Alkitab Mobile SABDA
[VER] : [KARO]     [PL]  [PB] 
 <<  1 Yohanes 4 >> 

Kesah si benar ras si la benar

1O kam si kukelengi, ula kam tek man kerina kalak si ngaku maka i bas ia lit Kesah Dibata. Tapi ujilah lebe guna metehsa ntah kin payo kesah si lit i bas ia e rehna i bas Dibata nari. Sabap nggo nterem nabi perguak i japa pe.

2Bagenda me dalanna metehsa ntah kin payo kesah e Kesah Dibata: kalak si ngakui maka Jesus Kristus reh ku doni enda selaku manusia, kalak si bage lit i bas ia Kesah si rehna i bas Dibata nari.

3Tapi kalak si la ngakui si enda ndai kerna Jesus, la lit i bas ia kesah si rehna i bas Dibata nari. Kesah si lit i bas ia e, e me kesah si rehna i bas musuh Kristus nari. Kerna si enda nggo ibegindu maka reh me ia, janah genduari nggo ia lit i bas doni enda.

4Tapi kam sikerajangen Dibata kap, o anak-anakku. Nggo italukenndu nabi-nabi perguak e, sabap Kesah si lit i bas kam gegehen asa kesah si lit i bas kalak sikerajangen doni si jahat enda.

5Nabi-nabi perguak e ngerana kerna perkara-perkara doni, janah doni enda megiken cakapna sabap ia sikerajangen doni enda.

6Tapi kita sikerajangen Dibata kap. Ise si nandai Dibata ibegikenna cakapta; ise si la nandai Dibata la ibegikenna cakapta. Dage bagenda me dalanna metehsa lainna Kesah si tuhu-tuhu si rehna i bas Dibata nari ras kesah si la tuhu-tuhu si mabai kalak papak.

Dibata kekelengen kap

7O kam si kukelengi, sikeleng-kelengenlah kita, sabap kekelengen e rehna i bas Dibata nari kap. Kalak si erkeleng ate, anak Dibata kap ia janah itandaina Dibata.

8Kalak si la erkeleng ate, labo itandaina Dibata, sabap Dibata kekelengen kap.

9Dibata nggo ncidahken KekelengenNa man banta alu nuruh AnakNa Si Tonggal ku doni enda, gelah kita nggeluh arah Ia.

10Enda me kekelengen e: labo kita si nggo ngkelengi Dibata, tapi Ia nge si ngkelengi kita. Emaka IsuruhNa AnakNa ku doni enda gelah arah Ia kita iperdameken ras Dibata alu ngalemi dosa-dosanta.

11O kam si kukelengi, adi bagenda kin kelengna ate Dibata man banta, kita rutang sikeleng-kelengen sapih-sapih kita.

12Aminna ise pe la nggo ngidah Dibata, tapi adi sikeleng-kelengen kita, Dibata ringan i tengah-tengahta janah KekelengenNa jadi serta i tengah-tengahta.

13Alu bage sieteh kita ringan i bas Dibata, janah Dibata ringan i bas kita, sabap nggo kita dat bagin i bas Kesah si IberekenNa man banta.

14Janah nggo siidah ras siberitaken man kalak si deban maka Bapa nggo nuruh AnakNa ngkelini doni enda.

15Adi lit kalak si ngatakenca maka Jesus e me Anak Dibata, Dibata ringan i bas ia janah ia ringan i bas Dibata.

16Janah kita jine nggo meteh janah tek nandangi kekelengen Dibata man banta. Dibata kekelengen kap, janah ise si erkeleng ate ia ringan i bas Dibata janah Dibata ringan i bas ia.

17Kekelengen e ibahan jadi serta i bas kita gelah kita la mbiar jumpa ras Dibata i bas Wari Pengadilen. La kita mbiar sabap kegeluhenta i bas doni enda bali ras kegeluhen Kristus sangana Ia i doni enda denga.

18I bas keleng ate la lit kebiaren. Kekelengen si serta erbahanca kita lanai mbiar. Ukumen nge si erbahanca turah kebiaren; emaka kalak si mbiar denga, e tandana langa lit i bas ia keleng ate si serta.

19Kita ngkelengi, sabap leben Ia ngkelengi kita.

20Adi lit kalak si ngatakenca maka keleng atena Dibata, tapi nembeh atena man seninana, kalak si bage perbual. Sabap kalak si la ngkelengi seninana si idahna, labo tuhu ia ngkelengi Dibata si la idahna.

21Enda me perentah si nggo sialoken i bas Kristus nari: ise si ngkelengi Dibata, arus maka ikelengina pe seninana.


  Share Facebook  |  Share Twitter

 <<  1 Yohanes 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran