Dual PanelJosia ngerayaken Paskah (2Raj 23:21-23)
1Raja Josia ngerayaken Paskah i Jerusalem lako pemuliaken TUHAN. I bas pesepuluempat wariken bulan si pemena igelehna asuh-asuhen guna pesta e.
2Ibagikenna tugas man imam-imam si arus ilakokenna i bas Rumah Pertoton jenari iberekenna semangat man bana gelah tutus ia kerina ndahiken dahinna.
3Perentah enda pe iberekenna man kalak Lewi, eme guru-guru Israel, si nggo ikhususken guna TUHAN nina, "Tamaken Peti Perpadanen si badia e i bas Rumah Pertoton si nggo ipajekken Raja Salomo, anak Daud. Lanai perlu ipindah-pindahkenndu Peti e, tapi erdahinlah guna TUHAN Dibatandu dingen guna BangsaNa Israel.
4Buat inganndu i bas Rumah Pertoton rikutken terpukndu, rikutken tanggung jawab si nggo itetapken Raja Daud ras anakna Raja Salomo man bandu.
5Janah aturkenlah pembagin tugasndu emaka piga-piga kalak i bas kam banci tetap sikap nampati tiap keluarga kalak Israel.
6Kam me si nggeleh anak biri-biri ras kambing guna Paskah e. Emaka genduari bahanlah maka kam bersih rikutken aturen agama jenari sikapkenlah persembahen-persembahen gelah senina-seninandu kalak Israel banci ngikutken perentah-perentah si nggo IberekenNa arah Musa."
7Guna keperlun rayatna i bas ngerayaken Paskah e isumbangken Raja Josia i bas rarasen asuh-asuhenna nari 30.000 biri-biri, anak biri-biri, ras kambing, ras 3.000 jenggi lembu.
8Pegawai-pegawaina pe mereken sumbangen man guna keperlun rayat, imam-imam ras kalak Lewi. Pengurus-pengurus Rumah Pertoton, eme Imam si Mbelin Hilkia, Sakaria ras Jehiel, mereken man imam-imam e 2.600 anak biri-biri ras kambing si nguda denga bage pe telu ratus jenggi lembu guna ipersembahken kidekah pesta e.
9Peminpin-peminpin kalak Lewi, eme Konania, Semaya, ras seninana Netanel, Hasabia, Jeiel dingen Josabat, isumbangkenna man kalak Lewi 5.000 anak biri-biri ras anak kambing bage pe 500 jenggi lembu guna ipersembahken jadi persembahen-persembahen.
10Kenca kerina nggo ratur guna ngerayaken Paskah e, imam-imam ras kalak Lewi ngiani inganna sue ras perentah raja.
11Kenca anak biri-biri ras kambing e nggo dung igeleh, kalak Lewi ngkulitisa, janah imam-imam mirpirken darehna i babo batar-batar e.
12Kenca bage ibagi-bagikenna man rayat rikutken terpuk keluargana, gelah alu bage perpulungen e banci mpersembahken asuh-asuhen e sue ras si iperentahken i bas Undang-undang Musa.
13Kenca bage itutung kalak Lewi persembahen Paskah e i bas api, sue ras peraturen, jenari nanggerken persembahen khusus tare kudin ras belanga, emaka ibagi-bagikenna man jelma si nterem.
14Kenca bage maka isikapken kalak Lewi sikerajangenna ras kerajangen imam-imam kesusuren Harun. Sabap, seh ngayak berngi erdahin ia terus mpersembahken persembahen tutungen dingen nutungi tabeh-tabeh persembahen e.
15Pemain musik i bas terpuk Asap i bas suku Lewi, tetap ertugas sue ras si nitetapken Raja Daud. Enda me gelar-gelarna: Asap, Heman, ras Jedutun imam raja. Si engkawal pintu-pintu gerbang labo pada nadingken ingan jaga sabap banci nge ia ngerayaken Paskah alu isampati kalak si deban.
16I bas wari e ilakoken kalak enda kerina sue ras perentah Raja Josia kerna Paskah, subuk persembahen i bas batar-batar.
17Pitu wari dekahna kalak Israel ngerayaken Paskah ras ngerayaken wari raya Roti La Itama Ragi.
18Kenca Nabi Samuel lanai pernah irayaken Paskah bagenda. Ope si e pe la pernah lit raja-raja ngerayaken Paskah bagi si nirayaken
19i bas abad pesepulu-waluhken pemerentahen Josia enda subuk raja jine ras imam-imam, kalak Lewi, kalak Juda ras Israel bage pe kalak Jerusalem.
Pengkeri-kerin pemerentahen Josia (2Raj 23:28-30)
20Kenca Raja Josia ngelakoken kerina e guna Rumah Pertoton, ipinpin raja Mesir Neko, pasukenna erperang i Karkemis deher Lau Eprat. Icuba Josia ngolangisa,
21tapi itenahken Neko berita enda man Josia nina, "Perang enda labo ras kam raja Juda! Aku reh labo ngelawan kam, tapi ngelawan musuh-musuh ku janah Dibata nge si nuruh aku gelah pedas-pedas kulakoken. Dibata kap ras Aku, emaka ula olangi Ia gelah ula kam kernep IbahanNa."
22Tapi Josia tetap ngelawan, la ia nggit ngikutken kata Dibata arah Raja Neko. Josia menyamar erperang ku Baluren Megido.
23I bas perang e, kena panah Raja Josia. Emaka isuruhna suruh-suruhen maba ia ndarat sabap mekelek lukana.
24Suruh-suruhen e ngangkat ia i bas geretana nari ku gereta si deban, jenari ibabana ku Jerusalem. I jah mate ia jenari ikuburken ku kuburen raja-raja. Kerina kalak Juda ras Jerusalem erceda ate perbahan kematenna.
25Nabi Jeremia erbahan sada ende-enden perngandungen guna Raja Josia. Seh ngayak genduari ipake perende-ende denga ende-enden e i Israel subuk dilaki ntah diberu, i bas peringet-ingeten kerna kematen Josia. Ende-enden e nggo ipersada ku bas ende-enden perngandungen.
26Turi-turin si deban kerna Josia, kerna keleng atena man TUHAN, kinipatuhenna ngikutken Undang-undang TUHAN.
27Kerina sejarah geluhna mula-mula nari seh kedungenna isuratken i bas kitap Sejarah Raja-raja Israel ras Raja Juda.