Alkitab Mobile SABDA
[VER] : [KARO]     [PL]  [PB] 
 <<  2 Samuel 13 >> 

Amnon ras Tamar

1Absalom anak Daud, lit sekalak turangna mejile, Tamar gelarna. Amnon anak Daud si deban pedauh nande ras Absalom erngena ate man Tamar.

2Seh kal ate Amnon ngenana turangna e seh maka sakit pe ia sabap iakapna pe la mungkin turangna e man bana. Selaku sekalak singuda-nguda Tamar ijaga gelah ula jumpa ras dilaki.

3Tapi lit sekalak teman Amnon seh kal cerdikna, gelarna Jonadap anak Sammah senina Daud.

4Nina Jonadap man Amnon, "Kam anak raja, tiap wari kuidah ndele atendu. Kai kal nge si jadi?" "Ngena ateku Tamar turang seninangku Absalom," nina njabapsa.

5Nina Jonadap man Amnon, "Pekulah-kulah kam sakit medemken. Sanga bapandu reh ngenehen kam kataken man bana, 'Suruhlah turangku Tamar mere nakan aku. Ateku ia min nikapken nakanku i jenda, gelah banci ia kuidah jenari ia jine ngelai aku.'"

6Emaka ipekulah-kulah Amnon sakit jenari lawes ia medem. Raja Daud lawes ndahi ia emaka nina Amnon man bapana, "Suruh min Tamar ku jenda maka ibahanna sitik roti i lebe-lebengku jenari ia jine merekenca man bangku."

7Emaka itenahken Daud si Tamar ku istana nina, "To ku rumah Amnon janah sikapken sitik pangan man bana."

8Lawes Tamar ku rumah Amnon janah idapatina i je turangna medem. Ibuat Tamar sitik cimpa isikapkenna, emaka ibahanna piga-piga roti i lebe-lebe Amnon. Jenari kenca nggo itasakken Tamar roti e

9maka ipedaratina i bas kudin nari gelah ipan turangna, tapi Amnon la nggit manca. Nina Amnon, "Pelawes lebe kalak kerina." Emaka lawes kalak ndai kerina.

10Jenari nina man Tamar, "Baba roti e ku ingan medemku janah sulangilah aku." Ibuatna roti e janah ibabana man turangna.

11Bage ibereken Tamar roti e man Amnon, itangkapna Tamar janah nina, "Mari ras kita medem!"

12"Lang! Ula paksa aku ngelakoken si e! Mejin bage!

13Ku ja denga pagi kubuniken ayongku? Janah kam denggo ikataken kalak si kemalina kal i Israel. Ercakaplah kam ras raja, ugapa pe iberena nge aku man bandu," nina Tamar.

14Tapi la ibegiken Amnon kata turangna e. Perban gegehen ia asang turangna, talu ia ibahanna jenari iperkosana.

15Kenca bage lanai tanggung nembehna ate Amnon man Tamar. Belinen atena nembeh genduari asangken atena ngena ndube. Nina man Bana "Ndarat!"

16"Lang! Sabap adi ipelawesndu aku, belinen kap salah si bage asangken kai si mbaru ilakokenndu!" nina Tamar. Tapi la ibegiken Amnon katana;

17ilebuhna suruh-suruhenna, jenari nina, "Ulanai kuidah diberu ena! Pedarat! Jenari eruk pintun!"

18Ipedarat suruh-suruhen e Tamar jenari ierukna pintun. Ipake Tamar baju panjang si nggedang tanna. I bas paksa si e putri raja si langa sereh biasa make paken si bage.

19Icaburi Tamar takalna alu abu, icaingkenna baju panjangna itutupina ayona alu tanna ngandung ia lawes.

20Sanga idah Absalom ia isungkunna, "Nggo kin kam iganggu Amnon? Bagem Tamar, ula ndele kal atendu kerna si e. Turangndu kap ia, emaka ula turiken e man ise pe." Jenari tading Tamar i rumah turangna Absalom ceda atena, melungen iakapna.

21Kenca ibegi Raja Daud kai si nggo jadi merawa kal ia.

22Janah segat kal ate Absalom man Amnon sabap nggo iperkosana turangna Tamar. Lanai ia nggit mperkuanken Amnon.

Absalom erbalas man Amnon

23Dua tahun kenca si e, Absalom nggunting mbulu biri-birina i Baal Hazor, deher kota Eperaim. Kerina anak raja iundang ku je.

24Idahina Raja Daud jenari nina, "O Raja, aku sangana nggunting mbulu biri-biringku. Banci kang kam ras pegawaindu reh ku pesta e?"

25"Lang anakku," adi kerina kami ku jah gulutsa nge pagi akapndu nina raja. Isekseki Absalom tapi la ibere raja pemindonna. Jenari isuruhna Absalom lawes.

26Tapi nina Absalom, "Adi bage seninangku Amnonlah gia reh?" "Labo perlu e," nina raja.

27Tapi tetap isekseki Absalom seh dungna ibere Daud si Amnon ras kerina anak raja si dilaki lawes ras Absalom. Ibahan Absalom kerja man-man si meriah.

28Emaka iperentahkenna man suruh-suruhenna, "Perdiateken adi Amnon nggo melalasa minem anggur, janah kenca kuperentahken bunuh Amnon. Ula mbiar! Aku ertanggung jawab kerna si e. Tetaplah ukurndu ula kam sangsi!"

29Ikutken suruh-suruhen e perentah Absalom ibunuhna Amnon. Kerina anak-anak Daud si deban lompat ngersak keledena.

30Sanga kalak enda i tengah dalan denga nggo ikataken man Daud, "Nggo ibunuh Absalom kerina anakndu si dilaki la lit sekalak pe tading!"

31Tedis raja icaingkenna bajuna, idampeskenna bana ku taneh. Suruh-suruhen si lit i je ras ia pe ncaingken bajuna.

32Tapi ngerana Jonadap, anak Sammah senina Daud nina, "O Raja, labo kerina anakndu ibunuhna. Amnon ngenca. Banci nendu i bas Absalom. Ilakokenna e nginget perbahanen Amnon nai tupung iperkosana turangna Tamar.

33Emaka ula kam tek berita maka kerina anakndu si dilaki nggo mate. Amnon ngenca nggo ibunuh."

34Sanga e Absalom nggo kiam. Rembang paksa si e tentera si sangana ertugas ngidah sada arak-araken si mbelin nusur i datas uruk nari arah dalan i Horonaim nari. Idahina raja janah ilaporken kai si nggo idahna.

35Nina Jonadap man Daud, "Ah anakndu sangana reh, payo bagi si kukataken ndai."

36Kenca ia dung ngerana, reh anak-anak Daud jenari ngandung ia kerina, emaka Daud ras kerina pegawaina e ikut tangis erceda ate.

37Absalom kiam ndahi raja Gesur Talmai anak Amihud. Telu tahun dekahna ia tading i jah. Ndekah kal Daud erceda ate erkiteken anakna Amnon.

38(2Sam 13:37)

39Tapi kenca susur atena ceda tedeh atena nandangi anakna Absalom.


  Share Facebook  |  Share Twitter

 <<  2 Samuel 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel