Dual PanelDaud ipilih jadi raja
1Nina TUHAN man Samuel, "Asa kai nari dekahna atendu ceda kerna Saul? Nggo kutulak ia jadi raja Israel. Tapi genduari buatlah minak saitun jenari laweslah ku Betlehem ndahi Isai, sabap nggo Kupilih sekalak anakna jadi raja."
2"Uga banci kubahan si e?" nina Samuel nungkun. "Adi ibegi Saul kerna si e tentu ibunuhna aku!" Nina TUHAN njabapsa, "Babalah sada anak lembu jenari kataken maka kam reh ku je erbahan persembahen gelehen man TUHAN.
3Undang Isai ku lakon persembahen e, jenari Aku denggo ngatakenca kai si man bahanen. Tangkuhkenlah jadi raja kalak si Kutuduhken man bandu."
4Minter idahiken Samuel kai si isuruh TUHAN, jenari lawes ia ku Betlehem. Peminpin-peminpin kuta e alu nggirgir reh ngalo-ngalo ia janahna nungkun, "Ma dame nge kerehenndu enda?"
5"Dame" nina ngaloi, "Aku reh nehken persembahen man TUHAN. Bersihkenlah dirindu jenari ikutkenlah aku." Isai ras anakna pe isuruh mersihken dirina, jenari iundangna kerina ku bas lakon persembahen e.
6Kenca ia reh kerina, idah Samuel anak Isai, Eliap gelarna, jenari nina i bas ukurna, "Si enda, si tedis i jenda i bas adep-adepen TUHAN, la banci lang enda me si nggo IpilihNa."
7Tapi nina TUHAN, "Ula nehen uga gedangna ras uga jilena rupana. La ia Kupilih, sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna."
8Kenca bage idilo Isai anakna Abinadap janah ibabanna ngadap man Samuel. Tapi nina Samuel, "Ia pe langa ipilih TUHAN."
9Jenari ibaba Isai ka Sammah. "Lang, ia pe langa ka bo ipilih TUHAN," nina Samuel.
10Bagenda me ibaba Isai pitu kalak anakna ngadap man Samuel. Janah nina Samuel man bana, "Lang, sekalak pe langa ipilih TUHAN ia."
11Emaka nungkun Samuel nina, "Lit denga tole anakndu?" Nina Isai ngaloi, "Lit denga si nguda, tapi sangana ermakan biri-biri." "Suruh ia reh ku jenda," nina Samuel. "Langa banci sisehken persembahen enda adi langa ia reh."
12Emaka isuruh Isai kalak ngelegisa. Ia sekalak anak perana si mejile, sehat, janah matana pe mejile. Nina TUHAN man Samuel, "Enda me kalakna, tangkuhkenlah ia!"
13Ibuat Samuel minak saitun jenari iminakina Daud i lebe-lebe senina-seninana. Rempet Daud ikuasai Kesah TUHAN janah mulai i bas wari e nari Kesah e tetap ras ia. Kenca bage mulih Samuel ku Rama.
Daud i bas istana Saul
14Saul nggo itadingken Kesah TUHAN, janah isuruh TUHAN kesah si jahat nakiti ia.
15Nina suruh-suruhenna man bana, "Ieteh kami maka kesah si jahat si isuruh Dibata sangana nakiti kam.
16Emaka o Raja, perentahkenndulah man kami suruh-suruhenndu enda, gelah idarami kami kalak sibeluh ngkuit kulcapi. Adi reh kenca kesah si jahat e banci ikuitna minter kulcapina, maka malem ka akapndu mulihken."
17Iperentahken Saul man bana kerina, "Darami man bangku kalak si beluh ngkuit kulcapi jenari baba ngadap aku."
18Sekalak i bas suruh-suruhenna nari ngerana nina, "Isai i Betlehem nari, lit sekalak anakna si beluh kal ngkuit kulcapi. Ia pe sekalak si mbisa janah mejile rupana, ngasup erperang, janah seh kal beluhna ngerana, TUHAN ras ia."
19Emaka isuruh Saul piga-piga kalak persuruhen ndahi Isai guna nehken katana nina, "Suruhlah Daud anakndu si ermakan biri-biri ndahi aku."
20Isuruh Isai minter Daud ndahi Saul; isuruhna pe Daud maba sada kambing nguda, sada kalde guna maba roti, ras sada guci si ibahan i bas kuling-kuling nari, dem isin lau anggur.
21Reh Daud ndahi Saul janah jadi me ia sekalak suruh-suruhenna. Seh kal ate Saul ngenana man bana, emaka ipilihna Daud jadi si nganting senjatana.
22Kenca bage itenahken Saul berita man Isai nina, "Ngena ateku Daud, emaka pelepas ia tading i jenda jadi suruh-suruhenku."
23Mulai jenari, adi reh kenca kesah si jahat si isuruh Dibata ndahi Saul, minter ibuat Daud kulcapi jenari ikuitna. E maka lawes kesah si jahat e ernahangna akapna, janah malem ia mulihken.