Alkitab Mobile SABDA
[VER] : [KARO]     [PL]  [PB] 
 <<  2 Samuel 22 >> 

Ende-enden kemenangen Daud (Mzm 18)

1Kenca TUHAN nggo nelamatken Daud i bas Saul ras musuh-musuhna si deban nari, iendeken Daud ende-enden enda lako muji TUHAN:

2Keleng ateku Kam o, TUHAN, Kam kap gegehku.

3Tuhan desken benteng si nteguh, inganku cibuni. Dibatangku desken gunung batu, inganku cilinggem. Desken ampang-ampang ngampangi aku; njagai aku gelah ula cilaka.

4Kulebuh TUHAN, IpulahiNa aku i bas musuh-musuhku nari; Pujilah TUHAN!

5Galumbang kematen ngkeleweti aku, lau kebenen ergalun ngombakken aku.

6Kematen ngkeleweti Aku, siding kematen nganga i lebengku.

7I bas kesusahenku kulebuh TUHAN. Erlebuh aku man Dibatangku gelah IsampatiNa. I bas RumahNa si badia IbegikenNa sorangku; IdengkehkenNa sorangku serko.

8Doni mugur-ugur ras nggirgir; palas langit mugur-ugur ras kumeter, sabap Dibata merawa!

9Gebuk mbincar ndarat i bas lubang IgungNa nari; gara api ndilat, luar rara gara i bas BabahNa nari.

10IcaingkenNa langit, sirang janah runtuh janah kegelapen i teruh NaheNa.

11Kabang Ia i das kerub; kelaling Ia i datas kabeng angin.

12ItutupiNa BaNa alu kegelapen embun mekapal dem udan ngkeleweti Ia;

13mbincar rara si gara bagi kilap i adep-AdepenNa nari.

14Kenca bage erlenggur sora TUHAN i langit nari, terbegi sora si Mada Kuasa.

15IpulahiNa anak PanahNa, mbencah musuh-MusuhNa; terang SinalsalNa erbahanca kiam musuh-MusuhNa.

16Talang lante lawit, mbungkar palas doni, tupung TUHAN ngerawai MusuhNa, erdengung PernembehNa.

17Idadaken TUHAN TanNa i das nari ku teruh, jenari IcikepNa aku, IrintakNa i bas lau si mbages nari.

18IpulahiNa aku i bas musuhku nari; ras i bas kerina kalak si rate nembeh man bangku, kalak si gegehen asangken aku.

19Sanga aku i bas kesusahen, ilawan musuh-musuhku aku, tapi TUHAN nelamatken aku.

20IpulahiNa aku i bas cilaka nari; IselamatkenNa aku, sabap ngena AteNa aku.

21TUHAN mereken si mehuli man bangku sabap kulakoken kai si benar; ipasu-PasuNa aku sabap aku la ersalah.

22Kuikutken Undang-undang TUHAN; la kutundalken Dibatangku.

23Kulakoken kerina Undang-UndangNa; la nggo la kuikutken perentah-PerentahNa.

24IetehNa aku la erpandangen, nilah aku i bas kelepaken nari.

25IberekenNa si mehuli man bangku sabap kulakoken si benar, IetehNa aku la ersalah.

26O TUHAN, Kam setia man kalak si setia man BaNdu, IkuhiNdu si mehuli man kalak mehuli. pe.

27Kam badia man kalak si badia, tapi rimbang ras kalak jahat.

28IselamatkenNdu kalak si peteruk bana, tapi IpeterukNdu kalak megombang.

29Kam TUHAN, sinalsalku; IpelawesNdu kegelapenku.

30IbereNdu bangku gegeh naluken musuhku alu PenampatNdu kuripukken bentengna.

31Perbahanen Dibata serta, KataNa tercikep kal! Ia desken ampang-ampang man kalak si mindo pengkawali man BaNa.

32TUHAN ngenca Dibata Ia ngenca Si nampati kita.

33Dibata mere gegeh bangku; IbahanNa dalanku la jumpa cilaka.

34IpegegehiNa nahengku bali ras nahe belkih, IjagaiNa aku i datas deleng-deleng.

35IajariNa aku erperang, maka banci aku ngerentang alu panah si megegeh.

36O TUHAN, IselamatkenNdu janah IkawaliNdu aku, PenampatNdu erbahan aku mbelin.

37IjagaiNdu aku gelah la tertangkap, janah la aku pernah guling.

38Kuayaki musuh-musuhku janah kutaluken ia; la kungadiken, adi langa ia kernep kerina.

39Kugudam ia, gempang lanai keke; kerina ia terdang, talu i lebe-lebengku.

40IberekenNdu bangku gegeh guna erperang emaka menang aku, talu musuh-musuhku.

41IbahanNdu musuh-musuhku kiam i bas aku nari; kukernepken kerina si ernembeh ate bangku.

42Idaramina si nampati tapi sekalak pe la mulahisa, ilebuhna TUHAN, tapi la IjabapNa.

43Kuperjaki ia, maka jadi abu kerina; kudedehi ia bagi kubang i bas dalan.

44IkeliniNdu aku i bas bangsa si jahat nari, i RajakenNdu aku ngerajai bangsa-bangsa, bangsa si la kutandai jadi suruh-suruhenku.

45Kalak pertandang nembah man bangku, patuh kune megi perentahku.

46Nggo bene kinirawanna reh ia nggirgir i bas kota bentengna nari.

47TUHAN nggeluh! Pujilah pembelangku! Momoken kinibelinen gegeh Dibata si nampati aku.

48IberekenNa bangku kuasa naluken musuh-musuhku; bangsa-bangsa ItalukenNa i lebe-lebengku,

49IpulahiNa aku i bas imbangku nari. O, TUHAN, IberekenNdu bangku kuasa naluken musuh-musuhku IkawaliNdu aku i bas kalak jahat nari.

50Emaka kupuji Kam i tengah bangsa-bangsa, kuendeken ende-enden pujin man BaNdu.

51Dibata mereken kemenangen si mbelin man RajaNa; IcidahkenNa KekelengenNa si tetap nandangi kalak si IpilihNa, man Daud ras man KesusurenNa seh rasa lalap.


  Share Facebook  |  Share Twitter

 <<  2 Samuel 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel