Dual PanelJosia raja Juda (2Taw 34:1-2)
1Asum Josia jadi raja Juda, umurna waluh tahun. Irajaina kerajan Juda i Jerusalem nari telu pulu sada tahun dekahna. Gelar nandena Jedida, anak Adaijah, i Kuta Boskat nari.
2Josia ngelakoken kai si ngena ate TUHAN; iikutkenna usihen si mehuli si ibahan ninina Raja Daud, dingen sitik pe ia la nimpang i bas kerina Undang-undang Dibata nari.
Imam si Mbelin Hilkia ndatken kitap Undang-undang i bas Rumah Pertoton (2Taw 34:8-28)
3I bas tahun pesepuluh waluhken pemerentahenna Raja Josia nuruh sekretaris istana, eme Sapan anak Asalia, kempu Mesullam, ku Rumah Pertoton. Man bana iperentahken raja nina,
4"To dahi Imam si Mbelin Hilkia janah pindo man bana laporen, asa kai buena duit si ipepulung imam si ertugas i bas pintun Rumah Pertoton, i bas jelma si nterem nari.
5Suruh ia mereken duit e man kalak si ertanggung jawab pekena-kena Rumah Pertoton. Kalak e arus nggalari upah
6tukang kayu, tukang bangunen, ras tukang pasang batu, bage pe arus itukurna papan ras batu si ipake guna pehuli Rumah Pertoton e.
7Kalak si ertanggung jawab ndahiken dahin e kalak bujur tuhu-tuhu, emaka la perlu ipindo perkiran kerna pemaken duit e."
8Isehken Sapan perentah raja man Hilkia, jenari ikataken Hilkia man bana maka nggo idatna kitap Undang-undang i bas Rumah Pertoton. Ibereken Hilkia man bana kitap e, emaka ioge Sapan.
9Kenca bage mulihken ia ndahi raja. Ngelapor ia man raja nina, "Duit si lit i bas Rumah Pertoton e nggo ibuat suruh-suruhenndu, janah nggo iberekenna man si ertanggung jawab pehuli Rumah Pertoton e."
10Janah kenca e nina, "Enda lit sada kitap e ibereken Hilkia man bangku." Emaka iogena alu sora megang man raja.
11Kenca ibegi raja isi kitap e icaingkenna uisna perban biarna.
12Minter iberekenna perentahna man imam Hilkia, man Ahikam anak Sapan, man Akbor anak Mikayah, man Sapan, sekretaris istana, ras man Asaya, ajudan raja. Nina raja man kalak enda kerina,
13"To sungkuni TUHAN kai PedahNa man bangku ras man kerina kalak Juda kerna pengajaren si lit i bas kitap enda. Nembeh TUHAN man banta erkiteken nini-nininta la ngelakoken kai si arus ilakoken rikutken si tersurat i bas kitap enda."
14Lawes Hilkia Ahikam, Sapan ras Asaya nungkuni sekalak nabi diberu, Hulda gelarna, si ringan i bas bagin si mbaru Kota Jerusalem. (Gelar perbulangenna Salkum, anak Tikwa, kempu Harhas. Salkum ertanggung jawab ngurus kerina jubah si ipake i bas Rumah Pertoton.) Ituriken kalak enda man bana kai si nggo jadi.
15Emaka isuruhna mulihken ndahi raja nehken
16pedah TUHAN bagenda, "Ateku ngukum Jerusalem ras kerina pendudukna, sue ras si tersurat i bas kitap si nggo ioge raja.
17Nggo itadingkenna Aku, ipersembahkenna persembahen man dibata-dibata si deban, janah erkiteken si e ipekekena rawangKu alu kerina si nggo ilakokenna. Nggo gara ateKu man Jerusalem, janah gara ateKu e la ernimpet-nimpet.
18Janah kerna raja, Aku, TUHAN Dibata Israel ngataken: Nggo ibegikenndu si tersurat i bas kitap e;
19robah dingen ipeterukndu bandu i lebe-lebengKu, icaingkenndu uisndu dingen tangis asum ibegindu ancamen ukumen si Kubahan man Jerusalem ras pendudukna. Kubahan maka ciga ate kalak ngidah kota e, janah gelarna ipake numpahi kalak si deban. Tapi nggo Kubegi pertotonndu,
20janah ukumen si nandangi Kusehken man Kota Jerusalem la reh kidekah kam nggeluh denga. Kubahan maka kam mate i bas dame." Mulih kalak ndai ndahi Raja Josia maba berita e man bana.