Dual PanelAbsalom talu ras mate
1Ipepulung Raja Daud kerina tenterana, ibagina ku bas terpuk-terpuk 1.000, ras seratus, jenari iangkatna pegawai jadi komendan tentera e.
2Kenca bage isuruhna berkat i bas telu terpuk, si ipinpin Joap, Abisai senina Joap, ras Itai i Gat nari jadi komendan tiap terpuk. Emaka ngerana raja man tenterana, "Aku ikut ras kam kerina."
3"Kam la banci berkat ras kami," nina tentera e. Sabap adi kune kami kerina kiam, ntah pe adi setengah i bas kami nari mate, labo diate musuh pe e, sabap kam nge si idaramina. Kam seri ergandu ras 10.000 tenterandu. Lang pe madin nge kami isampatindu i bas kota nari.
4Nina Raja, "Bage-bage! Kuga akapndu si mehulina bage." Kenca bage tedis ia i pintu samping gerbang kota. Kerina tentera barisen 1.000 ras seratus erdalan ndarat.
5Iperentahken raja man Joap, Abisai ras Itai nina, "Erkiteken aku ula sakiti Absalom." Janah kerina pasuken e megisa perentah si ibereken Daud man peminpin-peminpin.
6Tentera Daud lawes ku mbalmbal jenari iserangna tentera Israel i kerangen Eperaim.
7Bangsa Israel talu ibahan tentera Daud; sada kinitalun si mejin alu 20.000 kalak si terbunuh i bas wari e.
8Pertempuren merap ku kerina daerah e, jenari teremen kalak mate i bas kerangen e asangken ibunuh i bas peperangen.
9Rempet Absalom jumpa ras tentera Daud. Absalom sanga ngersak kelede janah sanga mentas i teruh sada batang kecing galang, sangkut takalna i bas dahan kayu e. Kiam kelede e emaka Absalom tading molah-olah, gantung i bas dahan kayu e.
10Sekalak tentera Daud ngidahsa, emaka ilaporkenna man Joap, "Tuan, kuidah Absalom molah-olah i bas batang kecing!"
11Erjabap Joap, "Adi idahndu uga maka la minter ibunuhndu? Kubereken min ndai bandu sepuluh duit pirak ras sada gendit."
12Tapi erjabab kalak ndai, "Aminna pe 1.000 duit pirak iberekenndu bangku la aku nggit ngangkat jari-jaringku ngelawan anak raja. Kita kerina megi perentah raja man bandu, man Abisai ras man Itai, 'Erkiteken aku ula sakiti Absalom.'
13Adi la kupatuhi raja, kubunuh Absalom, megi raja kerna si e, kai pe ieteh raja, kenca bage labo kam nggit nampati aku."
14"La aku sempat ndekah ngerana ras kam," nina Joap. Ibuatna telu lembing, itajakkenna ku tenten Absalom si tupung e nggeluh denga molah-olah i bas batang kecing.
15Kenca bage reh sepuluh kalak tentera Joap ngurup Absalom mutusken kesahna.
16Joap merentahken ngembus terompet pengadi pertempuren, emaka ngadi tentera e ngayaki bangsa Israel.
17Ibuatna mait Absalom, ibenterkenna ku bas sada lubang si mbages i bas kerangen e, itutupina alu jergungen batu si seh kal galangna. Kerina kalak Israel kiam, lawes ku rumahna sekalak-sekalak.
18Paksa geluh Absalom nggo ibangunna sada tugu guna dirina i Baluren Raja, sabap la lit anakna dilaki si nerusken kesusurennna. Ibahanna gelar tugu e sue ras gelarna, janah seh ngayak genduari tugu e igelari Tugu Absalom.
Kematen Absalom iberitaken man Daud
19Kenca bage ngerana Ahimas anak Sadok man Joap, "Bere aku kiam ndahi raja meritaken berita si mehuli enda, TUHAN nggo mulahi ia i bas musuh-musuhna nari."
20"Ula," nina Joap, "Sendah la kam si maba berita si mehuli. I bas wari-wari si deban banci ilakokenndu e, tapi la wari enda, sabap anak raja nggo mate."
21Jenari nina man suruh-suruhenna bangsa Sudan, "To turiken man raja kai si idahndu." Nembah suruh-suruhen e jenari kiam ia.
22Isekseki Ahimas, "La atendu ndele kai si jadi? Bere min aku pe mberitaken berita e." "Ngkai maka ilakokenndu atendu e, anakku?" nina Joap ngaloi "Labo kam ngalo kai pe jenari."
23"Amin kai pe jadi lawes ateku!" nina Ahimas. "Adi bage kin lawesken," nina Joap. Kiam Ahimas ngincuah arah Baluren Jordan, ilumbana suruh-suruhen ndai.
24Daud sanga kundul i kesain kelang-kelang kerabangen kota si arah bas ras si arah darat. Penjaga e nangkih ku ancuk-ancuk tembok. Tedis ia i babo tarum pintun gerbang e, itatapna janah idahna sekalak reh kiam-kiam.
25Ilebuhna ku teruh jenari ikatakenna man raja. Ngaloi raja, "Adi sisada ia, berita si mehuli nge si ibabana." Kalak si kiam e reh deherna reh dekahna.
26Kenca bage idah penjaga e kalak si deban kiam sisada-sisada, emaka ilebuhna ka ku teruh man penjaga pintun gerbang, "Nehenlah! Lit kiam sekalak nari!" Nina raja, "Ia pe maba berita si mehuli nge."
27Nina penjaga e, "Kuidah maka si kiam arah lebe e bali ras Ahimas." "Ia sekalak si bujur," nina raja. "Emaka berita si mehuli nge si ibabana."
28Erlebuh Ahimas ngataken mejuah-juah man raja, ersembah mungkuk i lebe-lebe raja nina, "Puji TUHAN, Dibatandu si nggo mereken man bandu kemenangen naluken kalak si mberontak ngelawan Tuanku Raja!"
29"Ma selamat nge Absalom?" nungkun raja. Ngaloi Ahimas, "Tuan, sanga pegawaindu Joap nuruh aku, kuidah sada keguntaren si mbelin, tapi la terturiken aku kai e."
30"Arah lepar ah kam tedis," nina raja; jenari Ahimas ngepar janah tedis i jah.
31Kenca bage seh suruh-suruhen bangsa Sudan e jenari nina man raja, "Lit berita si mehuli man bandu, o Tuanku Raja! I bas wari enda nggo ibereken TUHAN man bandu kemenangen ngelawan si mberontak ngelawan kam!"
32"Ma selamat nge Absalom e?" nungkun raja. Ngaloi suruh-suruhen e, "Sura-surangku maka kai si jadi man Absalom, jadilah man kerina musuh-musuhndu Tuan, janah man kerina si mberontak ngelawan kam."
33Megi si e ceda kal ate raja. Lawes ia ku das ruangen i das pintun gerbang tangis ia. Sanga erdalan serko ia, "O anakku! Aku min ndai mate nggantiken kam o anakku! Absalom anakku!"