Alkitab Mobile SABDA
[VER] : [KARO]     [PL]  [PB] 
 <<  1 Korintus 16 >> 

Penampat man perpulungen si i Jerusalem

1Kerna pepulung penampat guna perpulungen si i Judea, bahanlah bagi si kuaturken i bas perpulungen-perpulungen si lit i Galilea.

2Tep-tep wari Minggu sekalak-sekalak kam nerapken sada bagin i bas keuntungenndu, sue ras kengasupenndu. Pepulunglah e gelah asum aku reh pagi lanai man pepulungen.

3Kenca aku reh, kubereken pagi surat pengantar man kalak si nggo isetujuindu, jenari kalak enda isuruh maba pemerendu e ku Jerusalem.

4Janah adi penampatndu e cukup metunggung aku ikut naruhkenca ku jah, ras kami pagi berkat.

Rencana perdalanen Paulus

5Aku reh ndahi kam kenca kusiari Makedoni -- sabap ateku reh arah Makedoni.

6Ndekah sitik ateku ras kam, banci jadi kidekah musim mbergeh. Alu bage banci aku iperberkatndu guna nerusken perdalanenku, ntah ku ja gia pagi aku lawes.

7Ateku min i bas kerehenku ndahi kam ula aku singgah saja. Ngarap aku banci ndekah sitik ras kam, adi ibere Tuhan.

8Tapi seh ngayak wari Pentakosta i Epesus enda aku lebe.

9Sabap nggo talang pintun si mbelang man bangku guna ndahiken dahin si erguna, janah nterem pe si ngelawan.

10Adi reh Timotius, alo-alolah ia gelah ula metumbur iakapna, sabap ia pe erdahin guna Tuhan, bali ras aku.

11Ula ise pe mekarus nandangi ia, tapi peberkatlah ia, gelah mejuah-juah ia i bas nerusken perdalanenna, maka banci ia mulihken ndahi aku. Sabap aku ngarapken kerehenna ras senina-senina si deban.

12Kerna seninanta Apolos, nggo piga-piga kali kupindoken gelah reh ia ndahi kam ras senina-senina si deban, tapi seh asa genduari la ia nggit. Tapi adi lit piga kesempaten si mehuli tentu reh nge ia ndahi kam.

Kata pendungi

13Erjaga-jagalah! Tetaplah erkiniteken! Bagi dilakilah kam, dingen megenggenglah!

14Kasa kai si ilakokenndu bahanlah e alu ate keleng.

15Ietehndu kerna Istepanus ras isi jabuna; ia me kalak Kristen si tangtangna i propinsi Akaya, janah nggo iendeskenna dirina guna nampati anak-anak Dibata. Kupindoken man bandu o senina-seninangku.

16Patuhlah kam man kalak si bage, bage pe man kerina kalak si latih erdahin ras ia.

17Meriah ukurku kerna kerehen Istepanus, Portunet, ras Akaikus, sabap ia reh jadi gancihndu.

18Malem kal ateku ibahanna bagi malemna atendu ibahanna. Kalak si bagi enda patut iergaken.

19Perpulungen-perpulungen si i daerah Asia ngataken mejuah-juah man bandu. Akuila ras Persila bage pe perpulungen si pulung i rumahna ngataken man bandu mejuah-juah i bas Tuhan.

20Kerina senina si sada kiniteken i jenda ngataken mejuah-juah man bandu. Sisalam-salamenlah kam alu dem keleng ate bagi si ersenina.

21Alu tanku jine kusuratken enda man bandu: Mejuah-juah i bas aku nari, Paulus.

22Kalak si la erkeleng ate man Tuhan, kena sumpahlah ia! Maranatha -- Rehlah Kam o Tuhan kami.

23Lias ate Tuhan Jesus ras kam kerina gelah.

24Keleng ateku i bas Kristus Jesus ras kam kerina gelah.


  Share Facebook  |  Share Twitter

 <<  1 Korintus 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel