Dual PanelKemberahen Atalia i Juda nari (2Taw 22:10-23:15)
1Kenca ieteh Atalia, nande Raja Ahasia, kerna kematen anakna, minter iperentahkenna munuh kerina anggota keluarga raja.
2Joas ngenca pulah, eme anak Ahasia. Menam ia ibunuh radu ras kalak si deban, tapi isampati bibina Jehoseba ia. Jehoseba eme anak Raja Jehoram, turang Ahasia pedauh nande. Jehoseba maba Joas ras si ngianna ku sada kamar i bas Rumah Pertoton; ibunikenna ia gelah ula idat Atalia, emaka la ia ibunuh.
3Enem tahun dekahna Jehoseba ngepkep anak e alu erbuni-buni i bas Rumah Pertoton, sedang Atalia merentah selaku kemberahen.
4Tapi i bas tahun pepituken, Imam Joyada ndilo pengulu pengawal kemberahen ras pengulu pengawal istana, jenari ibabana ku Rumah Pertoton. I je isuruhna erpadan alu sumpah kerna kai atena si ilakokenna. Icidahkenna man kalak ndai Joas, anak Raja Ahasia,
5emaka iperentahkenna bagenda, "Adi ertugas kam i bas wari Sabat, sepertelu i bas kam arus njaga istana;
6sepertelu ka erjaga i Gerbang Sur, janah si sepertelu nari erjaga i gerbang, arah pudi penjaga si deban.
7Si dua terpuk si nggo dung ertugas i bas wari Sabat arus erjaga i Rumah Pertoton ngkawali raja.
8Kam arus njaga Raja Joas alu pedang talang janah tetap rembak ras ia ku japa pe ia lawes. Ise si ndeheri kam, bunuh."
9Kepala pengawal e ngikutken perentah Joyada. Ibabana anak buahna man bana, eme kalak si nggo dung ertugas i bas wari Sabat, bage pe kalak si lawes ertugas.
10Iberekenna man kepala pengawal e lembing ras ampang-ampang Raja Daud nai, si gelgel nari isimpan i bas Rumah Pertoton,
11emaka itamakenna pengawal e erjaga alu njemak pedang si talang arah lebe Rumah Pertoton e guna ngkawali raja.
12Kenca bage ibabai Joyada Joas ndarat, itamakenna mahkota ku takalna, jenari iberekenna sada rekamen undang-undang kerna adat kinirajan. Emaka itangkuhken Joas jadi raja alu namaken minak ku takalna. Jelma si nterem ertepuk dingen ersurak nina, "Mejuah-juahlah raja!"
13Atalia megi sora ersurak pengawal ras jelma si nterem e. Emaka pedas-pedas ia lawes ku Rumah Pertoton. Nggo nterem kalak pulung i je.
14Idahna i je raja si mbaru iangkat e tedis deherken binangun si lit i bas dalan bengket ku bas Rumah Pertoton e, sue ras adat tupung si e. Ia ikeleweti kepala pengawal ras kalak si ngembus terompet, dingen kerina jelma si nterem ersurak-surak alu meriah ras ngembus terompet. Icaingken Atalia uisna erkiteken nembeh atena dingen serko ia nina, "Penghianaten! Penghianaten!"
15La ate Joyada ngena maka Atalia ibunuh deherken Rumah Pertoton e, emaka iperentahkenna man kepala pengawal nina, "Baba ia ndarat arah kelang-kelang barisen pengawal e, bunuh ise atena nampati ia."
16Itangkap kalak ndai Atalia ibabana ku istana, emaka ibunuhna deherken gerbang si igelari Gerbang Kuda.
Pembaharun si ibahan Joyada (2Taw 23:16-21)
17Imam Joyada nuruh Raja Joas ras jelma si nterem erbahan perpadanen ras TUHAN maka kalak e tetap jadi bangsa TUHAN. Tole pe ibahanna ka perpadanen raja ras jelma si nterem.
18Kenca bage lawes kalak si nterem e ku rumah persembahen Baal, iruntuhkenna, iperperkenna batar-batarna ras gana-ganana jenari ibunuhna Mattan, imam Baal e i lebe-lebe batar-batar e. Joyada nuruh pengawal erjaga i Rumah Pertoton.
19Kenca bage, Joyada, kepala-kepala pengawal raja, ras pengawal istana, ngarakken raja i Rumah Pertoton nari ku istana, ikutken jelma si nterem. Bengket Joas arah Gerbang Pengawal, jenari kundul ia i bas kursi kinirajan.
20Meriah ukur kalak kerina, janah kota e nggo dame, erkiteken Atalia nggo ibunuh i bas istana.
21Joas jadi raja Juda i bas umur pitu tahun.