup Day.

23Now den, ef oona circumcise boy chullun pon de Woshup Day so dat oona kin keep de Law wa Moses gii oona, hoccome oona bex wid me cause A done mek a poson well pon de Woshup Day?

24Oona mus dohn jedge jes wa oona da see. Mus jedge how ting da fa true.”

Some People Aks Say, “Jedus de Messiah?”

25Den some de people dey een Jerusalem beena aks say, “Dis de man wa de Jew leada dem da try fa kill, ainty?

26Bot see yah, e da taak yah weh ebrybody yeh um, an dey ain say nottin ginst um! Ya spose de Jew leada dem know fa true dat Jedus, e de Messiah?

27Bot wen de Messiah come, nobody ain gwine know weh e come fom, an we all know weh dis man come fom.”

28So wen Jedus beena laan de people een God House, e taak loud say, “Oona tink ya know me good, ainty? An oona tink ya know weh A done come fom. Bot A ain come yah on me own. De one wa sen me, e fa real, an oona ain know um.

29Bot A know um, cause A come fom um an e done sen me.”

30Den dey try fa grab hole ta Jedus an res um, bot ain nobody tetch um, cause de time fa tek um ain come yet.

31Stillyet, heapa people een de crowd bleebe pon Jedus. Dey say, “Wen de Messiah Christ come, e ain gwine do no mo miracle den wa dis man yah done do, ainty?”

Dey Sen Gyaad fa Tek Jedus Way

32De Pharisee dem yeh de crowd da whispa dem ting yah bout Jedus. So de Pharisee dem an de leada dem ob de priest, dey sen gyaad fom God House fa grab hole ta Jedus an res um.

33Jedus say, “A gwine stay wid oona jes a leetle wile longa. Den A gwine back ta de one wa sen me fa come eenta de wol.

34Wen dat time come, oona gwine look fa me bot oona ain gwine find me, cause oona ain able fa go ta de place weh A da gwine.”

35De Jew leada dem staat fa taak ta one noda say, “Weh dis man tink e da gwine weh we ain gwine find um? Ya tink e da gwine ta dem town weh de Jew people da lib mongst de people wa ain Jew, fa laan dem wa ain Jew dey?

36Dis man say, ‘Oona gwine look fa me, bot oona ain gwine find me.’ An e say, ‘Oona ain able fa go ta de place weh A da gwine.’ Wa e mean fa say?”

De Wata wa da Gii Life

37De las day ob de holiday feas been a big day, mo big den all de oda day. Dat day Jedus stan op an say een a loud boice, “Ebrybody wa tirsty, leh um come ta me. Come drink.

38Dey done write een God Book say, ‘Ebrybody wa bleebe pon me, a heapa wata wa da gii life gwine keep da come out like a riba fom eenside dey haat.’”

39Jedus say dat bout de Sperit wa all de people wa bleebe pon um gwine git. God ain gim e Sperit yet, cause e ain sen Jedus fa go op eenta heaben an git hona yet.

De People Spute bout Jedus

40Some people een de crowd yeh wa Jedus say, an dey say, “Fa true, dis man yah de prophet wa we beena look fa!”

41Oda people say, “Dis man yah de Messiah.” Bot some say, “De Messiah ain gwine come outta Galilee, ainty?

42Ain dey done write een God Book say de Messiah gwine come fom de fambly ob de people leada, King David? De Messiah gwine bon een Betlem, de town weh King David done lib, ainty?”

43So den, de people beena spute an tek side ginst one noda bout Jedus.

44Some ob de people beena wahn fa grab hole ta Jedus an res um, bot nobody ain tetch um.

De Jew Leada dem Ain Bleebe pon Jedus

45De gyaad dem fom God House come back ta de leada dem ob de priest an de Pharisee dem. An dem leada an Pharisee aks de gyaad hoccome dey ain bring Jedus ta um.

46De gyaad dem ansa say, “Nobody ain neba taak like dis man yah.”

47De Pharisee dem say, “Oona mean fa say dat Jedus done fool oona, too?

48Oona ain neba know no Jew leada needa no Pharisee wa bleebe pon Jedus, ainty?

49Dis crowd ob people yah ain know de Law wa God done gii Moses, so God gwine punish um!”

50Now den, one ob de Pharisee been Nicodemus. E de one wa been gone fa see Jedus fo all dis happen. Nicodemus taak ta e broda Pharisee dem.

51E say, “De Jew Law say we mus dohn condemn a poson fo we yeh wa dat poson got fa say, so dat we kin know wa e done, ainty?”

52Den e broda Pharisee dem ansa Nicodemus say, “Well, ya da taak like ya done come outta Galilee too. Tek time fa look at wa dey done write een God Book an ya gwine laan dat dey ain no prophet wa eba come outta Galilee.”

53[An all ob um gone ta dey own house.]


  Share Facebook  |  Share Twitter

 <<  Yohanes 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran