Dual PanelDaud ras Batseba
1Biasana raja-raja ngadi erperang i bas musim mbergeh. Kenca lepas musim e i bas tahun e isuruh Daud si Joap ras pegawaina ras tentera Israel. Italuken kalak e bangsa Amon janah ikepungna kota Raba. Tapi Daud tading i Jerusalem.
2I bas sada wari nandangi ben wari, keke Daud i bas inganna medem nari, jenari lawes ia ku datas tarum istana. Asum ia erdalan i datas tarum istana idahna sekalak diberu sangana ridi. Seh kal jilena diberu e.
3Emaka isuruhna sekalak nungkuni ise kin diberu e. Emaka itehna diberu e, eme Batseba anak Eliam ndehara Uria kalak Heti e.
4Isuruh Daud utusen ngelegisa, ibaba na diberu e man Daud emaka ersada kula ia ras. (Diberu e mbaru denga dung mbersihken bulanna.) Kenca bage mulih diberu e ku rumahna.
5Dungna ieteh diberu emaka nggo mehuli kulana, emaka isuruhna kalak ngatakenca man Daud.
6Kenca bage itenahken Daud berita man Joap, "Suruh Uria kalak Heti e, ndahi aku." Emaka isuruh Joap si Uria ndahi Daud.
7Kenca Uria nggo seh, isungkuni Daud ia tah mejuah-juah si Joap ras tentera e kerina, bage pe kuga kerna perang e.
8Kenca bage nina man Uria, "To ku rumahken pekesahken kam kentisik." Kenca lawes Uria, ikirimken Daud hadiah ku rumahna.
9Kepeken Uria la mulih ku rumah, tapi medem ia i pintun gerbang ras pengawal raja.
10Kenca ieteh Daud maka Uria la mulih ku rumah isungkunna nina, "Nggo ndekah kam la mulih, ngkai maka la kam mulih ku rumah?"
11Nina Uria njabapsa, "Kalak Israel ras Juda lawes erperang, janah Peti Perpadanen lit ras ia; Komendanku Joap ras pegawaina erkemah i mbalmbal. Uga banci aku mulih ku rumah man ras minem janah medem ras ndeharangku? Asa raja nggeluh, ersumpah aku maka la pernah kulakoken si bage rupana!"
12Emaka nina Daud, "Dage tadinglah i jenda sada wari enda, janah pagi kusuruh kam mulih." Jadi tading me Uria i bas wari e ras pepagina i Jerusalem.
13Iundang Daud ia man berngi janah iberena minem seh mabuk. Amin bage gia, i bas berngi e pe Uria la ka bo mulih ku rumah, tapi medem ia i bas ingan pengawal istana, janah selembutna ibahanna jadi amakna.
14Pepagina erpagi-pagi itulis Daud surat man Joap, jenari itenahkenna arah Uria.
15Nina i bas surat e, "Tama Uria arah lebe i ja perang si hebatna kal, jenari mundurlah, pelepas ia mate ibunuh."
16Dage sanga Joap ngepung kota e isuruhna Uria ku ingan i ja ietehna musuh seh gegehna.
17Ndarat tentera musuh i bas kota e nari emaka iserangna tentera Joap. Piga-piga perwira Daud mate, subuk Uria.
18Kenca bage isuruh Joap sekalak si ngelapor man Daud nuriken man bana kerna peperangen e.
19Iperentahken man pertenahen e nina, "Kenca nggo iturikenndu man raja kerina kerna perang e,
20nggit me maka nembeh ia janah isungkunna kam, 'Uga kin maka bage deherna ku kota e? La kin ietehndu maka banci kam ipanah i das tembok-tembok kota e nari?
21La kin ingetndu uga Abimelek anak Gideon mate i Tebes? Ma mate ia erkiteken sekalak diberu menterken batu penggilingen i das tembok e nari ngkenai Abimelek? Ngkai dage maka bage deherndu ku tembok e?' Adi isungkun raja kam bage kataken bana: 'Perwirandu Uria pe nggo mate.'"
22Emaka lawes persuruhen e ndahi Daud iturikenna man bana kai si iperentahken Joap.
23Nina persuruhen e, "Musuh-musuhta gegehen asangken kita, ndarat ia i bas kota e nari iperangna kami, tapi iasak kami ia mundur ku pintun gerbang kota e.
24Jenari ipanahna kami i tembok e nari. Emaka piga-piga pegawai raja mate, pegawaindu Uria pe nggo mate."
25Nina Daud man persuruhen e, "Petetaplah ukur Joap janah kataken man bana ula kitik ukurna, sabap ise pe labo beluh nurikenca ise si mate i bas perang. Turiken bana ngatur sada perlawanen tergegehen ngelawan kota e janah talukenlah."
26Kenca ibegi Batseba perbulangenna nggo mate, tangis dingen ngandung ia.
27Kenca paksa erceda ate nggo lepas, isuruh Daud ia reh ku istana, iempoina Batseba emaka ipupusna sekalak anak dilaki. Tapi la ngena ate TUHAN kerna kai si ibahan Daud e.