Dual PanelAbiya erperang ras Jerobeam (1Raj 15:1-8)
1I bas tahun pesepuluh waluhken pemerentahen Raja Jerobeam i Israel, Abiya jadi raja i Juda,
2jenari erkuasa ia telu tahun i Jerusalem. Nandena Mikaya anak Uriel i kota Gibea nari. Pecah me perang Abiya ras Jerobeam.
3Abiya lawes ku perang e alu 400.000 tentera dingen Jerobeam ngelawan ia alu 800.000 kalak tentera.
4Perang e jadi i Deleng Eperaim. Raja Abiya nangkih ku uruk Deleng Semaraim jenari erlebuh ia man Jerobeam ras man kalak Israel nina, "Begiken!
5La kin ietehndu maka TUHAN Dibata Israel nggo erbahan perpadanen si la terosari ras Daud maka Dibata mereken man Daud ras man kesusurenna ngerajai Israel rasa lalap?
6Tapi Jerobeam anak Nebat berontak ngelawan rajana, eme Salomo.
7Kedungenna ipepulungna sada gerombolen kalak gutul si la terpake jenari ipersadana gegehna ngelawan Rehabeam anak Salomo. Tapi Rehabeam ngudasa denga dingen kurang denga pengalamenna guna ngelawan kalak e.
8Genduari isurakendu ka atendu erperang ngelawan kerajan TUHAN si NiberekenNa man kesusuren Daud? Nterem tenterandu janah lit i bas kam lembu emas si ibahan Jerobeam jadi dibatandu.
9Ipelawesndu imam-imam TUHAN, kesusuren Harun bage pe kalak Lewi. Jadi gancihna itangkuhkenndu imam-imam bali ras cara si ibahan bangsa si deban. Ise si maba sada lembu e ntah pitu biri-biri, banci ia ndatken penangkuhen jadi imam dibata-dibatandu si palsu.
10Tapi kami isembah kami TUHAN Dibata kami dingen la Ia itadingken kami. Imam-imam kesusuren Harun tetap ndahiken tugasna dingen kalak Lewi nampati ia.
11Tiap erpagi-pagi ras tiap karaben ipersembahken imam-imam e man TUHAN persembahen si merim-merim ras asuh-asuhen si itutung kerinana. Ipersembahkenna roti i babo sada meja si bersih rikutken aturen agama janah tiap karaben isaganna lampu i babo nahe lampu emas. Ilakoken kami kai si iperentahken TUHAN tapi kam nggo itadingkenndu Ia.
12Dibata jine kap jadi peminpin kami, janah imam-ImamNa genduari lit i jenda ncikep terompet dingen nggo sikap ngembussa guna ngelebuh kami erperang ngelawan kam. O bangsa Israel, ula ilawanndu TUHAN, Dibata nini-ninindu! Labo kam banci menang!"
13Tupung e isuruh Jerobeam sada bagin tenterana nggempangi tentera Juda i pudi nari, si lebihna ngalaken pasuken Juda i lebe nari.
14Ipernehen pasuken Juda kelewet dingen idahna maka pasuken Israel nggo ngkepung ia. Emaka serko tentera Juda mindo penampat man TUHAN janah imam-imam e ngembus terompet.
15Surak tentera Juda alu megang sorana, jenari alu pinpinen Abiya erperang ia. Italuken Dibata Jerobeam ras tentera Israel.
16Lompat kalak Israel nadingken kalak Juda, ibahan Dibata maka menang kalak Juda.
17Mbelin kinitalun Israel ibahan Abiya ras tenterana. Lit 500.000 kalak tentera Israel si mbisana mate tupung si e.
18Alu bage kalak Juda nggo naluken Israel, sabap kalak Juda ernalem man TUHAN. Dibata nini-ninina.
19Iayak-ayak Abiya tentera Jerobeam jenari ikuasaina piga-piga kota, eme: Betel, Jesana, ras Epron, bage pe kuta-kuta i sekelewet kota-kota e.
20Tupung pemerentahen Abiya lanai pernah Jerobeam ndatken kuasana mulihi. Kedungenna ipekpek TUHAN si Jerobeam emaka mate ia.
21Tapi Abiya tetap ergegehna kuasana. Lit sepulu empat kalak ndeharana dingen dua pulu dua kalak anakna dilaki dingen sepulu enem anakna diberu.
22Sejarah Abiya si debanna, kai si ikatakenna dingen kai si ibahanna, isuratken i bas Sejarah Nabi Iddo.