Dual PanelUssia raja Juda (2Raj 14:21-22, 15:1-7)
1Kerina rayat Juda milih anak Amasia, eme Ussia si umurna sepulu enem tahun, lako nggantiken bapana jadi raja.
2(Kenca nggo mate Amasia, italukenna mulihi kota Elat jenari ipekenana mulihi kota e.)
3Ussia jadi raja sanga umur sepulu enem tahun jenari merentah ia i Jerusalem lit dekahna lima pulu dua tahun. Nandena eme Jekoha i Jerusalem nari.
4Ngikutken kai si ibahan bapana, ilakokenna kai si ngena ate TUHAN.
5Kidekah Sakaria nggeluh, eme si ngajarken ia erkemalangen man TUHAN, isembahna TUHAN alu bulat ukurna emaka ipasu-pasu Dibata ia.
6Ussia erperang ngelawan bangsa Pilisti. Iruntuhkenna tembok kota Gat, Jamnia ras Asdot, jenari ipajekkenna kota-kota si erbenteng deher Asdot ras i bas daerah Pilisti si deban.
7Dibata nampati Ussia naluken bangsa Pilisti, bangsa-bangsa Arab si ringan i Gurbaal bage pe bangsa Meunim.
8Bangsa Amon nggalar pajak man Ussia. Kuasana reh belinna, gelarna terberita seh ku Mesir.
9Ipeteguhi Ussia kota Jerusalem alu majekken menara i Pintu Gerbang Suki, i Pintu Gerbang Baluren dingen i datas Penjuru.
10Ipajekkenna ka pe menara-menara si erbenteng i mbalmbal jenari melala ikalina sumur, erkiteken lanai lang-lang buena asuh-asuhenna i ture-ture deleng ras i bas taneh kendit si arah Barat. Erkiteken meriah iakapna erjuma iajukna bangsa e nuan anggur i daerah si erdeleng-deleng dingen perjumai daerah si mehumur.
11Nterem tenterana si katawari pe sikap erperang. Kerna si e isuratken sekretarisna Jeiel ras Maseya i bas pengawasen Hananiah eme sekalak pegawai raja.
12Tentera e ipinpin 2.600 komendan.
13Anak buah kalak enda lit 307.500 kalak tentera si beluh kal erperang guna nampati raja i bas ngelawan musuh-musuhna.
14Tentera e iperlengkapi Ussia alu ampang-ampang, lembing, topi waja, baju besi, panah ras anak panahna, dingen batu guna kalimbawang.
15I Jerusalem lit tukangna si erbahan perkekas-perkekas guna manahken anak panah dingen menterken batu si galang i datas menara-menara nari dingen i datas suki-suki tembok kota nari. Gelar Ussia terberita ku japa pe, bage pe ia nggo megegeh kal erkiteken penampat si ialokenna i bas Dibata nari.
Ussia iukum erkiteken meganjang ukurna
16Tapi kenca Raja Ussia nggo megegeh, turah ukurna meganjang, janah e erbahanca ia ndabuh. Ilawanna TUHAN Dibata alu bengket ku bas Rumah Pertoton guna nutung si merim-merim i babo batar-batar si merim-merim.
17Tapi Imam Asaria itemani waluh puluh imam-imam si megegeh dingen tegas ngikuti raja
18guna ngolang-ngolangi perbahanenna. Nina kalak ndai, "O Ussia! La kap kam banci nutung si merim-merim man TUHAN. Imam-imam kesusuren Harun kap ngenca si nggo itangkuhken ndahiken si enda. Tadingken ingan si badia enda. Nggo ilawanndu TUHAN Dibata emaka lanai kam dat pasu-pasu i bas Ia nari."
19Ussia sangana tedis i bas Rumah Pertoton i tepi batar-batar si merim-merim dingen sangana ijemakna sada perkekas guna nutung si merim-merim. Nembeh kal atena kempak imam-imam e. Jenari minter turah penakit kulit i bas perdempakenna.
20Asaria, bage pe imam-imam si deban sengget kal ngidah perdempaken raja. Jenari ipaksana Ussia nadingken Rumah Pertoton e. Kiam ia ndarat erkiteken TUHAN nggo ngukum ia.
21Erkiteken si e kidekah geluh Raja Ussia lalap lanai bersih rikutken aturen agama erkiteken penakitna e. Erkiteken lanai ia banci bengket ku bas Rumah Pertoton, ringan ia i bas rumahna jine janah kerina tugas-tugasna itangtangi tupung anakna Jotam merentah negeri e.
22Nabi Jesaya anak Amos nuratken kerina si debanna si ilakoken Raja Ussia kidekah ia merentah.
23Mate Ussia jenari ikuburken i bas taneh kuburen raja. Tapi erkiteken penakitna la ia ikuburken i bas kuburen raja-raja. Anakna Jotam nggantiken ia jadi raja.