Dual PanelDiberu anak kuta Sunem mulihken
1Pernah ikataken Elisa man diberu si anakna ipegeluh Elisa mulihken nina, "Ersikaplah, laweslah kam ras keluargandu ku ingan si deban, janah i je lah kam ringan, sabap pitu tahun dekahna ibahan TUHAN metahat muat nakan i negeri enda."
2Iikutkenna kata Elisa, emaka lawes ia ras keluargana ku negeri kalak Pilisti. I jah me ia tading kidekah si pitu tahun e.
3Kenca lepas si pitu tahun e, mulihken ia ku Israel. Emaka lawes ia njumpai raja guna mindo gelah rumahna ras tanehna iulihken man bana.
4Idapetina raja sangana ercakap-cakap ras Gehasi, suruh-suruhen Elisa. Merincuh raja metehsa kerna tanda-tanda kuasa ibahan Elisa.
5Tupung Gehasi sangana nuriken man raja kuga Elisa pegeluh kalak si nggo mate, i je me diberu e nehken pemindonna man raja. Nina Gehasi man raja, "O raja, enda me diberu ndai ras anakna si ipegeluh Elisa mulihken!"
6Isungkun raja diberu e, emaka iturikenna maka payo nge si ikataken Gehasi e. Erkiteken si e idilo raja sekalak pegawaina, isuruhna ngulihken kerina erta-ertana atan pe tukur ulih sinuan-sinuan i bas jumana kidekah pitu tahun itadingkenna.
Elisa ras Benhadat raja Siria
7Sekali jadi lawes Elisa ku Damaskus. Tupung e Benhadat, raja Siria rembang sangana sakit. Sanga ituriken man raja maka Elisa nggo reh ku kuta e,
8ikatakenna man Hasael pegawaina nina, "Babalah hadiah man nabi e, jenari suruh ia nungkun TUHAN gelah ieteh ntah kin malem denga aku ntah lang."
9Emaka idemi Hasael empat puluh unta alu barang-barang si mejilena si ibahan i Damaskus, jenari lawes ia ngadap Elisa. Kenca jumpa ras ia nina Hasael, "Anakndu Raja Benhadat nggo nuruh aku nungkun kam ntah kin malem denga ia i bas penakitna nari ntah lang."
10Erjabap Elisa, "Nggo ipetangkas TUHAN man bangku maka ia mate, tapi katakenlah malem nge ia."
11Kenca bage ndekah Elisa natap ku lebe. I bas ayona teridah maka ngeri kal tempa iakapna. Emaka rempet ia tangis.
12Erkiteken si e nungkun Hasael, "Ngkai maka kam tangis, Bapa?" "Sabap kueteh perkara-perkara si ngeri si nandangi ilakokenndu man bangsa Israel," nina Elisa ngaloi. "Benteng-bentengna isuluhindu, anak-anak perana si mehulina ibunuhindu, anak-anakna iperperkenndu seh mate, janah beltek diberu si sangana mehuli kulana iburtaskenndu."
13"Tapi uga banci jadi maka seh bage belinna kuasangku? Sabap aku labo kai kal pe!" "Nggo icidahken TUHAN man bangku maka kam me jadi raja Siria," nina Elisa njabapsa.
14Kenca bage lawes Hasael mulih ndahi Benhadat. Minter isungkunina ia nina, "Uga nina Elisa?" "Ikatakenna man bangku maka la banci lang malem me kam," nina Hasael ngaloi.
15Tapi pepagina ibuat Hasael selembut, igedapkenna ku lau, jenari itukupkenna ku ayo raja seh mate perban la banci erkesah. Emaka jadi raja me Hasael nggantiken Benhadat.
Jehoram raja Juda (2Taw 21:1-20)
16Kenca lima tahun Joram anak Ahap jadi raja i Israel, jadi raja ka Jehoram anak Josapat i Juda.
17Tupung e umurna telu pulu dua tahun; dekahna ia jadi raja lit waluh tahun.
18Ndeharana eme anak Ahap, janah bagi keluarga Ahap, Jehoram pe ngikut-ngikut lagu langkah si jahat raja-raja Israel si deban. Erdosa ia man TUHAN,
19tapi la ate TUHAN ngkernepken Juda, sabap nggo Ia erpadan man suruh-SuruhenNa Daud maka kesusurenna tetap lalap erkuasa.
20I bas paksa pemerentahen Raja Jehoram, berontak Edom ngelawan kerajan Juda, emaka daerah e jadi sada kerajan merdeka.
21Erkiteken si e berkat Jehoram ras kerina gereta perangna ku Sair. I je ikepung tentera Edom ia. Berngina, ia ras puanglima-puanglima gereta perangna pulah i bas kepungen tentera Edom nari, tapi tenterana nggo merap, mulih ku rumahna sekalak-sekalak.
22Bage me kerna pemberontaken Edom mulai i bas paksa e nari nggo ia merdeka i bas Juda nari. I bas paksa e kuta Lipna pe berontak.
23Kerina perbahanen si deban si ilakoken Jehoram isuratken i bas kitap Sejarah Raja-raja Juda.
24Kenca Jehoram mate, ia ikuburken i bas kuburen raja-raja i Kota Daud, janah anakna Ahasia nggantiken ia jadi raja.
Raja Ahasia i Juda (2Taw 22:1-6)
25Kenca sepulu dua tahun Joram anak Ahap jadi raja i Israel, jadi raja ka Ahasia anak Jehoram i Juda.
26Tupung e umurna dua pulu dua tahun; sada tahun dekahna ia jadi raja i Jerusalem. Nandena Atalia anak Raja Ahap kempu Omri raja Israel.
27Erkiteken perjabun lit perkade-kaden Raja Ahasia ras Raja Ahap. Raja Ahasia erdosa man TUHAN, bali ras si ibahan keluarga Ahap.
28Iikutken Raja Ahasia Raja Joram erperang ngelawan Raja Hasael i Siria nari. Pertempuren jadi i Ramot, daerah Gileat, janah Joram luka i je.
29Emaka mulih ia ku kota Jesreel nambari luka-lukana. Ahasia reh ku je njumpai ia.