Alkitab Mobile SABDA
[VER] : [KARO]     [PL]  [PB] 
 <<  2 Korintus 6 >> 

1Kami selaku teman Tuhan erdahin mindo man bandu: gelah ula isia-siakenndu lias ate Dibata e si nggo ialokenndu.

2Begikenlah kai si ikataken Dibata i bas Pustaka Si Badia, "I bas paksa si mehuli Kuakap nggo Kubegiken kam. I bas wari keselamaten, nggo Kusampati kam." Nehenlah! Genduari kap paksa si mehuli e, janah genduari kap wari keterkelinen e!

3La pernah tondel ukur ise pe ibahan kami, gelah dahin Tuhan la tersalahken kalak.

4Tapi i bas kerina perbahanen kami icidahken kami maka kami si erdahin Dibata kap. Si enda icidahken kami arah megenggeng i bas ngenanami kiniseran-kiniseran, kepiceten, ras kebiaren.

5Megenggeng kami asum kami ipekpeki, ipenjaraken, bage pe iurup kalak. Megenggeng kami i bas latih erdahin, la tunduh, janah erpuasa.

6Icidahken kami maka kami si erdahin Dibata alu kinibujuren, alu pemeteh kami, alu ate saber, alu kiniulin, alu penampat Kesah Si Badia, alu keleng ate si tuhu-tuhu.

7Alu meritaken berita si tuhu-tuhu janah alu gegeh si rehna i bas Dibata nari. Kinibujuren ipake kami jadi senjata kami, subuk i bas ngelawan bage pe i bas njaga diri kami.

8Kami ipehaga bage pe igombang-gombangi; kami ipuji bage pe ihina. Bujur pe kami, ikataken kalak nge kami perbual.

9Kami tempa la itandai, tapi kerina kalak nandai kami. Kami tempa nggo mate, tapi bagi idahndu, nggeluh denga nge kami. Kami iligas alu kiniseran, tapi la kami mate.

10Aminna pe ceda ate kami, lalap nge kami ermeriah ukur. Kami tempa-tempa musil, tapi nggo nterem kalak jadi bayak ibahan kami. Tempa-tempa la lit kai pe i bas kami, tapi si tuhuna kai pe lit nge i bas kami.

11O kalak Korinti! Nggo terang-terangen kami ngerana man bandu. Pusuh peraten kami nggo talang man bandu.

12Keleng ate si lit i bas pusuh kami italangi kami kap man bandu, tapi keleng ate si lit i bas pusuhndu la italingindu man kami.

13Genduari gelah bujur, selaku balasna kupindoken man bandu: talangilah pusuh peratenndu man kami. Enda kukataken man bandu bali ras man anakku jine.

Pertenget nandangi pengaruh kalak si la tek

14Ula kam nggit teriket i bas sada pasangen ras kalak si la tek man Tuhan. Ja nge banci kebenaren erkongsi ras kejahaten! Ja nge banci terang ersada ras gelap!

15Banci kin ersadakata Kristus ras Iblis? Kai kin perkongsin kalak si tek ras kalak si la tek man Tuhan?

16Banci kin sada tujunna Rumah Pertoton Dibata ras berhala? Sabap kita kap Rumah Pertoton Dibata, si nggeluh. Bagi nina Dibata, "Nggeluh me aku ras ia janah ringan aku i tengah-tengahna. Aku me jadi Dibatana janah ia jadi bangsangKu."

17Bage pe tole, "Nina Tuhan 'Ndaratlah kam i tengah-tengahna nari, janah peserap bandu i bas ia nari. Ula kuit si la bersih, maka Kualoken kam.

18Aku me jadi Bapandu, janah kam jadi anakKu si dilaki ras si diberu,' bage me nina Tuhan si Mada Kuasa."


  Share Facebook  |  Share Twitter

 <<  2 Korintus 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel