Dual PanelIpengadi Raja Josia persembahen man berhala-berhala (2Taw 34:3-7, 29-33)
1Ipepulung Josia kerina peminpin Juda ku Jerusalem,
2jenari ras-ras ia ku Rumah Pertoton itemani imam-imam, nabi-nabi ras jelma si nterem, subuk bayak, bage pe musil. I lebe-lebena kerina iogeken raja alu megang kitap perpadanen e si terdat i bas Rumah Pertoton e.
3Kenca bage tedis raja deher binangun Kinirajan, emaka ibahanna perpadanen ras TUHAN maka patuh ia man BaNa, make undang-undang ras kerina tuntuten si lit i bas perpadanen e, sue ras si tersurat i bas kitap e. Janah kerina jelma si nterem erpadan maka patuh ia man perpadanen e.
4Kenca bage iperentahken Josia imam si Mbelin Hilkia, imam-imam si nampati ia, ras pengawal si ertugas i bas dalan bengket Rumah Pertoton pedarat i bas Rumah Pertoton e nari kerina barang-barang si ipake guna ersembah man Baal, Dewi Asera, ras bintang-bintang. Kerina barang-barang e iciluk raja i darat kota Jerusalem deherken Baluren Kidron. Kenca bage isuruhna ibaba ku Betel.
5Ipengadina kerina imam-imam si nggo itangkuhken raja-raja Juda guna mpersembahken persembahen i babo batar-batar berhala si lit i kota-kota Juda ras ingan-ingan deherken Jerusalem, eme kerina imam-imam si mpersembahken persembahen man Baal, matawari, bulan, bintang-bintang si ndeher, bage pe bintang-bintang si ndauh.
6Ipedaratna i bas Rumah Pertoton nari gambar Dewi Asera. Ibabana ku Baluren Kidron i darat kota, icilukna, igilingna jadi abu, jenari icaburkenna ku kuburen jelma si nterem.
7Irontaskenna asrama ingan tading kalak si pendahinna erlua-lua i bas Rumah Pertoton. Kalak si pendahinna erlua-lua i bas Rumah Pertoton: Eme dilaki ras diberu si ngelakoken dahin erlua-lua selaku penembahen man dewa-dewa kesusuren. (I bas ingan e diberu-diberu nenun jubah si ipake guna ersembah man Asera.)
8Ibabana ku Jerusalem imam-imam si lit i bas kota-kota Juda. Kerina batar-batar ingan persembahen si lit i belang-belang negeri e, imelketina. Iruntuhkenna pe batar-batar hantu kambing si lit deherken kerabangen si ipajekken Josua, gubernur kota e, eme arah kawes kerabangen si mbelin adi kalak bengket ku bas kota e.
9Kerina imam-imam e la ibere ndahiken dahin imam i bas Rumah Pertoton, tapi banci man roti si la itama ragi si isikapken man teman-teman imam si deban.
10Topet, eme ingan ersembah man berhala-berhala i baluren Hinnom, pe imelketi Raja Josia. Si e ibahanna gelah ulanai ise pe mpersembahken anakna dilaki ntah anakna diberu jadi persembahen tutungen man Dewa Moloh i je.
11Iaguina pe patung kuda si nggo itangkuhken raja-raja Juda guna nghamati matawari, janah gereta kuda si ipake guna si e icilukna. (Si enda kerina inganna i bas kesain Rumah Persembahen deherken pintu gerbang, janah la ndauh i bas kamar Natan Melek nari. Ia sekalak pegawai tinggi.)
12Batar-batar persembahen si ipajekken raja-raja Juda i datas tarum istana, i babo kamar Raja Ahas, rikut ras batar-batar si ipajekken Raja Manase i bas duana kesain Rumah Pertoton e, iruntuhken Raja Josia. Iperperkenna batar-batar e seh getem, jenari iambekkenna ku Baluren Kidron.
13Imelketi Josia pe batar-batar si ipajekken Raja Salomo arah Timur Kota Jerusalem, arah Selatan Uruk Seton. Batar-batar e ipajekken Raja Salomo nai man ingan persembahen man berhala-berhala si ciga ate, eme Dewi Astarte sembah-sembahen kalak Sidon, Kemos dibata-dibata bangsa Moap, ras Moloh dibata-dibata kalak Amon.
14Tiang-tiang batu e ipenggel-penggel Raja Josia, janah gana-gana si ipajekken guna nghamati Dewi Asera itabahna, jenari taneh inganna pajek ndai itamburi Raja Josia alu tulan-tulan manusia.
15Ingan ersembah i Betel pe iruntuhken Josia. Si majekken ingan ersembah, e Raja Jerobeam nai, anak Nebat, si mabai Israel erdosa. Batar-batarna ibulakken Josia, batu-batuna iperperkenna, jenari itutungna jadi abu. Gana-gana Dewi Asera pe icilukna.
16Sanga ipernehen Josia sekelewetna idahna piga-piga kuburen i das uruk-uruk e. Emaka isuruhna gelah kerina tulan-tulan si lit i bas kuburen e ipedarat jenari iciluk i das batar-batar guna ngeliamisa. Arah e nggo ilakokenna sue ras kai si nggo inubuatken sekalak nabi ndekah ope denga si e, tupung kerja-kerja, sanga Raja Jerobeam tedis deherken batar-batar e. Sanga Raja Josia ngenen-ngenen, idahna kuburen nabi si melasken nubuat enda.
17"Kuburen ise ah?" nina nungkun. Ngaloi kalak Betel nina, "Ah me kuburen nabi si reh i Juda nari, si ernubuat kerna kai si nggo ilakokenndu sendah nandangi batar-batar enda."
18"Tadingken, ula kai kai pe," nina Josia. "La banci ise pe ngkuit tulan-tulanna." Emaka tulan-tulan nabi e la iganggu, bage pe tulan-tulan nabi si nai reh i Samaria nari.
19Kerina ingan-ingan ersembah man berhala i bas tep-tep kota i Israel, si ipajekken raja-raja Israel, si erbahanca keke rawa TUHAN, iruntuhken Raja Josia. Uga perbahanna i Betel, bage ka perbahanenna man kerina batar-batar e.
20Ibunuhna kerina imam berhala e i babo batar-batar inganna erdahin. Itutungna tulan-tulan manusia i babo tiap batar-batar. Kenca bage mulihken ia ku Jerusalem.
Josia ngerayaken wari Paskah (2Taw 35:1-19)
21Kenca bage Raja Josia merentahken bangsa e gelah ngerayaken wari Paskah guna TUHAN Dibatana, sue ras si tersurat i bas kitap perpadanen.
22La nggo pernah bage belinna perayan Paskah si ibahan raja-raja Israel tah pe Juda, mulai kin i bas paksa hakim-hakim nari.
23Tapi kedungenna, kenca Josia jadi raja sepulu waluh tahun dekahna, wari Paskah e irayaken i Jerusalem.
Perubahen-perubahen si deban si ibahan Josia
24Guna ngikutken kai si tersurat i bas kitap si idat Imam si Mbelin Hilkia i bas Rumah Pertoton e, kerina kalak si beluh ndilo begu-begu ras ngoge nasip ipelawes Raja Josia. Kerina sembah-sembahen keluarga, berhala-berhala, ras sembah-sembahen perbegu si debanna si lit i Jerusalem ras i belang-belang Juda isasapkenna.
25La nggo pernah lit sekalak raja pe bagi Raja Josia tutusna, nembah TUHAN asa atena, asa ukurna ras asa gegehna ngikutken kerina Undang-undang Musa. Kenca ia pe lanai nggo pernah lit raja si bagi ia e patuhna.
26Tapi pernembeh TUHAN nandangi Juda nggo gara erkiteken perbahanen Raja Manase, lalap denga kap la nimpet-nimpet.
27Nina TUHAN, "Kai si nggo Kulakoken man Israel, Kulakoken ka man Juda. Kubuangken me kalak Juda i lebe-lebengKu nari, janah Jerusalem, kota pilihenKu e pe Kutulak, rikut ras Rumah Pertoton ingan si nggo Kutetapken man ingan ersembah man bangKu."
Pengkeri-kerin kinirajan Raja Josia (2Taw 35:20-36:1)
28Kerina si debanna si ilakoken Raja Josia isuratken i bas kitap Sejarah Raja-raja Juda.
29Tupung Josia raja denga, Raja Neko, i Mesir nari minpin tenterana ku Lau Eprat guna nampati raja Assur. Icubaken Raja Josia ngambati tentera Mesir e i Megido, tapi mate ia i bas pertempuren e.
30Itamaken pegawai-pegawaina maitna ku das gereta perang, jenari ibabana mulih ku Jerusalem, janah i je me ia ikuburken i bas kuburen raja-raja. Kalak Juda milih Joahas anak Josia, jenari itangkuhkenna jadi raja.
Joahas raja Juda (2Taw 36:2-4)
31Asum Joahas jadi raja Juda umurna dua pulu telu tahun. Irajaina kerajan Juda i Jerusalem nari telu bulan dekahna. Gelar nandena Hamutal, anak Jeremia i Kota Lipna nari.
32Erdosa ia man TUHAN, bali ras perbahanen nini-ninina nai.
33Ia ngadi jadi raja tupung Raja Neko i Mesir nari naban ia i Ripla, i negeri Hamat. Raja Neko maksa kerajan Juda nggalar 3.400 kilo pirak ras telu pulu empat kilo emas jadi persembahen.
34Raja Neko ngangkat Eliakim anak Josia jadi raja Juda nggantiken Josia, jenari isambarina gelarna jadi Joyakim. Joahas ibaba Raja Neko ku Mesir, janah i jah ia mate.
Joyakim raja Juda (2Taw 36:5-8)
35Raja Joyakim muat pajak i bas rayat nari sue ras kebayaken sekalak-sekalak, guna ngelitken duit si iperluken lako nggalari persembahen si ipindo raja Mesir.
36Asum Joyakim jadi raja Juda, umurna dua pulu lima tahun. Irajaina kerajan Juda i Jerusalem nari sepulu sada tahun dekahna. Gelar nandena Sabaidah, anak Pedaya i kota Ruma nari.
37Erdosa Joyakim man TUHAN, bali ras perbahanen nini-ninina.