Dual PanelPerang ras bangsa Amalek
1Nina Samuel man Saul, "Aku kap si isuruh TUHAN nangkuhken kam jadi raja i bas BangsaNa Israel. Emaka genduari begikenlah kai si ikataken TUHAN si Mada Kuasa.
2IukumNa AteNa bangsa Amalek sabap ilawan nini-ninina nai bangsa Israel tupung ia reh i Mesir nari.
3Laweslah kam nerang kalak Amalek jenari kernepkenlah kai si lit i bas ia. Sada barang pe ula tadingken; bunuh kerina dilaki, diberu, anak-anak, ras si mbaru tubuh; bage pe lembu, biri-biri, unta ras kalde."
4Emaka idilo Saul kerina tenterana pulung jenari ipepayona kerina i Telem: Lit 200.000 tentera i Israel nari janah 10.000 i Juda nari.
5Kenca bage ia ras tenterana lawes ku kuta Amalek jenari igempangina i bas sada lau belin si nggo kerah.
6Man kalak Keni isehkenna kata pertenget sabap kalak e nai mehuli man bangsa Israel asum ia reh i Mesir nari. Nina Saul man kalak e, "Laweslah kam, tadingken kalak Amalek, gelah ula kam pagi terbunuh aku radu ras ia." Emaka lawes minter kalak Keni.
7Italuken Saul kalak Amalek; iperangna mulai i Hawila nari terus ku Sur, arah Timur Mesir;
8itabanna Raja Agak geluh-geluhen, eme kap raja kalak Amalek jenari ibunuhna kerina bangsa e.
9Tapi ipelepas Saul ras tenterana Agak nggeluh. Janah la ibunuhna biri-biri ras lembu si mehulina, ras barang-barang si debanna si mehuli. Barang-barang si la terpake ntah pe si la meherga saja ngenca si ikernepkenna.
Saul ipengadi jadi raja
10Nina TUHAN man Samuel,
11"Erkadiola Aku ngangkat Saul jadi raja; nggo itadingkenna Aku janah lanai ikutkenna pedahKu." Erkiteken si e nembeh kal ate Samuel, janah gedang-gedang berngi meseksek pemindonna man TUHAN.
12Pepagina lampas ia berkat njumpai Saul. Ibegina maka Saul nggo lawes ku Karmel, i ja nggo ipajekkenna sada tugu peringet-ingeten kerna dirina jine, janah kenca e nggo ka ia lawes ku Gilgal.
13Emaka lawes Samuel ndahi Saul, ngalo-ngalo ia janahna ngerana nina, "TUHAN masu-masu kam Samuel! Nggo kusehken pedah TUHAN."
14Nungkun Saul nina, "Ngkai dage maka kubegi sora lembu ras sora biri-biri?"
15Erjabap Saul nina, "Ibuat tenterangku i bas kalak Amalek nari. Biri-biri ras lembu si mehulina la ibunuhna gelah ibahan jadi persembahen man TUHAN Dibatandu, janah si debanna e nggo keri kal ikernepken kami."
16"Sinikken," nina Samuel, "Kuturiken man bandu kai si ikataken TUHAN man bangku nderbi nai." "Turiken man bangku," nina Saul.
17Ngaloi Samuel nina, "Aminna gia iakapndu dirindu la penting, kam me kap peminpin suku-suku bangsa Israel. Itangkuhken TUHAN kam jadi raja Israel,
18jenari IsuruhNa kam berkat alu perentah gelah ikernepkenndu bangsa Amalek si jahat e. IsuruhNa kam erperang seh nggo ibunuhndu ia kerina.
19Ngkai dage maka la kam patuh man BaNa? Ngkai maka kurang pedas akap kam muat barang-barang rampasen, janah erkite-kiteken si e ibahanndu si la ngena ate TUHAN?"
20"Kuikutken kap kata TUHAN," nina Saul ngaloi. "Lawes nge aku sue ras si IperentahkenNa man bangku; sanga mulih kubaba Raja Agak, janah kubunuh kerina kalak Amalek."
21"Tapi la ibunuh tenterangku biri-biri ras lembu si mehulina si itabanna; si e kerina ibabana ku Gilgal enda gelah ibahan jadi persembahen man TUHAN Dibatandu."
22Nina Samuel, "Apai kin ulin iakap TUHAN: ngikutken KataNa ntah persembahen tutungen ras persembahen gelehen? Ulin ngikutken KataNa asangken mpersembahken biri-biri si mehulina man BaNa.
23Nimbak Tuhan bali kap jahatna ras ertendung man guru perdiwel-diwel, janah ukur meganjang bali dosana ras nembah man gana-gana. Erkiteken kam nggo ngelawan perentah Tuhan, kam pe ItulakNa jadi raja."
24"Nggo tuhu aku erdosa," nina Saul ngaloi. "La kuikutken pedah TUHAN ras ajarndu. Mbiar aku man tenteraku emaka kubahan bagi si ngena atena.
25Tapi genduari alu meteruk kupindo man bandu alemilah dosangku, jenari mulihlah ras aku ku Gilgal, gelah aku nembah man TUHAN."
26"La ateku mulih ras kam," nina Samuel njabapsa. "Itulakndu pedah TUHAN emaka nggo ItulakNa kam jadi raja Israel."
27Kenca bage erkusur Samuel, lawes atena. Tapi itagangi Saul jubahna emaka merigat minter.
28Nina Samuel man bana, "Nggo icaingken TUHAN kerajan Israel i bas kam nari sendah, janah IberekenNa man kalak si deban si ulin asa kam.
29Dibata bangsa Israel si mulia la perguak, dingen la ngobah UkurNa erkiteken Ia labo manusia."
30"Aku nggo erdosa," nina Saul ngaloi. "Tapi pehagandu min sitik aku i lebe-lebe peminpin rayatndu ras kerina bangsa Israel. Mulihlah ras aku kusembah TUHAN Dibatandu."
31Emaka mulih Samuel ras Saul ku Gilgal, jenari isembahna TUHAN.
32Kenca bage iperentahken Samuel nina, "Baba ku jenda Raja Agak, kalak Amalek." Reh Agak ndahi Samuel, nggirgir ia perban biarna. Rukur ia sisada, "Andiko pagitna kematen."
33Jenari nina Samuel man bana, "Bagi pedangndu nggo erbahan nterem nande-nande kebenen anak, bage me genduari nandendu kebenen anak." Jenari ikeret-keret Samuel me Agak i lebe batar-batar i Gilgal.
34Jenari lawes Samuel ku Rama, janah Raja Saul mulih ku rumahna i Gibea.
35Ngayak Samuel mate lanai pernah idahna raja e, tapi ceda kal atena erkite-kiteken Saul. Erkadiolakal TUHAN nggo ngangkat Saul jadi raja Israel.