Alkitab Mobile SABDA
[VER] : [KARO]     [PL]  [PB] 
 <<  1 Samuel 13 >> 

Perang ngelawan kalak Pilisti

1I bas sada wari kenca Saul jadi raja, ipilih Saul 3.000 kalak i bas bangsa Israel nari; 2.000 kalak tading ras ia i Mikmas ras i taneh deleng-deleng Betel; 1.000 kalak isuruhna ras anakna Jonatan ku Gibea, i bas daerah suku Benyamin. Kalak Israel si debanna isuruh Saul mulih.

2(1Sam 13:1)

3Jonatan munuh puanglima kalak Pilisti i Geba, janah kerina kalak Pilisti megi berita kerna si e. Kenca bage isuruh Saul pertenahen ndilo kalak Heber erperang alu ngembus terompet i bas kerina negeri e.

4Man kerina kalak Israel ituriken maka Saul nggo munuh puanglima Pilisti janah erkiteken si e nggo nembeh ate kalak Pilisti man kalak Israel. Emaka asum bangsa e idilo, minter ia nggit reh ngikutken Saul i Gilgal.

5Kalak Pilisti pe pulung guna erperang ras kalak Israel. Gereta perangna lit 30.000, tentera si erkuda 6.000. Tenterana pe nterem, bali buena ras kersik i tepi lawit. Lawes ia ku Mikmas, arah Timur Bet-Awen, emaka erkemah ia i je.

6Kenca bage iserangena kalak Israel alu mesangat. Perban e nggo mesera kecibalna. Erkiteken si e, deba kalak Israel cebuni i bas gua ras i bas lubang ntah pe i tengah-tengah batu deleng ntah i bas embang ras sumur;

7si deban lawes ngepari Lau Jordan, bengket ku bas daerah Gat ras Gileat. Saul i Gilgal denga, janah kalak si ras ia nggirgir ban biarna.

8Itimaina Samuel pitu wari sue ras si nggo ipedahken Samuel man bana, tapi Samuel lalap lenga reh ku Gilgal. Bangsa e nggo mulai nadingken Saul,

9emaka nina man kalak ndai, "Baba ku jenda persembahen tutungen, ras persembahen persadan." Emaka ipersembahkenna persembahen tutungen,

10janah enda denga dung ibahanna reh Samuel. Reh Saul ndarat njumpai ia ras ngalo-ngalosa,

11tapi nina Samuel, "Kai nggo ibahanndu?" Erjabap Saul nina, "Bangsa e nggo nadingken aku, janah kam la reh-reh i bas waktu si nggo itentuken; tambah si e kalak Pilisti sangana pulung i Mikmas.

12Emaka nina ukurku, 'Iserang kalak Pilisti atena aku i Gilgal enda, janah la nggo kucubaken mindo perkuah ate TUHAN.' Emaka tergejap i bas aku maka la banci la kusembahken sada persembahen."

13"Motu kal perbahanenndu e," nina Samuel. "La kam patuh man perentah Tuhan Dibatandu. Adi nggo ikutkenndu PedahNa tentu IbereNa kam ras kesusurenndu ngerajai Israel seh rasa lalap.

14Tapi genduari kinirajanndu la banci tetap. Erkite-kiteken nggo isimbakndu Ia, la banci la idarami TUHAN kalak si ngena AteNa janah Ia ngangkatsa jadi raja i bas BangsaNa."

15Lawes Samuel i Gilgal nari jenari iteruskenna perdalanenna. Kalak Israel si debanna ngikut ras Saul asum ia lawes ndahi tenterana. Lawes ia kerina i Gilgal nari ku Gibea i bas daerah Benyamin. Ipereksa Saul tenterana, teremna lit 600 kalak.

16Saul ras anakna Jonatan, bage pe anak buahna erkemah i Geba, i bas daerah Benyamin; kemah kalak Pilisti eme i Mikmas.

17Tentera kalak Pilisti ndarat erbahan serangen si rempet i bas inganna erkemah nari alu telu terpuk: sada terpuk lawes kempak Opra i bas daerah Sual.

18Si deban lawes kempak Bet-Horon janah si debanna ka lawes ku perbalengen si i babo Baluren Seboim ras taneh si mesawang.

19I bas taneh Israel la lit tukang besi erkite-kiteken ijaga kalak Pilisti tuhu-tuhu maka kalak Heber ula erbahan pedang ras lembing.

20(Adi itelapi kalak Israel atena gigi tenggalana, beliungna, kapakna, ras sabi-sabina, terpaksa ia lawes man kalak Pilisti.

21Upah nelapi kapak ras beliung eme sada sen, janah dua sen guna nelapi gigi tenggala ras cangkul.)

22Bageme maka i bas wari peperangen e la lit sekalak pe tentera bangsa Israel si erpedang ntah pe erlembing seakatan Saul ras Jonatan, anakna.

23Isuruh kalak Pilisti sada pasukan tentera guna mpertahanken dalan baluren Mikmas.


  Share Facebook  |  Share Twitter

 <<  1 Samuel 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel