Dual PanelPeti Perpadanen ibaba ku Jerusalem (1Taw 13:1-14, 15:25-16:6, 43)
1Ipepulung Daud ka sekali nari tentera Israel si mbisana teremna 30.000 kalak.
2Emaka ibabaina kalak ndai ku Baala i Juda, gelah mbaba Peti Perpadanen i jenari, Peti si maba gelar TUHAN si Mada Kuasa, si ringan i babo Kerubim.
3Peti Perpadanen e ibuatna i rumah Abinadap nari i das uruk-uruk emaka iamparkenna i datas sada gereta si mbaru. Si mabai gereta e Ussa ras Ahio duana anak Abinadap.
4Ahio erdalan arah lebe.
5Daud ras kerina bangsa Israel rende dingen landek-landek asa gegehna muji TUHAN, iikuti sora kulcapi, murdap, gendang, genta ras calacayak.
6Kenca seh i pengeriken Nakon celus lembu e, emaka idadaken Ussa tanna njemak Peti Perpadanen e.
7Minter merawa TUHAN Dibata man Ussa emaka IbunuhNa ia erkiteken la mehamat perbahanenna. Mate Ussa i deher Peti Perpadanen e,
8janah erkiteken si e ibahan gelar ingan e Peres Ussa mulai paksa e. Seh kal kelekna ukumen si ibereken Dibata man Ussa. Erkiteken si e merawakal Daud.
9Mbiar Daud man TUHAN nina, "Uga pembabangku Peti Perpadanen e genduari?"
10Dungna itetapkenna maka Peti Perpadanen e la ibaba ku Jerusalem. Tapi nilah ia janah itamakenna i rumah Obet Edom, sekalak si asalna i kota Gat nari.
11Lit telu bulan dekahna Peti Perpadanen e i jah, emaka ipasu-pasu TUHAN Obet Edom ras keluargana.
12Ibegi Raja Daud maka keluarga Obet Edom ras kerina si lit i bas ia nggo ipasu-pasu TUHAN erkiteken Peti Perpadanen e. Perban si e ilegi Raja Daud Peti Perpadanen e i bas rumah Obet nari, ibabana ku Jerusalem alu sada perayan si mbelin.
13Kenca si ngelanja Peti Perpadanen e erdalan enem njingkang, isuruh Daud ngadi, sedangken ia mpersembahken sada lembu ras sada anak lembu si mbur.
14Uis lenan ngenca igonjeken terjeng awakna. Ipujina TUHAN alu landek asa gegehna.
15Daud ras bangsa Israel, alu surak-surak si meriah ras sora terompet maba Peti Perpadanen e ku Jerusalem.
16Tupung seh i kota e, Mihal anak Saul si diberu nungkir arah jendela, idahna Daud sangana landek-landek ras lompat-lompat deher Peti e. Emaka ciga atena ngenenca.
17Ibaba kalak enda Peti Perpadanen e, jenari itamakenna ku bas Kemah si nggo isikapken Daud guna si e. Kenca bage ipersembahken Daud man TUHAN persembahen tutungen ras persembahen persadan.
18Kenca dung ipersembahkenna persembahen e, ipasu-pasuna bangsa e i bas gelar TUHAN si Mada Kuasa.
19Kenca bage ibagi-bagiken Daud pangan man bangsa e kerina. Iberekenna man tep-tep dilaki ras diberu i Israel sengkibul roti, sengkeret daging, ras kue kismis. Kenca bage mulih ia kerina ku rumahna.
20Kenca bage, sanga Daud mulih ku rumahna ngataken mejuah-juah man keluargana, ndarat Mihal njumpaisa. Nina Mihal man Daud, "I bas wari enda raja nggo erbahan sada gelar si mbelin man bana. Itilanjangina bana i lebe diberu-diberu si ngidangi anak buahna. Ia desken kalak lenge tuhu-tuhu."
21Nina Daud njabapsa, "Aku landek mpermuliaken TUHAN si milih aku jadi raja BangsaNa Israel. Labo bapandu ras keluargana si IpilihNa. Erkiteken si e terus nge aku landek mpermuliaken TUHAN,
22janah lebih asa si e kuhinaken denga tole bangku. Banci jadi la meherga aku iakapndu tapi kerina singuda-nguda e ngergai aku tuhu-tuhu!"
23Mihal anak Saul si diberu, la pernah mupus.