Dual PanelPembaharun si ibahan Asa
1Kesah Dibata reh ndahi Asaria anak Oded,
2jenari lawes ia njumpai Asa. Nina erlebuh, "O Raja Asa, bage pe kam kerina kalak Juda ras kalak Benyamin! Begiken! Adi kam ras TUHAN emaka Ia pe ras kam. Adi idaramindu Ia, IbereNa kam jumpa ras Ia, tapi adi itadingkenndu Ia, kam pe ItadingkenNa.
3Sabap nggo ndekah Israel mggeluh alu la er-Dibata. La lit imam-imam si ngajarisa, dingen nggeluh alu la rundang-undang.
4Tapi tupung reh kiniseran, bangsa e mulihken kempak TUHAN, Dibata Israel. Idaramina TUHAN, dingen jumpa ia ras.
5I bas paksa e, la lit kalak si banci reh janah lawes alu aman, sabap i bas tep-tep negeri kacau kerina.
6Bangsa ngelawan bangsa dingen kota ngelawan kota erkiteken Dibata mereken kiniseran dingen kearun man bangsa-bangsa e.
7Tapi kam arus megegeh dingen ula aru atendu. Lit nge upahndu ndahiken dahinndu."
8Tupung ibegi Asa nubuat si ibelasken Asaria anak Oded, reh tetapna ukurna. Iambekkenna berhala-berhala si lit i negeri Juda ras Benyamin. Bage pe kerina berhala-berhala i bas kota-kota si nggo italukenna i deleng-deleng Eperaim. Batar-batar TUHAN si pajek i bas kesain Rumah Pertoton pe ipehulina.
9Nterem kalak Eperaim, Manase ras Simeon reh erpihak kempak Asa jenari tading ia kerina i bas kerajanna sabap nggo idahna maka TUHAN ngarak-ngarak Asa. Idilo Asa ia kerina ras kalak Juda, ras Benyamin.
10Pulung kerina i Jerusalem i bas bulan peteluken tahun pesepulu limaken kenca Asa jadi raja.
11I bas wari e ipersembahkenna persembahen man TUHAN. Persembahen si ipersembahkenna e, eme si ibabana mulih i bas pertempuren nari. Buena persembahen 700 lembu dingen 7.000 biri-biri.
12Ibahanna perpadanen maka asa ukurna lit dingen asa kesahna tetap ia nembah man TUHAN Dibata nu nini-ninina.
13Kerina la si tading-tading subuk nguda ntah nggo metua, dilaki ntah diberu, ise si la nembah man TUHAN Dibata nu nini-ninina, la banci lang ibunuh.
14Alu sora si megang ersumpah ia i bas gelar TUHAN maka tetap atena ncikep perpadanen e, jenari ersurak dingen ngembus terompet.
15Meriah kal ukur kalak Juda kerina sabap nggo ibahanna perpadanen e alu bulat ukurna. Meriah kal ukurna kerina nembah man TUHAN, janah TUHAN pe ngalokenca dingen IberekenNa kedamen i negeri e.
16Ipengadi Asa nini tudungna Maaka jadi kemberahen, sabap ibahan Maaka sada patung Dewi Asera si mehangke akap ngenenca. Patung e iripukken Asa seh getem emaka icilukna i Baluren Kidron.
17Aminna pe la kerina ikernepken Asa ingan-ingan nembah berhala i bas negeri e, tapi ia tetap patuh man TUHAN kidekah ia nggeluh.
18Kerina barang si ipersembahkenna ras si ipersembahken bapana Abiya man Dibata itamakenna ku bas Rumah Pertoton, subuk barang-barang emas bage pe barang pirak.
19Seh tahun petelu pulu limaken pemerentahenna la lit jadi perang i negeri e.