Dual PanelIpindo Goliat kalak Israel ngimbangi ia
1Ipepulung bangsa Pilisti tenterana i Soko, sada kuta i Juda, erperang atena; ibahanna inganna erkemah i bas sada ingan, Epes Demin gelarna, kelang-kelang Soko ras Aseka.
2Saul ras kalak Israel pe pulung janah erkemah i Baluren Ela, i e ia nggo sikap ngelawan kalak Pilisti.
3Bangsa Pilisti erbaris i sada uruk janah bangsa Israel i uruk si deban; kelang-kelang kalak enda lit baluren.
4Lit me sekalak puanglima i kota Gat nari Goliat gelarna, ndarat i bas kemah bangsa Pilisti nari janah ipindona bangsa Israel ngelawan ia. Gedangna menam telu meter,
5janah ipakena baju tembaga si beratna kira-kira lima pulu pitu kilo ras sada topi tembaga.
6I bas nahena pe lit ampang-ampang tembaga, janah ipersanna sada lembing tembaga.
7Tangke lembingna asa binangun pertenunen belinna, babah lembingna ibahan i bas besi nari, beratna kira-kira pitu kilo. Sekalak tentera erdalan arah lebena maba ampang-ampangna.
8Goliat tedis janah erlebuh man kalak Israel nina, "Erkai kam i jenda? Erbaris guna erperang? Aku kap sekalak Pilisti, o budak-budak Saul! Pilih sekalak i bas kam nari ngelawan aku.
9Adi ia menang janah ibunuhna aku, kami jadi budak, tapi adi menang aku janah kubunuh ia kam jadi budak kami.
10I bas wari enda kulawan tentera bangsa Israel. Adi pang kam pilihlah sekalak si ngelawan aku!"
11Kenca ibegi Saul ras tenterana, lanai kal lang-lang biarna kerina.
Daud i bas ingan Saul erkemah
12Daud anak Isai sekalak Eperata i Betlehem nari i daerah Juda. Anak Isai lit waluh dilaki, janah asum Saul jadi raja, ia nggo seh kal tuana.
13Telu kalak anakna si mbelinna nggo lawes ras Saul ku perang e. Sintua eme Eliap, agina Abinadap, janah si peteluken Sammah.
14Daud anakna singuda, janah asum kakana si telu kalak ndai tetap tading ras Saul,
15itadingken Daud kakana janah rusur ia mulih-ulih ku Betelhem, mpermakani biri-biri bapana.
16Goliat tetap nggombangi bangsa Israel tep-tep erpagi-pagi ras karaben empat puluh wari dekahna.
17I bas sada wari nina Isai man Daud, "Buatlah sepuluh kilo buah gandum si isauk ras roti si sepuluh ngkibul enda, jenari pedas taruhken man kakandu i bas ingan erkemah.
18Janah babalah keju si sepuluh e man komendan pasukan. Pepayo uga kecibal kakandu jenari baba sada barang kai gia i jah nari tandana kam jumpa ras ia janah maka ia mejuah-juah nge.
19Raja Saul, senina-seninandu, ras kerina kalak Israel sangana i Baluren Ela erperang ngelawan bangsa Pilisti."
20Pepagina lampas keke Daud, isuruhna kalak si deban mpermakani biri-biri, ibuatna pangan e, jenari lawes ia bagi si isuruh Isai. Ia seh i bas ingan erkemah e rembang kal asum kalak Israel muat berkat ku barisen pertempuren, ersurakken surak perang.
21Tentera bangsa Pilisti ras tentera bangsa Israel ngatur barisen perangna, petala-tala dua mbelahna.
22Ibereken Daud pangan e man kalak si ngurus perbekalen tentera e, emaka kiam ia ku bas barisen pertempuren e, ijumpaina seninana, guna ngataken mejuah-juah man bana.
23Tupung ia ercakap-cakap denga ras seninana reh Goliat ku lebe ilawanna bangsa Israel bagi si nggo ibahanna ope si e, janah ibegi Daud ia.
24Kenca bangsa Israel ngidah Goliat, kiam ia kerina alu mbiar mesangat.
25"Nehenlah ia!" nina sapih-sapih ia. "Begikenlah uga gombangna ia man bangsa Israel! Raja Saul nggo erpadan mereken hadiah si mbelin man kalak si munuhsa. Anakna iserehkenna man bana janah kade-kade bapana lanai perlu nggalar pajak."
26Isungkun Daud kalak si lit isekelewetna nina, "Kai ibereken man kalak si munuh kalak Pilisti ah ras mulahi Israel i bas penggombangi kalak enda nari? Lang gia, ise ka kin kalak Pilisti si perbegu ah maka megombang ia man bala tentera Dibata si nggeluh?"
27Ituriken kalak ndai man bana uga perbahan man kalak si munuh Goliat.
28Eliap kaka tua Daud, megi Daud ngerana ras kalak ndai. Emaka merawa ia man Daud nina, "Erkai kam ku jenda? Ise si permakani biri-biri e i bas taneh si mesawang? Kam danak-danak si petua-tuaken! Ngenen-ngenen perang enda saja ngenca atendu ku jenda!"
29"Kai kin salahku?" nina Daud nungkun. "La kin banci aku nungkun pe?"
30Erkusur ia man kalak si deban janah isungkunna, janah bagi si ndai ka nge ningkalak bana.
31Lit piga-piga kalak si megi kai si ikataken Daud emaka iturikenna man Saul, janah minter isuruh Saul kalak ndilosa.
32Nina Daud man Saul, "O Raja, ise pe la aturenna mbiar man kalak Pilisti ah! Nta aku lawes gelah kulawan ia!"
33"Lang," nina Saul ngaloi. "Ja nge terlawanndu ia? Kam medanak denga, tapi ia nggo jadi tentera kitik-kitikna nari!"
34"O Raja," nina Daud, "aku kap si mpermakani biri-biri orangtuangku. Adi lit singa ntah beruang njerngem anak biri-biri,
35minter kuayaki, kupalu, janah kuselamatken anak biri-biri e. Janah adi singa ntah beruang e erkusur ngelawan aku, kutangkap minter kerahungna, kupalu seh mate.
36Singa ras beruang nggo kubunuh, janah bage ka me kari perbahanku man bangsa Pilisti si perbegu ah, si nggo nggombangi bala tentera Dibata si nggeluh.
37Nggo iselamatken TUHAN aku i bas singa ras beruang nari; tentu IselamatkenNa ka kari aku i bas bangsa Pilisti ah nari." "Adi bage kin merandal," nina Saul ngaloi. "To dage, TUHAN ras kam."
38Ipakeken Saul paken perangna jine man Daud, sada topi tembaga itamakenna i bas takalna, ras sada baju perang ipakekenna man bana.
39Igenditken Daud pedang Saul i bas baju perang e jenari icubakenna erdalan, tapi la banci perban la ia biasa make e kerina. "La aku banci erperang make si enda kerina," nina man Saul. "La kupake enda kerina." Emaka itangtangina kerina.
40Jenari ibuatna cikenna si biasa ipakena sanga ermakan janah kenca e ipilihna lima ngkibul batu si melinang i bas lau nari, itamakenna i bas tasna. Alu kalimbawang si sikap, luar ndahi Goliat.
Daud naluken Goliat
41Emaka reh bangsa Pilisti e erdalan ndahi Daud, janah kalak si maba ampang-ampangna erdalan arah lebena. Erdekahna erdeherna,
42janah kenca nggo tangkas idahna Daud, minter ia mekarus man bana sabap ia sekalak anak perana denga si mejile rupana.
43Nina man Daud, "Man kadendu ciken ena? Biang kin akapndu aku?" Kenca bage isumpahina Daud alu gelar dibatana.
44Erlebuh ia man Daud nina, "Mari maka kubereken dagingndu ipangani perik-perik ras rubia-rubia si meliar."
45Ngaloi Daud nina, "Kam reh ngelawan aku alu pedang, tumbak, ras lembing, tapi aku reh ngelawan i bas gelar TUHAN Si Mada Kuasa, Dibata bala tentera Israel, si nggo igombangindu.
46Sendah ibereken TUHAN kam ku bas tanku; kutaluken kam jenari kutampul kerahungndu. Janah daging tentera kalak Pilisti kubereken ipangani perik-perik ras rubia-rubia si meliar. Kenca e doni enda kerina meteh maka lit kepe Dibata i bas Israel,
47janah kerina si ijenda ngidah maka TUHAN la perlu pedang ntah tumbak guna ngkelini BangsaNa. Ia si permenang i bas perang, janah IberekenNa kam kerina ku bas kuasa kami."
48Erdalan ka mulihken Goliat kempak Daud, janah pedas-pedas Daud kiam kempak barisen perang kalak Pilisti ngelawan ia.
49Icekuhna tasna jenari ibuatna sada batu, ikalimbawangina Goliat. Kena perdempakenna emaka pecah takalna, jenari guling ia langkem i babo taneh.
50Dage alu la make pedang, Daud naluken ras munuh Goliat alu kalimbawang ras sada batu!
51Kiam Daud ndahi ia, iperjatna, isintakna pedang Goliat i bas sembungna nari, jenari itampulna kerahungna, mate minter. Kenca idah bangsa Pilisti maka nggo mate puanglimana kiam ia kerina.
52Bangsa Israel ras Juda ersurak janah iayakina bangsa Pilisti; ielis-elisna seh Gat ras ku pintu gerbang Ekron. Bangsa Pilisti si luka-luka amparen i gedang-gedang dalan ku Saarim, seh ku Gat ras Ekron.
53Nggo kenca bangsa Israel mulih i bas ngayaki bangsa Pilisti nari, irampasina kemahna.
54Ibuat Daud takal Goliat jenari ibabana ku Jerusalem, tapi isimpanna senjata Goliat i bas kemahna.
Daud ibaba ngadap Saul
55Asum Saul ngidah Daud lawes ngelawan Goliat, isungkunna Abner puanglima tenterana nina, "Abner, anak ise nge anak perana e?" "La kuteh o Raja," nina Abner njabapsa.
56"Adi bage to pepayo cuba," nina Saul mereken perentah.
57Emaka asum Daud mulih ku ingan erkemah kenca munuh Goliat, ibaba Abner ia ngadap Saul. Takal Goliat sangana denga ikanting Daud.
58Isungkun Saul nina, "Anak ise kam, o anak perana?" "Aku anak kawanndu Isai i Betlehem nari," nina Daud ngaloi.