Dual PanelIsboset ibunuh
1Megi berita maka Abner nggo ibunuh i Hebron, mbiar kal Isboset, anak Saul. Kerina bangsa Israel pe lesek atena.
2Pegawai Isboset lit dua kalak jadi kepala gerombolen, Baanah ras Rehab duana anak Rimon suku Benyamin i Beerot nari. (Beerot eme bagin taneh suku Benyamin.
3Kalak Beerot nggo lompat ku Gittaim, janah i je me ia ringan mulai paksa e.)
4Sinursur Saul si deban eme Mepiboset anak Jonatan, nggo lima tahun umurna sanga Saul ras Jonatan ibunuh. Sanga reh berita kerna kematenna i Jesreel nari, ibuat ras ikiamken si rembahina si Mepiboset. Tapi erkiteken rayak-ayak ia kiam, ndabuh si Mepiboset emaka ia cempang.
5Berkat Rehab ras Baana ku rumah Isboset, janah seh i je pantek ciger sanga wari las kal. Isboset sangana tunduh idapetina.
6Rembang pembantu rumah tangga Isboset sangana miari gandum i deher pintun madat matana emaka tertunduh ia. Bengket Rehab ras Baana ku rumah Isboset alu la ieteh kalak.
7Kenca seh i bas bengket ia ku kamar ingan medem Isboset. Sangana kal badeh pertunduhna i je, emaka ibunuhna. Kenca bage ikeret Rehab ras Baana takal Isboset, ikantingna. I bas sada berngi e erdalan ia arah Baluren Jordan.
8Kenca seh i Hebron iendeskenna takal Isboset e man Daud janah nina man raja, "Enda takal Isboset anak musuhndu Saul, si mbarenda atena munuh kam. I bas wari enda nggo ibere TUHAN kam erbahan pembalasen man Saul ras man kesusurenna."
9Nina Daud njabap kalak enda duana, "Ersumpah aku i bas gelar TUHAN si nggeluh, si nggo mulahi aku i bas kerina mara nari.
10Mbarenda sanga aku i Siklak reh kalak meritaken man bangku kerna kematen Saul. Iakapna berita si mehuli nge si ibabana e. Kutangkap ia, jenari kuperentahken gelah ibunuh. Em hadiah si kubereken man bana erkiteken 'beritana si mehuli e'.
11Tentu beraten denga ka ukumen nandangi kalak jahat si munuh kalak benar si sangana tunduh i bas rumahna jine! Genduari kubalas man banda kematenna e, emaka kusasapken kam i babo taneh enda nari!"
12Kenca bage iperentahken Daud tenterana munuh Rehab ras Baanah. Kenca ibunuh ikeret kalak ndai tan ras nahena, iolah-olahna deher kolam i Hebron. Tapi takal Isboset ibuatna jenari ikuburkenna i kuburen Abner i Hebron.