Dual PanelDe Ooman wa Been wid a Man wa Ain E Husban
1[Jedus gone ta de Mount ob Olib.
2Day clean de nex day, Jedus gone back ta God House. All de people geda roun um an e seddown an e da laan um.
3De Jew Law teacha an de Pharisee dem bring one ooman wa dey done ketch da sleep wid a man wa ain e husban. Dey mek de ooman stan op fo all de people.
4Den dey tell Jedus say, “Teacha, dey done ketch dis ooman da sleep wid a man wa ain e husban.
5We Jew Law wa God gii Moses chaage we fa stone ooman like dis til e dead. Wa ya say bout dat?”
6Dey say dat fa yeh wa Jedus gwine say. Dey da try fa mek Jedus say sompin so dat dey kin cuse um, say e ain ansa right. Bot Jedus stoop down an write pon de groun wid e finga.
7De Law Teacha an de Pharisee dem keep on da aks Jedus bout dat, so Jedus stan op an say, “Ef one ob oona yah ain neba sin, leh dat poson chunk de fus stone pon dis ooman.”
8Den Jedus stoop down gin an write pon de groun.
9Wen dey yeh wa Jedus say, dey all done lef dey, one by one. De ole one dem fus come outta dey. Den de nyoung one dem. So den jes Jedus been lef, an de ooman beena still stan op dey.
10Jedus stan op an aks de ooman say, “Weh all de people? Ain nobody yah fa condemn ya?”
11De ooman ansa say, “Ain nobody yah, sah!” Jedus tell um say, “A ain gwine condemn ya needa. Ya kin go now, bot mus dohn sin no mo.”]
Jedus de Light ob de Wol
12Wen Jedus taak gin ta de people, e say, “A de Light ob de wol. De one wa da folla me gwine hab de light wa da gii life an e ain gwine neba waak een de daak.”
13De Pharisee dem say, “Ya jes da taak bout yasef. Nobody ain yah fa stan fa ya, so wa ya da say ain mean nottin.”
14Jedus ansa um say, “Ain nobody yah fa stan fa me. Bot A da taak true, cause A know weh A done come fom an weh A da gwine. Oona ain know weh A come fom an oona ain know weh A da gwine.
15Oona da jedge like how people jedge oda people. A ain jedge nobody.
16Bot ef A fa jedge people, A gwine jedge um scraight. Cause ain jes me wa gwine jedge um. Me Fada wa sen me, e yah wid me.
17Een oona own Jew Law dey write say, wen two people say de same ting bout wa happen, dat mean dey da taak true.
18A da stan fa mesef, an me Fada wa sen me, e da stan fa me.”
19Dey aks um say, “Weh ya Fada dey?” Jedus ansa, “Oona ain know me an oona ain know me Fada. Ef oona been know me, oona been gwine know me Fada, too.”
20Jedus say dem wod yah wen e beena laan de people een God House, eenside de room weh de collection box been. Bot nobody ain res um cause de time fa res um ain come yet.
Oona Ain Able fa Go Weh A da Gwine
21Jedus tell de people gin say, “A gwine off. Oona gwine look fa me, bot oona gwine dead wid all oona sin. Oona ain able fa gone ta de place weh A da gwine.”
22So de Jew leada dem say, “Dis man say we ain able fa gone ta de place weh e da gwine. Oona tink dat mean e gwine kill esef?”
23Jedus ansa um say, “Oona blongst ta dis wol yah, bot A come fom heaben. Oona come fom dis wol, bot A ain come fom dis wol.
24Dat wa mek me tell oona say, oona gwine dead wid all oona sin. Ef oona ain bleebe dat A de one A say A da, fa sho oona gwine dead wid oona sin.”
25Dey aks Jedus say, “Who ya da?” Jedus ansa say, “A de one A say A da. A beena tell oona fom de time wen A fus staat da taak ta oona.
26A hab a heapa ting fa say bout oona, an a heapa ting fa jedge oona fa. Bot de one wa sen me, e fa real. An A da tell de people een de wol jes wa e tell me.”
27Dey ain ondastan dat Jedus beena tell um bout de Fada wa dey een heaben.
28So den Jedus tell um say, “Wen oona lif op de Man wa Come fom God, den oona gwine know who A da. Oona gwine know dat A ain do nottin on me own. A jes say wa de Fada laan me fa say.
29An de one wa sen me, e dey wid me. E ain lef me ta mesef, cause all de time A da do jes wa e wahn me fa do.”
30Plenty people wa yeh Jedus say dem wod yah, dey bleebe pon um.
Free Man an Slabe
31So den Jedus tell de Jew dem wa bleebe pon um say, “Ef oona keep on da do all wa A tell oona fa do, oona me ciple fa true.
32Den oona gwine know de trute, an dat trute gwine mek oona free.”
33Dey ansa Jedus say, “We de chullun ob Abraham. We ain neba been nobody slabe. So hoccome ya da tell we, ‘Oona gwine be free?’”
34Jedus ansa um say, “A tell oona fa true, ebrybody wa sin, dey de slabe ta sin.
35Slabe ain blongst ta e massa house faeba, bot de son blongst ta e fada house faeba.
36So ef God Son mek oona free, den oona gwine be free fa true.
37A know oona de chullun ob Abraham. Stillyet, oona da try fa kill me cause oona ain wahn fa do wa A tell oona.
38A da tell oona bout dem ting wa God me Fada done show me, bot oona da do wa oona own fada done tell oona fa do.”
39Dey ansa Jedus say, “Abraham we fada.” Jedus tell um say, “Ef oona been Abraham chullun, oona fa do dem same ting wa Abraham been do.
40A da tell oona jes dem true wod wa A yeh fom God. Stillyet, oona da try fa kill me. Abraham ain do nottin like dat.
41Oona da do wa oona true fada do.” An dey tell Jedus say, “God esef we onliest Fada. We ain no chullun on de side.”
42Jedus say, “Ef God been oona Fada fa true, oona been gwine lob me. Cause A done come fom God fa come yah. A ain jes come on me own, bot me Fada God sen me.
43Hoccome oona so haad head dat oona ain ondastan wa A da say? Oona ain ondastan cause oona ain wahn fa yeh wa A da tell oona.
44De Debil, e oona fada, an oona wahn fa do wa oona fada wahn. Fom way back wen time staat, de Debil beena kill people. An e ain like nottin true cause dey ain nottin true bout um. Weneba e tell lie, dat jes da show how e da, cause e da tell lie all de time. An e de one weh de lie fus staat.
45Bot A da tell de trute. Cause ob dat, oona ain bleebe me!
46Ain eben one ob oona kin proobe dat A done sin, ainty? So den, ef A da tell de trute, hoccome oona ain bleebe me?
47Poson wa blongst ta God da listen ta God wod. Bot oona ain blongst ta God, an dat hoccome oona ain listen ta God wod.”
Jedus an Abraham
48De Jew people aks Jedus say, “Ain we tell de trute wen we say ya come fom Samaria an ya got a ebil sperit dey eenside ya?”
49Jedus say, “A ain got no ebil sperit, bot A gii hona ta me Fada. An oona ain gii me no hona tall.
50A ain try fa mek people gii me hona. Bot dey one wa gwine gii me hona, an e gwine jedge scraight.
51A tell oona fa true, ebrybody wa do wa A da laan um, dey ain neba gwine dead.”
52Den de Jew dem tell Jedus say, “Now we know fa sho dat ya got a ebil sperit dey eenside ya! Abraham done dead, an all de prophet dem dead. Stillyet ya say, ‘Ebrybody wa do wa A da laan um, dey ain neba gwine dead.’
53We fada Abraham done dead. Ya mean fa say dat ya mo bigga den Abraham? Dem prophet done dead too. Who ya spose fa be?”
54Jedus ansa um say, “Ef A gii hona ta mesef, dat ain nottin. Me Fada de one wa da gii hona ta me, an e de one wa oona da call oona God.
55Oona ain neba know um, bot A know um. Ef A say dat A ain know um, A been fa lie same like oona. Bot A know um, an A da do wa e say.
56Oona fada Abraham been too heppy cause God done show um de time wen A gwine come eenta de wol. Fo A bon, e done been know A gwine come, so e been heppy.”
57De Jew people say, “Ya ain fifty yeah ole yet. Hoccome ya say ya done see Abraham?”
58Jedus ansa um say, “A tell oona fa true, fo Abraham bon, ‘A da.’”
59Den de people pick op stone fa chunk pon Jedus, bot e hide an come out fom eenside God House.