Dual PanelDaud jadi raja Israel ras Juda (1Taw 11:1-9, 14:1-7)
1Kenca bage kerina suku-suku Israel reh ndahi Daud i Hebron nina man raja, "Kami enda sada dareh kap ras kam.
2I bas paksa si lepas, aminna gia Saul denga raja kami kam nge si minpin bangsa Israel i peperangen, janah TUHAN nggo erpadan man bandu maka kam si mabai BangsaNa ras jadi rajana."
3Dage kerina peminpin bangsa Israel reh ndahi Raja Daud i Hebron. Ibahanna perpadanen ras peminpin e i lebe-lebe TUHAN, jenari itangkuhkenna Daud jadi raja Israel.
4Sanga Daud itangkuhken umurna nggo telu puluh tahun janah lit empat puluh tahun dekahna ia jadi raja.
5Iperentahna Juda i Hebron lit pitu tahun enem bulan dekahna, janah merentah Israel ras Juda i Jerusalem telu pulu telu tahun dekahna.
6Seh me paksana Raja Daud ras tenterana berkat nerang Jerusalem. Bangsa Jebusi si ringan i je erpengakap maka Daud la ngasup naluken kota e, emaka nina man Daud "Ndigan pe labo kam banci bengket ku jenda. Kalak pentang ras kalak cempang-cempang saja pe ngasup erbahanca maka kam tetap i darat."
7(Tapi idatken Daud benteng Sion janah benteng e igelari "Kota Daud".)
8Nina Daud man tenterana paksa si e, "Ise si seri ras aku atena segatna man bangsa Jebusi? Cukup kin segat atena e munuh kalak ah? Dage bengketlah arah saluren lau ah janah seranglah kalak cempang ras pentang si ateku segat." (Eme sabapna maka ikataken, "Kalak pentang ras cempang la banci bengket ku bas Rumah TUHAN.")
9Kenca Daud seh ku benteng e, i je me ia ringan Igelarina ingan e "Kota Daud". Ipantekina kuta i kelewetna mulai i bas ingan si itamburi alu taneh arah Timur uruk-uruk e.
10Tambah dekahna ertambah-tambahna ka gegeh Daud erkiteken TUHAN Dibata si Mada Kuasa nemani ia.
11Raja Hiram i Tirus nari nuruh utusen dagangna ndahi Daud. Isikapkenna man Daud kayu aras ras tukang kayu, tukang batu guna majekken istana.
12Ieteh Daud maka TUHAN nggo netapken ia jadi raja Israel janah ibahan TUHAN maka kerajan Daud reh teguhna guna kiniulin BangsaNa.
13Kenca miser i Hebron nari ku Jerusalem, ibuat Daud ka tole ndehara ras gundikna dingen ipupusna ka anak dilaki ras diberu.
14Enda me anak Daud si tubuh i Jerusalem: Sammua, Sobap, Natan, Salomo,
15Ibhar, Elisua, Nepeg, Japia,
16Elisama, Eliada ras Elipelet.
Kemenangen ngelawan bangsa Pilisti (1Taw 14:8-17)
17Ibegi bangsa Pilisti maka Daud nggo jadi raja Israel, emaka berkat tenterana lako nangkap Daud. Kenca ibegi Daud kerna si e, nusur ia ku benteng pertahanen.
18Bangsa Pilisti nggo seh i Baluren Repaim, janah iinganina baluren e.
19Nungkun Daud man TUHAN nina, "Kulawan kin bangsa Pilisti? IberekenNdu kin bangku kemenangen?" "Ue, to lawan!" nina TUHAN njabapsa. "Aku mereken kemenangen man bandu!"
20Emaka lawes Daud ngelawan bangsa Pilisti ku Baal Perasim, italukenna bangsa Pilisti e i je. Nina Daud, "TUHAN nggo ngerontasken pertahanen musuh-musuhku desken pengerontasken banjir." Janah eme sabapna maka ibahan kalak gelar ingan e Baal Perasim.
21Sanga kiam bangsa Pilisti, tading ibahanna sembah-sembahenna, emaka ibuat Daud ras tenterana.
22Jenari mulihken ka bangsa Pilisti ku Baluren Repaim janah iinganina ingan e.
23Isungkun Daud ka TUHAN sekali nari nina TUHAN njabapsa, "Ula arah enda serang bangsa Pilisti e, tapi kelewetilah janah ersikaplah nerangsa arah lepar i deher batang balsam nari.
24Kenca ibegindu sora kalak erbaris i datas batang kayu e seranglah minter erkiteken Aku kap erdalan arah lebendu naluken tentera bangsa Pilisti e."
25Ilakoken Daud rikutken si iperentah TUHAN emaka ngasup ia pelawes bangsa Pilisti i Geba nari seh ku Geser.