Dual Panel1Arah perentah TUHAN sekalak nabi i Juda nari lawes ku Betel janah seh ia i je tupung Jerobeam sangana tedis deherken batar-batar nehken persembahen.
2I bas perentah TUHAN ernubuat me nabi kerna ukumen si reh man batar-batar e nina, "O batar-batar! O batar-batar! Enda me kata TUHAN: Sekalak danak-danak, si ibahan pagi Josia gelarna, tubuh pagi i bas keluarga kesusuren Daud. Igelehna pagi i babondu imam-imam si erdahin i bas ingan persembahen perbegu si erbahan persembahen i babondu, janah itutungna pagi tulan-tulan manusia i babondu."
3Jenari ikataken nabi ndai tole, "Batar-batar enda la banci lang pecah, janah abam si lit i babona mambur. Jenari tentu itehndu maka TUHAN nggo ngerana arah aku."
4Kenca ibegi Raja Jerobeam si enda, alu tan pinter ituduhna nabi ndai janah iperentahkenna nina, "Tangkap ia!" Rempet tan raja jadi lumpuh, emaka lanai banci irintakna mulihken.
5Batar-batar ndai pe rempet pecah janah abam mambur ku taneh, sue ras si nggo leben ikataken nabi ndai i bas gelar TUHAN.
6Emaka nina Raja Jerobeam man nabi, "Mekuah min atendu, ertotolah kam man TUHAN Dibatandu, janah pindolah maka IpepalemNa tanku!" Ertoto nabi man TUHAN, jenari malem minter tan raja.
7Emaka bage nina raja man nabi, "Mari ras kita ku rumah gelah ras kita man, kubereken ateku hadiah man bandu erkite-kiteken si nggo ibahanndu man bangku."
8Ngaloi nabi ndai nina, "Aminna iberekenndu pe man bangku setengah i bas kebayakenndu nari, labo aku nggit lawes ras kam, la ateku man ntah minem kai pe i bas ingan enda.
9Nggo ipedahken TUHAN man bangku maka la banci aku man ntah minem kai pe janah la banci aku mulih arah dalan si kubentasi muatku ku jenda."
10Emaka la ia mulih arah dalanna reh ndai, tapi arah dalan si deban.
Nabi si nggo metua i Betel nari
11Tupung si e lit sekalak si nggo metua ringan i Betel. Reh anak-anakna nuriken man bana kai si nggo ibahan nabi i Juda nari i bas wari e i Betel ras kai si nggo ikatakenna man Raja Jerobeam.
12"Arah dalan si apai ndai ia lawes?" Nina nabi si nggo metua e nungkuni anak-anakna. Ituduhkenna man bana dalan e.
13Jenari isuruhna anak-anakna namaken pelana ku das kaldena. Minter ibahan kalak ndai bage, jenari iersakna lawes,
14arah dalan ngikuti nabi si i Juda nari, janah idapetina sangana kundul i teruh batang kayu galang. "Kam nge nabi si i Juda nari e?" nina nungkun. "Aku," nina ngaloi.
15"Mari ku rumah gelah ras kita man," nina man bana.
16Tapi erjabap nabi si i Juda nari ndai nina, "Aku la banci mulihken ras kam ntah pe singgah arah rumahndu. Janah la ateku man ntah minem kai pe ras kam i jenda.
17Sabap nggo ipedahken TUHAN man bangku maka la banci aku man ntah minem kai pe janah la banci aku mulih arah dalan si nggo kubentasi asum aku reh."
18Kenca bage nina nabi si i Betel nari, si nggo metua e, "Aku pe nabi ka nge, bali ras kam, janah arah persuruhen TUHAN, sekalak malekat nuruh aku gelah ngelegi kam mulihken ras aku janah singgah i rumahku." Tapi situhuna erguak nge nabi si nggo metua e.
19Emaka nabi si i Juda ndai nari mulihken ku rumah ras nabi si nggo metua ndai jenari ras ia man.
20Tupung ia sangana man, reh kata TUHAN man nabi si nggo metua e.
21Jenari alu sora megang ngerana ia man nabi si i Juda nari ndai nina, "Ikataken TUHAN maka la ikutkenndu KataNa janah la ibahanndu kai si nggo IpedahkenNa!
22Tapi mulih kam jenari man kam i bas ingan si nggo IlarangNa. Erkite-kiteken si e mate kam la banci lang, janah kam la ikuburken i bas kuburen keluargandu."
23Kenca nggo elah man, ipasang nabi si nggo metua ndai pelana kalde nabi si i Juda nari,
24jenari iersak nabi Juda lawes. I tengah dalan jumpa ia ras sada singa, jenari ibunuh singa ndai ia.
25Piga-piga kalak si mentas ngidah mait e i bas dalan, ras singa ndai tedis iduruna. Terus kalak ndai lawes ku Betel jenari iturikenna kai si nggo idahna.
26Kenca nabi si nggo metua ndai megi berita kerna si e nina, "Eme nabi sinimbak pedah TUHAN! Emaka isuruh TUHAN singa njerngem ia ras munuhsa, sue ras si nggo ikataken TUHAN kerna si e."
27Jenari nina man anak-anakna, "Pasang pelana kalde man bangku." Minter ipasangna.
28Jenari iersakna lawes; idapetina mait nabi ndai ampar i tengah dalan, janah kalde ras singa ndai tedis denga i duruna. La ipan singa ndai mait e bage pe la ijerngemna kalde ndai.
29Ibuat nabi si nggo metua ndai mait e, itamakenna ku das kalde, jenari ibabana mulih ku Betel guna nangisisa ras nguburkenca.
30Ikuburkenna i bas kuburen keluargana jine, janah ia ras anakna nangisisa nina, "Oh seninangku, seninangku!"
31Kenca penguburen e nina nabi ndai man anak-anakna, "Adi mate aku, kuburken aku i bas kuburen enda rembak ras kuburenna.
32Kerina perkatan si nggo ibelaskenna bekas persuruhen TUHAN kerna batar-batar i Betel ras kerina ingan-ingan ersembah i bas kuta-kuta i daerah Samaria la banci lang jadi me."
Dosa Jerobeam si maba kecedan si mbelin
33Jerobeam raja Israel lalap lenga nggit robah i bas langkahna si jahat e nari, tapi terus denga iangkatna imam-imam i bas keluarga-keluarga si sembarangen nari guna erdahin i bas batar-batar si nggo ipajekkenna. Ise si nggit, itangkuhkenna jadi imam.
34Dosana e erbahanca maka kinirajanna ras kerina kesusurenna runtuh dingen masap.