Dual PanelUsia raja Juda (2Taw 26:1-23)
1Kenca dua pulu pitu tahun dekahna Jerobeam II jadi raja Israel, Usia anak Amasia pe jadi raja ka i Juda.
2Tupung e umurna sepulu enem tahun, janah ia erkuasa i Jerusalem lima pulu dua tahun dekahna. Nandena Jekolia, i Jerusalem nari.
3Bali ras si ibahan bapana, ilakokenna pe si ngena ate TUHAN.
4Tapi ingan-ingan ersembah kalak perbegu la icedaken, emaka terus kalak erbahan persembahen gelehen ras nutung kumenen i je.
5Iligas TUHAN ia alu penakit kulit, janah penakit e la malem-malem ia mate. Ia tading sada-sada i bas sada rumah. Kerina tugas-tugasna, subuk i bas urusen istana, bage pe ngaturken pemerentahen negeri e, idalanken anakna Jotam.
6Kai si debanna si ilakoken Usia isuratken i bas kitap Sejarah Raja-raja Juda.
7Usia mate, janah ia ikuburken i bas kuburen raja-raja i Kota Daud. Emaka anakna Jotam nggantiken ia jadi raja.
Sakaria raja Israel
8Kenca telu pulu waluh tahun dekahna Raja Usia erkuasa i Juda, jadi raja ka Sakaria anak Jerobeam II i Israel. Dekahna ia erkuasa i Samaria lit enem bulan.
9Bali ras raja-raja si erkuasa ope denga ia, ia pe erdosa man TUHAN. Iikutkenna usihen si la mehuli si ibahan Raja Jerobeam I, si mabai Israel erdosa.
10Salum anak Jabes, erpekat ngelawan Raja Sakaria, ibunuhna ia i Ibleam, emaka igantikenna ia jadi raja.
11Alu bage nggo isehken padan TUHAN man Raja Jehu nai nina, "Kesusurenndu, seh ku sundut si pempatken, tetap jadi raja Israel." Kerina si debanna si ilakoken Sakaria isuratken i bas kitap Sejarah Raja-raja Israel.
12(2Raj 15:11)
Salum raja Israel
13Kenca telu pulu siwah tahun dekahna Raja Usia erkuasa i Juda, jadi raja ka Salum anak Jabes i Israel; sada bulan ia dekahna erkuasa i Samaria.
14Tupung e reh Menahem anak Gadi i Tirsa nari ku Samaria. Ibunuhna Salum, emaka igantikenna ia jadi raja.
15Kerina si debanna si ilakokenna subuk laporan kerna persekongkolenna, isuratken i bas Sejarah Raja-raja Israel.
16Tupung Menahem sangana i bas perdalanen i Tirsa nari, ikernepkenna seh keri kota Tapua, rikut ras pendudukna, bage pe daerah-daerah isekelewetna, erkiteken kota e la nggit talu man bana. Terlebih pe iburtaskenna beltek kerina diberu si sangana mehuli kulana.
Menahem raja Israel
17Kenca telu pulu siwah tahun dekahna Raja Usia erkuasa i Juda, jadi raja ka Menahem anak Gadi i Israel. Dekahna ia erkuasa i Samaria lit sepuluh tahun.
18Erdosa ia man TUHAN erkiteken ikutkenna usihen si la mehuli si ibahan Raja Jerobeam I; kidekah geluhna ibabaina Israel erdosa.
19Sanga e reh Tiglat Pileser, raja Assur, merang Israel. Emaka ibereken Menahem man Tiglat Pileser telu pulu empat ribu kilo pirak gelah isampatina ia pegegehi kekuasanna i negeri Israel.
20Duit e ibuat Menahem i bas kalak bayak i Israel, alu maksakenca mereken lima puluh duit pirak tep-tep kalak. Emaka mulihken Tiglat Pileser ku negerina.
21Kerina si debanna si nilakoken Menahem isuratken i bas kitap Sejarah Raja-raja Israel.
22Mate ia, jenari ikuburken. Emaka anakna Pekahia nggantiken ia jadi raja.
Pekahia raja Israel
23Kenca lima puluh tahun Raja Usia erkuasa i Juda, jadi raja ka Pekahia anak Menahem i Israel. Dua tahun dekahna ia erkuasa i Samaria.
24Erdosa ia man TUHAN, erkiteken ikutken usihen si la mehuli si ibahan Raja Jerobeam, anak Nebat, si mabai Israel erdosa.
25Sekalak puanglima tentera Pekahia, gelarna Pekah, anak Remalia, erpekat ras lima puluh kalak anak kota Gileat. Ibunuhna Pekahia i bas benteng istana si arah basna, emaka igantikenna ia jadi raja.
26Kerina si debanna si ilakoken Pekahia isuratken i bas kitap Sejarah Raja-raja Israel.
Pekah raja Israel
27Kenca lima pulu dua tahun dekahna Raja Usia erkuasa i Juda, Pekah anak Remalia jadi raja ka i Israel. Dua puluh tahun dekahna ia erkuasa i Samaria.
28Erdosa ia man TUHAN, erkiteken ikutkenna usihen si la mehuli si ibahan Raja Jerobeam I, si mabai Israel erdosa.
29Tupung Pekah jadi raja, Tiglat Pileser, raja Asur njajah kota Ijon, Abel Bet Maaka, Janoah, Kedes, ras Hasor, bage pe daerah-daerah Gileat, Galilea ras Naptali, janah ibabana rayatna ku Assur jadi tabanen.
30Kenca dua puluh tahun dekahna Jotam anak Usia jadi raja Juda, Hosea anak Ela erpekat ngelawan Raja Pekah. Ibunuhna Pekah jenari igantikenna ia jadi raja.
31Kerina si debanna si ilakoken Pekah isuratken i bas kitap Sejarah Raja-raja Israel.
Jotam raja Juda (2Taw 27:1-9)
32Kenca dua tahun dekahna Pekah anak Remalia jadi raja Israel, jadi raja ka Jotam anak Usia i Juda.
33Paksa e umurna dua pulu lima tahun, janah sepulu enem tahun dekahna ia erkuasa i Jerusalem. Nandena Jerusa, anak Sadok.
34Ngikuti usihen si ibahan bapana Usia, ilakoken Jotam kai si ngena ate TUHAN.
35Tapi ingan-ingan ersembah kalak perbegu la icedaken, emaka terus kalak erbahan persembahen gelehen ras nutung kumenen i je. Jotam majekken Gerbang Utara i Rumah Pertoton.
36Kerina si debanna si ilakoken Jotam isuratken i bas kitap Sejarah Raja-raja Juda. I bas paksa pemerentahen Jotam, isuruh TUHAN Raja Resin i Siria nari ras Raja Pekah i Israel nari merang Juda.
37(2Raj 15:36)
38Jotam mate jenari ikuburken i bas kuburen Raja-raja i Kota Daud. Emaka anakna Ahas nggantiken ia jadi raja.