Dual PanelElisa nampati diberu balu-balu musil
1I bas sada wari lit sekalak diberu balu-balu ndehara bekas anggota terpuk nabi-nabi ndahi Elisa nina, "Tuan, perbulangenku nggo mate. Bagi itehndu, ia sekalak si erkemalangen dingen mbiar man Dibata. Tapi genduari nggo reh dilaki inganna rutang nai ngelegi anakku si dilaki duana: ijadikenna atena anakku e jadi budakna man penggalar utang perbulangenku nai."
2"Kai banci kubahan man bandu?" nina Elisa nungkun. "Turiken man bangku, kai si lit i bas rumahndu?" "Kai pe la lit, seakatan sada guci kitik-kitik isin minak saitun," nina diberu balu-balu e.
3"To pinjam guci lume man teman-temanndu sada kuta asa si terpinjam kam," nina Elisa nuruh diberu balu-balu e.
4Kenca bage lawes kam ras anakndu e ku rumahndu iruk pintu. Kenca bage si alu minak saitun si lit i bas guci si kitik-kitik e. Jenari piserken tiap guci si nggo dem.
5Emaka lawes me diberu e ras anakna si dilaki ku bas rumahna, irukna pintun, ibuatna guci kitik-kitik ingan minak saitun e, kenca bage iisina minak e ku bas guci e kerina sedang anakna merekenca man bana.
6Kenca kerina guci e nggo dem, isungkunna anakna ntah lit denga tole. "Lanai lit," nina anak e. Emaka ngadi minak saitun ndai maler.
7Kenca bage lawes ia mulihken ndahi Nabi Elisa, janah nina Elisa man bana, "Dayaken kerina minak saitun e, jenari galari kerina utangndu. Lebihna e kari cukup denga man bekalndu nggeluh ras anak-anakndu."
Elisa ras diberu si bayak i Sunem nari
8I bas sada wari lawes Elisa ku Sunem ingan tading sekalak diberu bayak. Diberu e nenahken ia man. Kenca wari e wari, adi Elia ku Sunem i rumah diberu e ia rusur man.
9Nina diberu e man perbulangenna, "Tek aku maka dilaki si rusur reh ku jenda dilaki badia.
10Sibahanlah sada bilik kitik i babo tarum, jenari sitamaken i je sada ingan medem, sada meja, sada kursi, ras sada lampu, gelah adi reh kenca ia ndahi kita banci ia tading i je."
11I bas sada wari mulihken Elisa ku Sunem, emaka nangkih ia ku kamarna pekesahken.
12Jenari isuruh Elisa suruh-suruhenna Gehasi ndilo diberu e. Kenca reh,
13nina Elisa man Gehasi, "Sungkun diberu e kai si banci kubahan man bana mbalas kerina kelatihenna nikapken keperlunta. Tah perlu akapna aku lawes ndahi raja ntah puanglima tentera ncakapken kerna ia?" "Kerina keperlunku nggo cukup dat aku i tengah-tengah bangsangku," nina diberu e njabapsa.
14Emaka nungkun Elisa man Gehasi, "Kai dage si banci kubahan man bana?" Erjabap Gehasi, "La lit anakna dilaki; dah kam, perbulangenna pe nggo metua."
15"Suruh ia ku jenda," nina Elisa. Reh diberu e, janah tedis ia i bas pintun.
16Nina Elisa man bana, "Tahun si reh, i bas paksa si genduari e ka, nggo iangkipndu sekalak anakndu dilaki." "Oh, ula bage Tuan," nina diberu e. "Ula kam erguak bangku sabap kam sekalak suruh-suruhen Dibata!"
17Tapi, sue ras si ikataken Elisa, kira-kira i bas paksa e ka tahun si rehna, ipupusna sekalak anak dilaki.
18Piga-piga tahun kenca si e, tupung paksa peranin, sanga wari erpagi-pagi denga lawes anak ndai ndahi bapana si sangana i juma ras kalak rani.
19Rempet nderkuh ia ngelebuh bapana nina, "Andih mesui takalku, mesui takalku!" "Angkip, baba anak e ku nandena!" nina bapana man sekalak suruh-suruhen.
20Iangkip suruh-suruhen ndai anak e mulihken ku nandena; iampu nandena ia seh ciger, i je mate anak e.
21Emaka iangkip nandena anakna e ku kamar Elisa, iamparkenna i babo ingan medem jenari lawes ia, janahna nutupken pintun.
22Kenca bage idilona perbulangenna, janah nina diberu e man bana, "Suruh ku jenda sekalak suruh-suruhen maba kalde. Perlu aku lawes ndahi nabi Elisa. Minter ka kari aku mulih ku jenda."
23"Man kadendu ndahi ia sendah?" nina perbulangenna nungkun. "Sendah la wari Sabat, Wari Raya Bulan Mbaru pe lang." "Labo dalih," nina ngaloi.
24Kenca bage ipasangna pelana kalde e, iperentahkenna suruh-suruhenna nina, "Pekpeki kalde e gelah pedas erdalan la ngadi-ngadi adi lenga kusuruh pengadisa."
25Bage me ia berkat lawes ku Deleng Karmel, i ja Elisa ringan. Ndauh denga pe nggo idah Elisa diberu e reh, emaka nina man suruh-suruhenna Gehasi, "Nehenlah, adah reh diberu i Sunem nari!
26To pedasken dahi janah orati ntah mejuah-juah ia ras perbulangenna, bage pe anakna." Man Gehasi ikatakenna mejuah-juah nge ia,
27tapi kenca ia seh ku Elisa erjimpuh ia i lebe-lebena, jenari icikepina nahe Elisa. Itulak Gehasi atena diberu e, tapi nina Elisa, "Pelepaslah. La kin idahndu maka seh kal cedana atena? Janah langa sitik pe ikataken TUHAN man bangku kerna si e."
28Nina diberu e man Elisa, "Ma labo mbarenda kupindo anak dilaki man bandu? Ma kukataken pe ula bereken arapen man bangku?"
29Erkusur Elisa, ngerana ia man Gehasi nina, "Pedasken! Buat cikenku, minter kam lawes. Adi kam jumpa kalak i tengah dalan ula kam ngadi mperkuankenca, bage pe adi iperkuanken kalak kam ula aloi. Pinter kam lawes ku rumah e, tamaken cikenku enda i babo anak e."
30Nina diberu e man Elisa, "Ersumpah aku man TUHAN si nggeluh ras man bandu, la aku nggit nadingken kam!" Emaka berkat ia duana ras mulih.
31Gehasi namaken ciken Elisa i babo anak e, tapi la lit sora tah kai-kai pe si deban tandana anak e nggeluh. Emaka mulihken ia njumpai Elisa, janah nina man Elisa, "La medak anak e."
32Kenca Elisa nggo seh, lawes ia sisada ku bas kamar e, iidahna anak e nggo mate ampar i babo ingan medem.
33Itutupna pintun, emaka ertoto ia man TUHAN.
34Kenca bage iamparkenna bana i babo anak e; itamakenna babahna, matana, ras tanna i babo babah, mata, ras tan anak e. Asum ia ampar i babo anak ndai, badan anak ndai nggo mulai melas.
35Keke Elisa, erdalan ia mulih-ulih ku jah ku je i bas kamar e. Kenca bage mulihken ia ku ingan medem e, iamparkenna ka bana i babo anak ndai. Emaka kebacihen anak ndai pitu kali, janah kenca bage imedakkenna matana.
36Idilo Elisa minter Gehasi, isuruhna ndilo nande anak e. Kenca ia nggo reh nina Elisa man bana, "Enda angkip anakndu enda."
37Minter ia erjimpuh deherken nahe Elisa, ayona seh ku taneh; kenca bage iangkipna anakna ndai ndarat.
Racun i bas kudin
38Sekali jadi asum lit kelihen i belang-belang negeri e, mulihken Elisa ku Gilgal. Tupung ia ngajari sada terpuk nabi-nabi, isuruhna suruh-suruhenna nanggerken gulenna tare kudin galang.
39Sekalak i bas nabi-nabi e lawes ku juma ngelegi gule-gulen. Jumpa ia sada sinuan-sinuan si nggapa, jenari iputikkenna buahna si bagi tabu tempasna, ibuatna asa si terbabasa. Ibabana mulih, kenca bage igelatina jadi gulen; la itehna kai e situhuna.
40Kenca bage ielaken me gulen ndai man pangan kalak e. Tapi kenca icecapna minter ia nderkuh man Elisa nina, "Lit kap enda ndai racunna!" La terpanca gulen e.
41Ipindo Elisa tepung sitik, itamakenna ku bas kudin e, kenca bage nina, "Bagiken tole gulen e man bana kerina." Gulen ndai nggo mehuli.
Elisa mere man seratus kalak
42Sekali ka jadi, reh me sekalak dilaki i Baal Salisa nari. Ibabana man Elisa dua puluh ngkibul roti si ibahan i bas tepung dawa si pemena iperani i bas tahun e, ras gandum si mbaru denga iperani. Salu si enda ndai isuruh Elisa suruh-suruhenna mere man terpuk nabi-nabi e.
43Tapi erjabap suruh-suruhenna ndai. Nina, "Bias kin akapndu enda man seratus kalak?" Ngaloi Elisa nina, "Berekenlah man bana gelah ia man kerina, sabap nggo ikataken TUHAN kerina ia man janah lit denga kang ibana."
44Ielaken suruh-suruhen e pangan e, emaka man ia kerina. Kenca nggo elah lit denga iba sue ras si ikataken TUHAN.