Alkitab Mobile SABDA
[VER] : [KARO]     [PL]  [PB] 
 <<  2 Raja-raja 9 >> 

Jehu itangkuhken jadi raja Israel

1Tupung e idilo Nabi Elisa sekalak nabi si nguda denga, janah nina man bana, "Ersikaplah, lawes kam ku kota Ramot i Gileat. Baba botol si isin minak saitun enda,

2janah kenca nggo kam seh i jah, daramilah Jehu anak Josapat ntah pe kempu Nimsi. Dilo ia lawes i bas teman-temanna nari, jenari baba ia bengket ku bas sada kamar tersendiri.

3Emaka ilingkenlah minak saitun enda ku takalna, janah nindu, 'Ipebetehken TUHAN maka ItangkuhkenNa kam jadi raja Israel.' Kenca bage tadingkenlah ingan e pedas-pedas."

4Emaka lawes nabi si nguda denga e ku Ramot.

5Idapetina i je puanglima-puanglima tentera sangana runggu. Nina nabi e, "O Bapa, lit berita man bandu." Nungkun Jehu, "Siapai kin kami katandu e?" "Kam, bapa," nina ngaloi.

6Kenca bage bengket ia duana ku rumah, jenari iilingken nabi si nguda denga e minak saitun ku takal Jehu janah nina man bana, "TUHAN Dibata bangsa Israel pebetehkenca: 'Kutangkuhken kam jadi raja bangsangKu Israel.

7Arus ibunuhndu tuanndu, eme raja, anak Ahap e, gelah banci Kuukum Isebel erkiteken ibunuhina nabi-nabingKu ras suruh-suruhenKu si deban.

8Kerina keluarga Ahap ras kesusurenna arus mate. Kubuangken kerina dilaki i bas keluargana, subuk nguda tah metua.

9PerbahanenKu man keluargana, bali ras man keluarga Jerobeam raja Israel ras man keluarga Baasa raja Israel.

10Isebel la ikuburken, tapi maitna ipangani biang i bas daerah Jesreel.'" Kenca ikatakenna si enda, itadingken nabi si nguda denga e kamar ndai jenari kiam ia.

11Kenca mulihken Jehu ku teman-temanna puanglima ndai, isungkun kalak ndai ia nina, "Uga ma berita mehuli nge? Kai ndai ate kalak mehado ah ndahi kam?" "Kam pe itehndu nge sura-surana," nina Jehu ngaloi.

12"Lang, la ieteh kami!" nina kalak ndai erjabap. "Turiken man kami kai nina!" "Iturikenna man bangku maka nina TUHAN, 'Kutangkuhken kam jadi raja Israel.'"

13Minter itangtangi teman-teman Jehu jubahna sekalak-sekalak, ikimbangkenna i tampuk tangga si arah datasna man ingan Jehu tedis, jenari iembusna terompet, ersurak ia nina, "Jehu kap rajanta."

Joram raja Israel ibunuh

14Kenca bage ibahan Jehu pertakin nandangi Raja Joram, si sangana i Jesreel ertambar erkiteken luka-luka pertempuren i Ramot ngelawan Raja Hasael i Siria nari. Emaka nina Jehu man teman-temanna, "Adi ras aku kin kam, jaga maka ula sekalak pe kiam i Ramot nari nehken berita e ku Jesreel."

15(2Raj 9:14)

16Kenca bage inangkihina gereta perangna, lawes ia ku Jesreel. Joram langa denga malem, janah Raja Ahasia i Juda nari sangana i je ndahi ia.

17Sekalak penjaga si ertugas i das menara i kuta Jesreel ngidah kerehen Jehu ras teman-temanna. "Kuidah nterem kalak ergereta reh," nina erlebuh. Nina Joram ngaloi, "Suruh kalak erkuda njumpaisa, metehsa teman tah imbang."

18Emaka lawes si erkuda ndai njumpai Jehu, jenari nina, "Perlu raja metehsa ntah kin kam reh selaku teman." "Labo urusenndu e!" nina Jehu erjabap. Kenca bage ikataken penjaga si i das menara ndai maka persuruhen si erkuda ndai nggo seh, tapi la ia mulihken.

19Emaka isuruhna ka kalak si deban nungkun Jehu bagi si ndai ka. Jehu pe erjabap bagi si ndai ka nina, "Labo urusenndu e! Ikutken aku!"

20Iberitaken penjaga ndai ka sekali nari maka persuruhen ndai nggo seh, tapi la mulihken. Janah tole nina, "Peminpin kalak si reh e ngeratuh geretana bagi kalak adon, bali kal ras Jehu!"

21Emaka iperentahken Raja Joram nina, "Pasang geretangku." Ipasang me geretana, jenari minter ia berkat ras Raja Ahasia, sekalak-sekalak nangkih geretana njumpai Jehu. Jumpa ia i bas sada juma, Nabot empuna.

22"Ma dame nge kerehenndu enda?" nina Joram man Jehu. "Uga banci lit dame adi tetap denga lit kinigurun ras penembahen man dibata-dibata si deban si ibenai nandendu Isebel?" nina Jehu ngaloi.

23Janahna ngkusurken kudana, muatna lompat nina Joram, "Penipu ena, Ahasia!"

24Irintak Jehu panahna, janah asa gegehna ipanahna Joram pultak terus ku jantungna. Patinggal Joram i bas geretana, jenari mate ia.

25Kenca bage nina Jehu man suruh-suruhenna Bidkar, "Buat maitna, ambekken ku juma Nabot. Ingetlah sanga kita duana erkuda i pudi Ahap, bapa Raja Joram, maka nina TUHAN kerna Ahap,

26'Kuidah nderbih Nabot ras anak-anakna ibunuh. Emaka erpadan Aku maka i bas juma si enda ka me kam Kuukum.' Emaka angkatlah mait Joram, ambekken ku juma Nabot, gelah alu bage kata TUHAN igenepi."

Ahasia, raja Juda ibunuh

27Ahasia, raja Juda ngidah kai si jadi, emaka lompat ia tare gereta perangna kempak kuta Bet Haggan; iayak-ayak Jehu ia. "Bunuhlah ia pe!" nina Jehu merentahken anak buahna. Ipanah kalak ndai i das gereta perangna i bas dalan nangkeng-nangkeng ku kuta Gur, deherken kuta Ibleam. Tapi ngasup denga ia nerusken perdalanenna seh i Megido, janah i je ia mate.

28Ibuat pegawaina mait Ahasia ibabana alu gereta ku Jerusalem. Ikuburken i kuburen raja-raja i Kota Daud.

29Ahasia jadi raja Juda kenca sepulu sada tahun dekahna Joram anak Ahap jadi raja Israel.

Kemberahen Isebel ibunuh

30Seh me Jehu i Jesreel. Kenca ibegi Isebel kai si nggo jadi, icelakna matana, ersuri ia, jenari tedis deherken jendela istana, janahna natap ku dalan i teruh.

31Asum Jehu bengket arah gerbang, erlebuh Isebel nina, "O, Simri! O, pemunuh tuanna! Erkai kam ku jenda?"

32Itare Jehu ku das, emaka nina alu sora si megang, "Ise si arah aku?" Dua telu kalak pegawai istana natap ku teruh i bas jendela nari kempak Jehu.

33Emaka nina Jehu man kalak e, "Sampetken ia ku teruh!" Isampetken kalak ndai ia ku teruh, emaka marpar darehna ngkenai tembok ras kuda. Mait Isebel iperjaki kuda Jehu.

34Bengket Jehu ku istana, jenari man ras minem ia i je. Kenca elah man nina, "Angkat diberu si kebilangen e, kuburkenlah, sabap anak raja kap ia."

35Tapi kai pe lanai lit idapeti kalak si atena ngkuburkenca ndai, seakatan takal-takalna, tulan-tulan tanna ras nahena nari ngenca.

36Kenca ilaporkenna si enda nina Jehu, "Kai si jadi genduari payo kal bagi si nggo ikataken TUHAN arah suruh-suruhenna Elia: 'Ipangani biang me mait Isebel i daerah Jesreel.

37Tading maitna merap desken kotoren rubia-rubia, seh maka ise pe lanai si nandaisa.'"


  Share Facebook  |  Share Twitter

 <<  2 Raja-raja 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran